ஐ - விமர்சனம்

soplangi · soplangi Wed Jan 14, 2015 2:20 pm

தயாரிப்பு : ஆஸ்கார் ஃபிலிம்ஸ் பிரைவேட் லிமிடெட்.,
இயக்கம் : ஷங்கர்
நடிப்பு : விக்ரம், எமி ஜாக்ஸன், சுரேஷ் கோபி, உபுன் படேல், சந்தானம்
இசை : ஏ.ஆர்.ரஹ்மான்
ஒளிப்பதிவு : பி.சி.ஸ்ரீராம்
எடிட்டிங் : ஆண்டனி

மூன்று வருடங்களாக தமிழ் சினிமாவே காத்துக் கொண்டிருக்கும் படம் இப்போது திரையரங்குகளை ஆக்ரமித்திருக்கிறது... ‘ஐ’ தந்த ஆச்சர்யங்கள் என்னென்ன?

கதைக்களம்

‘மிஸ்டர் தமிழ்நாடு’ லிங்கேஸன் (விக்ரம்) மாடலிங்கில் கொடிகட்டிப் பறக்கும் தியாவின் (எமி ஜாக்ஸன்) தீவிர ரசிகர். ஒரு திடீர் சந்தர்ப்பத்தில் தியாவுடன் சேர்ந்து மாடலிங் செய்யும் வாய்ப்பு அமைய, மாடல் ‘லீ’யாக மிகப்பெரிய அளவில் பிரபலமடைகிறார். அவரின் வளர்ச்சி... சிலருக்கு பலவீனமாக அமைய, அவர்கள் அனைவரும் இணைந்து ‘நெஞ்சை நிமிர்த்தி’த் திரியும் விக்ரமை, ‘கூன்’ போட வைக்கிறார்கள். மீண்டும் விக்ரம் நிமிர்ந்தாரா? இல்லையா? என்பதே ‘ஐ’.

படம் பற்றிய அலசல்

ரொம்பவும் சாதாரணமான பழிவாங்கல் கதைதான். அதை தன் பாணியில் பிரம்மாண்டமாக காட்டியிருக்கிறார் இயக்குனர் ஷங்கர்.

மணக்கோலத்திலிருக்கும் எமி ஜாக்ஸனை, கூன் விக்ரம் கடத்தும் முதல் காட்சியிலேயே கதைக்குள் நுழைந்துவிடுகிறது ‘ஐ’. பின்னர் ஃபிளாஷ்பேக்காக விக்ரம் ‘மிஸ்டர் தமிழ்நாடு’ அவதாரம் எடுப்பது, மாடலாக மாறுவது, எமியுடன் காதல் செய்வது என முதல் பாதி மெதுவாக பயணிக்கிறது. இடைவேளைக்குப் பின்னர் கொஞ்சம் வேகமெடுக்கும் திரைக்கதை, விக்ரமின் பழிவாங்கல் நடவடிக்கையின்போது விறுவிறுப்பை கூட்டியிருக்கிறது.

டெக்னிக்கலாக ஷங்கர் படம் எப்போதுமே முதல் தரத்திலிருக்கும். இந்த ‘ஐ’யும் அந்த நம்பிக்கையைக் வீணாக்கவில்லை. அழகான லோகோஷன்கள், அற்புதமான இசை, கலர்ஃபுல் ஒளிப்பதிவு, வியக்க வைக்கும் மேக்அப், ஆச்சரியப்படுத்தும் சிஜி என எல்லாமே இப்படத்திலும் உயர்தரம்!

முதல்பாதியின் ஸ்லோவான திரைக்கதை, விக்ரம் எமிக்கிடையே இருக்கும் காதலில் ஆழமில்லாமல் இருப்பது, எளிதில் யூகிக்கக்கூடிய ‘ட்விஸ்ட்’ போன்றவை ‘ஐ’யின் பலவீனங்கள். அதோடு... இதற்குத்தானா இவ்வளவு பிரம்மாண்டங்களும்? என்ற கேள்வி எழுவதையும் தவிர்க்க முடியவில்லை.

