ஸ்னூக்கர் விளையாட்டில் தமிழ்ப் பெண்!

-
கடந்த ஆண்டு அயர்லாந்தில் நடைபெற்ற
உலக ஸ்னூக்கர் சாம்பியன்ஷிப் போட்டியில்
தமிழகத்தைச் சேர்ந்த வித்யா பிள்ளை வெண்கலப்
பதக்கம் வென்று நாட்டுக்குப் பெருமையைத் தேடித்
தந்தார்.
-
இவருக்கு திருச்சி சொந்த ஊராக இருந்தாலும்,
வித்யா பிள்ளை படித்தது, வளர்ந்தது, ஸ்னூக்கர்
விளையாடப் பழகியது எல்லாம் சென்னையில்தான்.
-
தமிழகத்தில் மாநில அளவிலான ஸ்னூக்கர் போட்டியில்
12 முறை இவர் வெற்றி பெற்றுள்ளார்.
-
தற்போது, கர்நாடக ஸ்னூக்கர் அணிக்கு ஆடி வரும்
வித்யா பிள்ளை, தேசிய அளவில் மட்டுமல்லாது,
சர்வதேச அளவில் ஸ்னூக்கர் போட்டிகளில் பல
வெற்றிகளைக் குவித்து சாதனை படைத்துள்ளார்.
-
தேசிய அளவில் 7 முறை சாம்பியன் பட்டம் வென்ற இவர்,
உலக ஸ்னூக்கர் சாம்பியன்ஷிப் போட்டிகளில் 2 முறை
வெண்கலப் பதக்கங்களைப் பெற்றுள்ளார்.
-
கடந்த 15 ஆண்டுகளாக ஸ்னூக்கர் விளையாடி வரும்
வித்யா பிள்ளை நம்முடன் பகிர்ந்து கொண்ட அனுபவங்கள்:
-
"கடந்த 1999-இல் முதல் முறையாக ஸ்னூக்கர் பற்றி
தெரிந்து கொண்டேன். ஸ்னூக்கர் மீது ஏற்பட்ட ஈர்ப்பு,
இந்த விளையாட்டில் தீவிரமாக ஈடுபட என்னைத்
தூண்டியது. தனது 60 வயதில் டி.ஜி.கமலாதேவி தேசிய
பில்லியட்ஸ் சாம்பியன்ஷிப் பட்டத்தை வென்றது என்னை
உற்சாகப்படுத்தியது.
-
அதன் பிறகு, தமிழக பில்லியட்ஸ், ஸ்னூக்கர் சங்கத்தில்
சேர்ந்து கடினமாக உழைத்து ஸ்னூக்கர் விளையாட்டைப்
பழகினேன். நதீம் அகமது எனது பயிற்சியாளராக இருந்தார்.
இப்போது பல சாம்பியன்ஷிப் பட்டங்களை வென்றுள்ளேன்.
-
திருமணத்திற்குப் பிறகு பெங்களூருவில் குடியேறியுள்ளேன்.
தற்போது, கர்நாடக பில்லியட்ஸ், ஸ்னூக்கர் சங்கத்தில் சேர்ந்து
ஸ்னூக்கர் விளையாட்டைத் தொடர்ந்து வருகிறேன்.
-
ஸ்னூக்கர் மனதை ஒருமுகப்படுத்தும் சிறந்த விளையாட்டாகும்.
பள்ளிகளில் ஸ்னூக்கர் விளையாட்டுக்கு ஊக்கம் கிடைக்க
வேண்டும். ஸ்னூக்கர் விளையாட்டுக்குத் தேவையான உதவியை
தமிழக, கர்நாடக அரசுகள் அளிக்க வேண்டும்.
-
ஸ்னூக்கர்- பெண்களுக்கு மட்டுமல்ல, எந்த வயதினருக்கும்
பொருந்தக்கூடியது.
-
மனதையும் உடலையும் ஒருநிலைப்படுத்துவதற்கு
ஸ்னூக்கர் போன்ற சிறந்த விளையாட்டு எதுவும் கிடையாது.
-
கல்வியில் சிறந்து விளங்குவதற்கு விளையாட்டைப்
புறக்கணிக்குமாறு பலரும் கூறுவர். இது தவறானது. கல்வியில்
சிறந்து விளங்க விளையாட்டு கண்டிப்பாகக் கைகொடுக்கும்.
ஏதாவதொரு விளையாட்டில் ஈடுபட விரும்பினால்,
முறையான வழிகாட்டுதல் தர தயாராக இருக்கிறேன்.
-
பள்ளிகளில் விளையாட்டுக்கு ஊக்கம் கிடைக்க வேண்டும்.
அப்போதுதான் ஸ்னூக்கர் போன்ற பல விளையாட்டுகள்
இளைஞர்களின் எதிர்காலத்தை நெறிப்படுத்தப் பேருதவியாக
அமையும்.

உலக ஸ்னூக்கர் சாம்பியன்ஷிப் பட்டத்தை வெல்லும்
நம்பிக்கை எனக்கு உள்ளது. அதற்காக கடினமாக உழைத்து
வருகிறேன்'' என்கிறார் வித்யா பிள்ளை.
-
---------------------------------------------------------------
-ந.முத்துமணி- தினமணி கதிர்

வாவ் ! பாராட்டுகளும் வாழ்த்துகளும்