எலியைத்தேடிய எலி...

**krishnaamma** · **krishnaamma** Sat Dec 27, 2014 1:22 pm

ஒரு ரிஷி கங்கையில் நீராடிவிட்டு வரும் வழியில் கழுகு ஒன்று அவரின் அருகில் ஒரு பெண் சுண்டெலியை விட்டுச் சென்றது.

ரிஷி அந்தச் சுண்டெலியின் மீது கருணை கொண்டு அதனைத் தமது தவத்தின் மகிமையால் ஒரு பெண் குழந்தையாக மாற்றினார். ரிஷியின் வீட்டில் குழந்தை நன்கு வளர்ந்தாள். தக்க வயதில் ரிஷி பத்னி, ரிஷியிடம் மகளுக்குத் திருமணம் செய்யக் கூறினாள்.

ரிஷி தமது மகளுக்கு ஏற்றவனை மணமுடிக்க விரும்பி, சூரியதேவனை அழைத்து வந்தார்.
மகளிடம், "உனக்கு இவரை மணக்க விருப்பமா?' என்று கேட்டார்.

அதற்கு அவள், "இல்லை தந்தையே, இவர் மிக உஷ்ணமானவர், இவரைவிட வலிமையானவர் வேண்டும்' என்றாள்.

ரிஷி சூரியனிடம், "தேவனே, உன்னை விட அதிக பலசாலி யார்?' என்று கேட்டார்.
"மழை பொழியும்போது என்னை முற்றிலும் மறைத்துவிடும் ஆற்றல் மேகங்களுக்கு உண்டு. அதனால் மேகம் என்னை விட "பலசாலி'' என்று கூறி, சூரியதேவன் விடை பெற்றுச் சென்றார்.

ரிஷி மேகதேவனை அழைத்துத் தமது மகளிடம் "மேகத்தை மணக்க விருப்பமா' என்று கேட்டார்.
அதற்கு, அவள் "மேகதேவன் ஈரமாகவும், கருப்பாகவும் இருப்பதால் வேண்டாம்' என்று கூறி மறுத்தாள்.

ரிஷி மேகதேவனிடம், "உன்னை விட அதிக பலசாலி யார்?' என்று கேட்டார்.
"காற்று என்னையே தள்ளிவிடும் ஆற்றல் உடையது' என்றார், மேகதேவன்.
வாயுதேவன் வந்தார்.

ரிஷி புத்திரி "வாயுதேவன் கணத்திற்குக் கணம் வேறுவேறு திசையில் மாறுபட்டுக் கொண்டிருப்பவர்' என்று கூறி, மறுத்து விட்டாள்.

பிறக வாயுவிடம் ரிஷி "உங்களை விடப் பலசாலி யார்?' என்று கேட்க, "மலைதான் என்னைவிடப் பலசாலி. என்னால் அதனை நகர்த்தவே முடியவில்லை' என்றார்.

பிறகு மலைராஜன் ரிஷி முன் வந்து நின்றார். அவரைப் பார்த்து, "தந்தையே, கல் போன்ற இதயம் கொண்டவர் இவர். மென்மையே இல்லை. இவரும் வேண்டாம்' என்று கூறி மறுத்தாள்.
ரிஷியும் மலைராஜனிடம் "உன்னைவிட பலசாலி யார்?' என வினவினார்.

அதற்கு மலைராஜன், "எலி என்னை விட பலசாலி. அது என்னைக்கூ குடைந்து விடும்' என்றார்.
உடனே ரிஷி எலியை அழைத்து வந்தார்.

எலியைக் கண்டதும் ரிஷி புத்திரிக்கத் தன் உண்மையான இயல்பால், அதனுடன் சந்தோஷமாக வாழ முடியும் என்று தோன்றியது. அதனால் தனது தந்தையிடம் தன்னை ஓர் எலியாகவே மாற்ற வேண்டினாள்.

எலி, எலியாகவே மாறியது.

தினமலர்