நடிகர்களின் பங்களிப்பு

இந்த கேரக்டரில் விக்ரமைத் தவிர வேறு யாரையும் சிந்திக்கவே முடியாது. அவரின் உழைப்பு நிச்சயம் இந்திய சினிமாவில் ஒரு மைல்கல்! லிங்கேஸன், லீ, கூனன் என மூன்று பரிமாணங்களிலும் அவரின் டெடிகேஷன் மலைக்க வைக்கிறது... ‘ஹேட்ஸ் ஆஃப் டு விக்ரம்’.

மாடலிங் பியூட்டி ‘தியா’ கேரக்டருக்கு 100 சதவிகிதம் பொருந்தியிருக்கிறார் எமி ஜாக்ஸன். நடிப்பதற்கு பெரிதாக ஸ்கோப் இல்லையென்றாலும், அவரைத்தவிர இவ்வளவு ‘தாராளம்’ காட்ட தமிழ் சினிமாவில் கண்டிப்பாக ஆள் இல்லை!

படத்தின் ஆரம்பக் காட்சிகளிலும், இறுதிக் காட்சியிலும் வந்து வயிறு குலுங்க சிரிக்க வைத்திருக்கிறார் சந்தானம். டாக்டராக வரும் சுரேஷ் கோபி, அமைதியாக ஆரம்பித்து ஆர்ப்பாட்டமாக முடித்திருக்கிறார். உபேன் பட்டேல், ராம்குமார் ஆகியோரும் சரியான தேர்வே!

பலம்

1. விக்ரமின் கடின உழைப்பு
2. பாடல்களும், அதை படமாக்கிய இடங்களும், விதமும்!
3. ஒளிப்பதிவு, மேக்அப், சிஜி உள்ளிட்ட டெக்னிக்கல் விஷயங்கள்

பலவீனம்

1. ரொம்பவும் சாதாரணமான கதை
2. எளிதில் யூகிக்கக் கூடிய ‘ட்விஸ்ட்’டுகள்
3. ஆங்காங்கே படத்தை ஸ்லோவாக்கும் ஒருசில காட்சிகள்
4. படத்தின் நீளம்

மொத்தத்தில்...

இவ்வளவு செலவு, இவ்வளவு உழைப்பு இந்தக் கதைக்கு தேவையா? என்பதையெல்லாம் ஆராய்ச்சி செய்யாமல் படமாக்கிய விதத்தையும், அற்புதமான லோக்கேஷன்களையும், விக்ரமின் கடின உழைப்பையும் ரசிக்கத் தயாராக இருப்பவர்களுக்கு ‘ஐ’ ஏகப்பட்ட ஆச்சரியங்களைத் தரும் என்பதில் எந்த சந்தேகமும் இல்லை!

ஒரு வரி பஞ்ச் : விழலுக்கிறைத்த நீராக இருந்தாலும், அது விக்ரமின் வியர்வையாக இருப்பதால் கண்டிப்பாக ஒரு முறை கண்டுகளிக்கலாம்!

ரேட்டிங் : 5.5/10

-- டாப் 10 சினிமா

**ராஜா** · **ராஜா** Wed Jan 14, 2015 2:24 pm

அட அதுக்குள்ளே பார்த்தாச்சா ....

இங்கே மதியம் இரண்டு மணிக்கு தான் முதல் show ஆரம்பிக்குது , அதுவும் full ஆகிவிட்டது சோகம்

யினியவன் · யினியவன் Wed Jan 14, 2015 2:24 pm

பிரம்மாண்டத்தைத் தவிர ஷங்கர் படத்தில் வேறு எதையும் எதிர்பார்க்கக் கூடாது புன்னகை

கூர்ந்து நோக்கினால் ஒரே கதையை பல வேறுபட்ட பிரம்மாண்டங்களில் தருவது தான் அவர் ஸ்பெஷாலிடி.

