ஃபோர்ப்ஸின் இளம் சாதனையாளர்கள் பட்டியலில் 44 இந்தியர்கள்

-
புகழ் பெற்ற ஃபோர்ப்ஸ் பத்திரிகை ஆண்டுதோறும் வெளியிடும் 30 வயதுக்குட்பட்ட இளம் சாதனையாளர்கள் பட்டியலில் இந்த முறை 44 இந்தியர்களும், இந்திய வம்சாவளியைச் சேர்ந்தவர்களும் இடம் பெற்றுள்ளனர்.

"30 வயதுக்குள் தாங்கள் செயலாற்றும் துறையின் போக்கை மாற்றியவர்கள், அடுத்தக் கட்டதுக்கு இட்டுச் சென்றவர்கள், புத்தாக்கத்தைப் படைத்தவர்கள்' என்ற தலைப்பில் ஆண்டுதோறும் ஃபோர்ப்ஸ் பத்திரிகை பட்டியல் வெளியிட்டு வருகிறது.

20 துறைகளில் ஈடுபட்டுள்ள 600 பேரின் பெயர்களைக் கொண்ட இந்தப் பட்டியலில், 44 இந்தியர்களும், வெளிநாடுகளில் வாழும் இந்திய வம்சாவளியினரும் இடம் பெற்றுள்ளனர்.

ஊக்க முதலீட்டுத் (வென்சர் கேபிடல்) துறையில், இளம் தொழில்முனைவோர் தொழில் தொடங்க 25,000 டாலர்கள் வரை (சுமார் ரூ.15.9 லட்சம் வரை) கடன் பெறுவதற்கு வழிவகை செய்தமைக்காக நிடேஷ் பான்டா (28) என்ற இந்தியர் பெயர் இடம் பெற்றுள்ளது.

நுகர்வோர் தொழில்நுட்பத் துறையில், "ஹ்யூமின்' என்ற கைப்பேசி மென்பொருளை உருவாக்கிய அன்கூர் ஜெயினும் (24), திரைத் துறையில், ஹாலிவுட் படங்களுக்கு திறமை மிக்கவர்களை பணியாற்றச் செய்த முகவர் அவினாஷ் காந்தியும் (26) இந்தப் பட்டியலில் இடம் பெற்றுள்ளனர்.

இவர்கள் தவிர, பார்த்தா உன்னாவா (22), அமன் அத்வானி (26), இஷ்வீன் ஆனந்த் (29), விஜய் சுதாஸமா (28), வினித் மிஸ்ரா (27), விவேக் ரவிசங்கர் (27), தீபிகா குருப் (16), நிகில் அர்வால் (28), ராகுல் ரேகி (23) உள்ளிட்ட 41 இந்தியர்கள், இந்திய வம்சாவளியைச் சேர்ந்தவர்களின் பெயர்கள், ஃபோர்ப்ஸின் இளம் சாதனையாளர்கள் பட்டியலில் இடம் பெற்றுள்ளன.
=====================
-தினமணி