துன்பப் பனிக்காலம்…!! -Mano Red

Mano Red · Mano Red Thu Jan 22, 2015 1:54 pm

அது ஒரு
துன்பப் பனிக்காலம்,
சொல்ல வேண்டியதாயினும்
சொல்ல முடியவில்லை…!!
பார்த்தவுடன் பயம் கொள்கிற
பாழடைந்த நேரம்..!!

மீள் சறுக்கலில்
சுழல் நினைவுகளுடன்,
மீட்சி பெற
முனைப்புடன்
வந்து அமர்கிறது
ஒரு அனாதை நினைவு…!!

அவிழா முடிச்சுகளுடன்
ஆங்காங்கே சில
மயிர் நுனி அளவு
பிரச்சினைகளின்
பிம்பங்களை
பெரிதாக தனதாக்கி
தடுமாறி நின்றது அந்நினைவு…!!

கோபுர அளவு
கோபங்கள் கொண்டு,
சினைமுட்டை அளவே
சந்தோசத்தின்
சலுகை பெற்றிருந்தது போல
பாவமாய் தெரிந்தது..!!

குளிருக்காக அல்ல
வேறு எதற்கோ
கூனிக்குறுகியது,
கதகதப்பிலும்
காந்தல் வெப்பமேறி
வெடித்து சிதற விரைந்தது..!!

தனிமையும் ஒரு காரணமாம்,
நூலாம்படையின்
நுண்ணிய வெளிச்சத்தில்
சிலந்தி கூட
அதன் துணையில்லையாம்,
வெறிக்கப் பார்த்துவிட்டு
வெறுமையாய் புலம்பியது…!!

அதற்கு என்ன தெரியும்..?
சுயமில்லாத
நினைவு சுவற்றில்
சுண்ணாம்பு பூசினாலும்,
கருப்பு நிறம் மட்டுமே
கனலாய் கசியும்..!!

துன்பப் பனிக்காலம்…!! -Mano Red SKgUFBZiRRiM4eja9GPk+alone-beautiful-canx27t-sleep-drawing-Favim.com-944383