**krishnaamma** · **krishnaamma** Wed Jan 14, 2015 5:00 pm

//இவ்வளவு செலவு, இவ்வளவு உழைப்பு இந்தக் கதைக்கு தேவையா? என்பதையெல்லாம் ஆராய்ச்சி செய்யாமல் படமாக்கிய விதத்தையும், அற்புதமான லோக்கேஷன்களையும், விக்ரமின் கடின உழைப்பையும் ரசிக்கத் தயாராக இருப்பவர்களுக்கு ‘ஐ’ ஏகப்பட்ட ஆச்சரியங்களைத் தரும் என்பதில் எந்த சந்தேகமும் இல்லை!//

முளையை கழட்டி ஒரு மூலை இல் வைத்து விட்டுத்தானே இப்போவெல்லாம் தமிழ் படங்கள் பார்க்க வேண்டி இருக்கு? ......................இல்லாட்ட காதுல பூக்கூடை யே சுத்துவாங்க....................சாரி வெப்பாங்க புன்னகை

.....பிரும்மாண்டம் தான் முக்கியம் என்று ஆகிவிட்டது இப்போதெல்லாம்.......... புன்னகை

veeyaar · veeyaar Thu Jan 15, 2015 3:23 pm

ஒரே ஆள் பத்து பதினைந்து பேரை அடித்து வீழ்த்துவதாக தமிழ் சினிமாவில் காட்டி எப்போது அதை மக்கள் வரவேற்றார்களோ அப்போதே சினிமாவில் லாஜிக் செத்து விட்டது.

**சிவா** · **சிவா** Thu Jan 15, 2015 3:26 pm

veeyaar wrote:ஒரே ஆள் பத்து பதினைந்து பேரை அடித்து வீழ்த்துவதாக தமிழ் சினிமாவில் காட்டி எப்போது அதை மக்கள் வரவேற்றார்களோ அப்போதே சினிமாவில் லாஜிக் செத்து விட்டது.

தமிழ் சினிமா ஓரளவு பரவாயில்லை, தெலுங்கில் ஒரே நேரத்தில் 50, 100 பேரையாவது அடித்தால் தான் ரசிப்பார்கள்!

ஐ படம் உலகளவில் வெற்றி பெற்று தமிழனுக்கு பெருமை சேர்க்கட்டும்!

**ayyasamy ram** · **ayyasamy ram** Thu Jan 15, 2015 3:34 pm

படம் முடிந்ததும் ரசிகர்கள் சிலரிடம் கருத்து கேட்டபோது கிடைத்த பாயின்ட்ஸ்:

அதிகம் பகிரப்பட்டவை: "மெர்சலாயிட்டேன்", "அதுக்கும் மேல", "விக்ரம், ஷங்கர் கிரேட்"!

ஓரளவு சொல்லப்பட்டவை: "தமிழ் சினிமாவை அடுத்த ரேஞ்சுக்கு கொண்டு போயிட்டாங்கப்பா!"

மிகச் சிலர் குறிப்பிட்டவை: "ஒரு தடவை பார்க்கலாம்!"

ஆக, முதல் காட்சியில் ரசிகர்கள் உணர்த்திருயிருப்பது... ‘ஐ’-யைத் தவறேல்!
===\
-தமிழ் தி இந்து.காம்

யினியவன் · யினியவன் Thu Jan 15, 2015 3:35 pm

வாங்க பாஸ் நீங்களும் பொங்கலுக்கு ரிலீஸ் ஆயிட்டீங்களா புன்னகை

**சிவா** · **சிவா** Thu Jan 15, 2015 4:02 pm

யினியவன் wrote:வாங்க பாஸ் நீங்களும் பொங்கலுக்கு ரிலீஸ் ஆயிட்டீங்களா

ஆம் தல! பொங்கலுக்குக்காகவும், நன்னடத்தையின் காரணமாகவும் இரண்டு மாதத்தில் ரிலீஸாகிவிட்டேன்! அருமையிருக்கு

யினியவன் · யினியவன் Thu Jan 15, 2015 4:20 pm

சிவா wrote:ஆம் தல! பொங்கலுக்குக்காகவும், நன்னடத்தையின் காரணமாகவும் இரண்டு மாதத்தில் ரிலீஸாகிவிட்டேன்!

தூங்கிட்டே இருந்திருப்பீங்க போல அதான் நன்னடத்தை புன்னகை

Sponsored content · Sponsored content

ஐ - விமர்சனம்

ஐ - விமர்சனம்

Re: ஐ - விமர்சனம்

Re: ஐ - விமர்சனம்

Re: ஐ - விமர்சனம்

Re: ஐ - விமர்சனம்

Re: ஐ - விமர்சனம்

Re: ஐ - விமர்சனம்

Re: ஐ - விமர்சனம்

Re: ஐ - விமர்சனம்

Re: ஐ - விமர்சனம்

Re: ஐ - விமர்சனம்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக