காப்பர் டி... உயிரையே பறிக்குமா?

சென்னை, நுங்கம்பாக்கத்தைச் சேர்ந்த சரண்யா... கடந்த மூன்று வருடங்களுக்கு முன்பு காப்பர் டி பொருத்தியிருக்கிறார். நீண்ட நாட்களான நிலையில், அதை அகற்றுவதற்காக தனியார் மருத்துவமனைக்குச் சென்றார். சிகிச்சைகள் நடந்து கொண்டிருக்கும்போதே உடல்நிலை மோசமடைய, வேறு மருத்துவமனைக்கு கொண்டு செல்லச் சொல்லியிருக்கிறார்கள். அதன்படியே சென்றபோது, 'காப்பர் டி-யை அகற்றும்போது உள்தசையில் சிதைவு ஏற்பட்டிருக்கிறது’ என்று சொன்ன வேறு மருத்துவமனையின் மருத்துவர்கள்... சிகிச்சையை ஆரம்பித்துள்ளனர். என்றாலும், இறுதியில் பரிதாபமாக உயிரிழந்தார் சரண்யா!

'காப்பர் டி அகற்றும்போது இவ்வளவு ஆபத்தா?' என்ற அதிர்ச்சிக் கேள்வியுடன், சென்னையைச் சேர்ந்த மகப்பேறு மருத்துவர் சாதனாவிடம் பேசினோம்.

''முதலில் காப்பர் டி பொருத்தும் முறை பற்றி சொல்லிவிடுகிறேன்'' என்ற டாக்டர்,

''பொதுவாக காப்பர் டி, பாதுகாப்பான கருத்தடை சாதனம்தான். அதனால்தான் அரசாங்கமே இலவசமாகப் பொருத்தச் சொல்லி வலியுறுத்துகிறது. மாதவிலக்கு முடிந்த நாளிலேயே இதைப் பொருத்த வேண்டும். அப்போதுதான் கர்ப்பவாய் திறந்திருக்கும் என்பதுடன், கர்ப்பம் ஏற்படவில்லை என்ற உறுதி கிடைக்கும். காப்பர் டி-யை பொருத்துவதற்கு முன், அந்தப் பெண் ணின் ஜனனப் பாதை தொற்று நீக்கி சுத்தம் செய்யப்படும். பிறகு, 'ஸ்பெக்யூலம்’ என்ற கருவி மூலம் பாதையைச் சிறிது விரிவு செய்து, இதைப் பொருத்துவார்கள். இதனுடன் வரும் நைலான் நூலானது.. ஜனனப் பாதையில் நாம் கைவிட்டு பார்த்தால், உணரும் தூரத்தில் இருக்கும்.

காப்பர் டி பொருத்திய ஆரம்ப நாட்களில் சிலருக்கு ரத்தப்போக்கு ஏற்பட வாய்ப்பிருக்கிறது. புதிதாக ஒரு பொருளை உடல் அடையாளம் கண்டுகொள்வதால் தான் இப்படி. இதற்காக பயம் தேவையில்லை. ஒரு வாரம் கழித்து தாம்பத்ய வாழ்க்கையில் இயல்பாக ஈடுபட முடியும். பொருத்தப்பட்ட காப்பர் டி-யின் இயல்பைப் பொறுத்து, மூன்று, ஐந்து மற்றும் பத்தாண்டுகளுக்கு ஒரு தடவை என்கிற வகையில் மாற்றி விட வேண்டும்'' என்ற டாக்டர், காப்பர் டி, ஆபத்தாக உருமாறும் காரணங் களைச் சொன்னார்.

''காப்பர் டி, அதனுடைய இடத்தில் இல்லாமல் வேறு எங்காவது நகர்ந்து விடக்கூடிய குறைந்தபட்ச வாய்ப்புகளும் உண்டு. பொதுவாக கர்ப்ப பையானது சுருங்கி விரியும் தன்மை கொண்டது. அப்படி சுருங்கும்போது காப்பர் டி-யை வெளியே தள்ளவும், விரியும் போது உள்ளே இழுத்துக் கொள்ளவும் வாய்ப்பு உண்டு. சிசேரியன் செய்து கொண்டவர்கள் என் றால், அதன் காரணமாக எங்கேயும் சிறு இடைவெளி இருந்தாலும், அது வழியாகவும் காப்பர் டி இடம்பெயர வாய்ப்பு உண்டு. ஆனால், இதெல்லாம் மிக அரிதானதே!

