லவ்வுக்கு ஏதுங்க லேங்வேஜ்!

-
தமிழ் பெண்ணான மகாலட்சுமி, பஞ்சாப் சிங்கான சரப்ஜித்சிங்
இருவருமே மொழி தெரியாமல் காதலித்து மணந்தவர்கள்.

"நான் பாண்டிச்சேரியைச் சேர்ந்தவள்.
சென்னையில் என்னுடைய சித்தி வீட்டில்தான் வளர்ந்தேன்.
அப்போது இவர் தனி நபராக எதிர்வீட்டில் குடியிருந்தார்.

அடிக்கடி பார்த்துக் கொள்வோம்.அவருக்கு என்னிடம் பேச
தமிழ் தெரியாது. எனக்கு இந்தி தெரியாது.
கான்டிராக்ட் தொழில் செய்து வந்ததால் எப்போதும் பிஸியாக
இருப்பார்.

என்னுடைய நடவடிக்கைகள் அவருக்குப் பிடித்துப் போக,
சித்தி வீட்டுக்கு வருவதுபோல் என்னிடம் ஏதாவது இந்தியில்
சொல்வார். அதற்கு என்ன அர்த்தம் என்று தெரியாமல்,
ஏதோ ஒரு பதில் கொடுக்க வேண்டும் என்பதற்காக சிரிப்பை
மட்டும் அவருக்கு பதிலாக கொடுப்பேன்.

என்னுடைய சித்திக்கு தெலுங்கு தெரியும், அவருக்கும் தெலுங்கு
கொஞ்சம் தெரியும். "யார் இந்த பலகாங்கள் செய்தது? இத்தனை
ருசியாக செய்த கைக்கு தங்க காப்புதான் போட வேண்டும்'
என்று சொல்வாராம்.

இதைக் கேட்ட சித்தியோ, "அப்போ நீங்க மகாவுக்குத்தான்
போடணும்'னு எதார்த்தமாக சொல்ல, விதவிதமான வளையங்களை
வாங்கி என் சித்தி வழியாக எனக்கு பரிசாக அளித்தார்.

அந்த வளையங்களை வாங்கி கையில் போட்டபோது என்னை
அறியாமல் அவர் மேல் ஈர்ப்பு வந்தது. இதுவே எங்கள் காதலுக்கு
அஸ்திவாரம் போட்டது.

அவரிடம் பணிபுரியும் ஆட்களுக்கு தமிழ், இந்தி இரண்டுமே
தெரியும். அவர்களிடம் கேட்டுவிட்டு என்னிடம் ஏதாவது தப்புத்தப்பாக
திணறி தமிழில் பேசுவார். அதுவே மழலை தமிழ்போல் அத்தனை
அழகாக இருக்கும்.

நானும் என் சித்தியிடம் தெலுங்கு சொற்களைக் கேட்டு இவரிடம்
பேசுவேன். ஒருவருக்கொருவர் மனதார விரும்புகிறோம் என்று
உறுதியாகிவிட்டது. ஆனால் எனக்கு வெளியே சொல்ல பயம்.

என்னுடைய நிலையை உணர்ந்து அவராகவே வந்து "எனக்கு
வாழ்க்கைத் துணையாக வர சம்மதமா' என்று கேட்டார்.
அப்போது மௌனச் சிரிப்பை மட்டுமே பதிலாக கொடுத்தேன்.

உடனே என் சித்தியிடம் வந்து "மகாவை எனக்கு திருமணம்
செய்து தருவீர்களா?' என்று கேட்டார். அவருக்கு அதிர்ச்சியாகிவிட்டது.
என்னிடம் அவரைப் பற்றி கேட்டார்கள். எனக்கும் அவரை
பிடித்திருப்பதாகச் சொன்னேன். சம்மதம் சொல்லிவிட்டார்கள்.
ஆனால் அவருடைய வீட்டில் சம்மதம் தெரிவிக்கவில்லை.
எதிர்ப்பை மீறி என்னை திருமணம் செய்தார்.

எங்களுக்கு மகன் பிறந்த பிறகு அவர்களும் சமரசம் ஆகிவிட்டார்கள்.
இப்போது வெற்றிகரமான காதல் வாழ்க்கை வாழ்கிறோம்' என்றார்
மகாலட்சுமி.
-
-------------------------------------------

- வனராஜன்- கல்கி