விளிம்பு நிலையில் கடல் புறாக்கள்!

**krishnaamma** · **krishnaamma** Sun Feb 01, 2015 10:26 pm

ராமேஸ்வரம்: தனுஷ்கோடி பகுதியில் கடல் புறாக்கள் அழியும் அபாயத்தில் உள்ளன. கடல் புறாக்கள் ஒரு நாளில் 12 மணி நேரம் கடலிலும், மீதி நேரம் அடர்ந்த சவுக்கு மரக் காடுகளிலும் வசிக்கும். கடலின் மேல் மட்டத்தில் வசிக்கும் சிறிய மீன்களை இரையாக கொள்ளும். மீனவர்கள் இவற்றை 'காவாய் பறவை' என்பர்.சில மீனவர்கள் இரட்டைமடி போன்ற தடை செய்யப்பட்ட வலைகளை பயன்படுத்துவதால் மீன்வளம் குறைகின்றது. இதனால் இரை கிடைக்காமலும், சவுக்கு மரக்காடுகளில் மனிதர்களின் நடமாட்டத்தாலும் தனுஷ்கோடி பகுதியில் கடல் புறாக்கள் குறைந்து வருகின்றன.

'கடந்த 5 ஆண்டுக்கு முன் தனுஷ்கோடிக்கு 5,000க்கும் மேற்பட்ட பிளமிங்கோ, 1000க்கும் மேற்பட்ட கடல் புறாக்கள் வந்தன. இந்த ஆண்டு 2500 பிளமிங்கோ, 300 கடல் புறாக்கள் மட்டுமே வந்துள்ளன' என வனத்துறையினர் தெரிவித்தனர். தற்போது தனுஷ்கோடி அருகே கோதண்ட ராமர் கோயில் நீர்ப்பிடிப்பு பகுதிக்கு பிளமிங்கோ பறவைகளும், கடல் புறாக்களும் வந்துள்ளன. இவை வேட்டையாடப்படுவதை தடுக்க வனத்துறையினர் கண்காணிப்பில் ஈடுபட்டுள்ளனர். மண்டபம் வனத்துறை அதிகாரி ஜாபர் உத்தரவுப்படி, வேட்டை தடுப்பு காவலர் சிவகுமார் இப்பணியில் உள்ளார்.

தினமலர்

**krishnaamma** · **krishnaamma** Sun Feb 01, 2015 10:27 pm

சத்திமுத்தப் புலவர் சங்க காலப் புலவர்களில் ஒருவர். சத்திமுத்தம் என்னும் ஊரில் பிறந்தவர். இவர் வறுமையால் தளர்வுற்று தம் ஊர்விட்டு அயலூர் சென்று ஒரு குட்டிச் சுவரின் அருகில் குளிருக்கு ஒதுங்கியிருக்கும் போது நாரை ஒன்று மேலே பறக்கக் கண்டு, வறுமையிலும் தன் பிரிவாலும் வருந்திக் கொண்டிருக்கும் தன் மனைவிக்கு அதைத் தூதாக அனுப்புவது போல்

நாராய் நாராய் செங்கால் நாராய்
பழம்படு பனையின் கிழங்கு பிளந்தன்ன
பவளக் கூர்வார்ச் செங்கால் நாராய்
நீயுநின் மனைவியும் தென்றிசைக் குமரியாடி
வடதிசைக்கேகுவீராயின்
எம்மூர்ச் சத்திமுத்த வாவியுள் தங்கி
நனைசுவர்க் கூரைக் கனைகுரற் பல்லி
பாடு பார்த்திருக்குமென் மனைவியைக் கண்டு
"எங்கோன் மாறன்வழுதி கூடலில்
ஆடையின்றி வாடையின் மெலிந்து
கையது கொண்டு மெய்யது பொத்திக்
காலது கொண்டு மேலது தழீஇப்
பேழையுள் இருக்கும் பாம்பென உயிர்க்கும்
ஏழையாளனைக் கண்டனம் எனுமே" [1]

என்ற பாடலைப் பாடினார். அச்சமயம் அங்கு நகர சோதனைக்கு வந்த மாறான் வழுதி என்ற அரசன் இச்செய்யுளைக் கேட்டு தான் நாரையின் மூக்கிற்குப் பல அறிஞர்களிடமும், நூல்களிடமும் உவமை கானாது தேடிக்கொண்டிருந்த போது பனங்கிழங்கின் உவமையைக் கேட்டுக் களிப்புற்று, தன் மீது போர்த்தியிருந்த உத்தரீயம் என்ற மேலாடையினை அவர் மீது எறிந்தான். தன் சேவகரை விட்டு அவரைத் வருவித்து வேண்டியது வழங்கினான்.

எனக்கு இந்த 'பிளமிங்கோ' க்களை பார்க்கும்போதெல்லாம் இந்த பாடல் தான் நினைவுக்கு வரும் புன்னகை