ஒருவேளை கர்ப்பப்பையின் உள்ளே சென்றுவிட்டால், மருத்துவ ரால் கைகளைக் கொண்டு சுலபமாக வெளியில் இழுக்கவே முடியாது. அப்படியான தருணங்களில் மயக்க மருந்து கொடுத்து, வெளியே எடுப்போம். கர்ப்பப்பையை விட்டு வேறு இடங்களுக்குச் சென்றிருந்தால், நிச்சயம் ஆபத்து ஏற்படும். உதாரணத்துக்கு குடலிலோ அல்லது குடலின் உள்ளேயோ மாட்டிக் கொண்டால், எப்படிப்பட்ட பிரச்னையை ஏற்படுத்தும் என்றே சொல்ல முடியாது. எனவே தான், காப்பர் டி பொருத்திய பெண்கள்... மாதம் மாதம் காப்பர் டி நூலை கைகளால் தொட்டு, சரியாக இருக் கிறதா என்று 'செக்’ செய்து கொண்டே இருக்க வேண்டும். காப்பர் டி-யை நீக்குவது, மீண்டும் பொருத்துவது எளிதானதே. ஆனால், நீக்கும்போது கொடுக்கப்படும் அனஸ்தீஸியாவினால்கூட மரணம் ஏற்பட வாய்ப்புகள் இருக்கின்றன. இதுவும் அரிதானதே'' என்ற டாக்டர், காப்பர் டி யாருக்கெல்லாம் பொருத்தக்கூடாது என்பது பற்றியும் பேசினார்.

''கர்ப்பப்பை அல்லது கர்ப்பவாய் புற்று நோய் உள்ளவர்கள், அபார்ஷன் காரணமாக செப்டிக் ஆனவர்கள்... இவர்களுக்கெல்லாம் பொருத்தக்கூடாது. மீறி பொருத்தினால்... தொற்று ஏற்படுவதோடு, பொருத்திய இடத்தைவிட்டு வேறு இடத்துக்கு நகர்வதற் கும் வாய்ப்புகள் இருக்கின்றன. இத்தகை யோர்... கருத்தடை சிகிச்சை, ஆணுறை அல்லது சேஃப் பீரியட் என்பது போன்ற வேறு கர்ப்பத்தடை முறைகளை பின்பற்றலாம். கருத்தடையைப் பொறுத்தவரை, காண்டம் எனப்படும் ஆணுறை... மிகவும் பாதுகாப்பான, சிறந்த கருத்தடை சாதனம் என்று சொல்லலாம். இது... பாலியல் நோய் கள், கர்ப்பம் என இரண்டையுமே தடுக்கும்!'' என்று பரிந்துரைத்தார்!

சேஃப் பீரியட்!

டாக்டர் சாதனா சொல்லும் சேஃப் டிப்ஸ்...

''மாதா மாதம் சரியான மாதவிலக்கு சுழற்சி உள்ளவர்கள், இயற்கையான கருத் தடை முறையைப் பின்பற்றலாம். அதா வது, மாதவிலக்கான நாளில் இருந்து ஏழா வது நாள் வரை தாம் பத்யம் மேற்கொள்ள லாம், எட்டாவது நாளில் இருந்து 18-வது நாள் வரை தாம்பத்யத்தைத் தவிர்த்து, அதன் பிறகான நாட்களில் தொடரலாம். இதனை 'சேஃப் பீரியட்’ என்பார்கள்.

மாலா-டி, மாலா-என் கர்ப்பத்தடை மாத்திரைகள் உண்டு. ஒவ்வொரு மாதமும் பீரியட்ஸ் வந்த மூன்று அல்லது ஐந்தாவது நாளில் இருந்து 21 நாட்கள் தொடர்ந்து சாப்பிட்டுவந்தால், முட்டை உற்பத்தியையே தடுத்துவிடும் என்பதால் கருத்தரிக்காது. ஆனால், ஒரு மாதத்தில் ஒரு நாள் மாத்திரை எடுத்துக் கொள்ளா விட்டாலும் பலன் கிடைக்காது. இந்த மாத்திரைகளைப் பயன்படுத்துவதால் ஹார்மோன்களில் சிலமாற்றம் ஏற்பட்டு, அதன் காரணமாக ஏற்படும் சிற்சில விளைவு களையும் சந்திக்க வேண்டியிருக்கும் என்பதையும் மனதில் கொள்ளவும்.''

அவள்விகடன்

நல்ல பகிர்வு

இயற்கைக்கு முரணான எல்லாமே ஆபத்து தான் ....