ரஜினியை விமர்சித்தால் தடையா?”

ஃபேஸ்புக்கில் சினிமா, அரசியல், சமூகம் குறித்த விவாதங்களைக் கவனித்து வருபவர்களுக்குப் பரிச்சயமான பெயர் தமிழ் ஸ்டுடியோ அருண். சென்னையில் மாற்று சினிமாவுக்காக தீவிரமாக இயங்கிக்கொண்டிருக்கும் அமைப்பு 'தமிழ் ஸ்டுடியோ’. லண்டனின் திரைப்பட இயக்கம் குறித்த படிப்பில் தங்கம் வென்றவர், இதன் ஒருங்கிணைப்பாளர் அருண். இயற்கை விவசாயத்திலும் அக்கறைகொண்ட இவர் 'விதை இயற்கை அங்காடி’யையும் நடத்திவருகிறார். 'மாற்று சினிமாதான் தமிழர்களுக்கு வேண்டும்’ என்று நினைக்கும் அருண், சிவாஜி தொடங்கி இளையராஜா வரை விமர்சிக்காத ஆளுமைகளே இல்லை.

ஆனால் 'லிங்கா’ படம் ரிலீஸாவதற்கு முன்பு ரஜினிகாந்தைப் பற்றி இவர் எழுதிய இரண்டு விமர்சனப் பதிவுகளுக்கு ஆயிரக்கணக்கான ரஜினி ரசிகர்கள் முகநூல் நிர்வாகத்தில் புகார் தெரிவிக்க, மொத்தமாக இவருடைய முகநூல் கணக்கையே அழித்திருக்கிறது முகநூல் நிர்வாகம். இது தனி மனித சுதந்திரத்துக்கு எதிரானது என்ற வாதங்கள் சமூக வலைதளங்களில் கிளம்பிக்கொண்டிருக்க, 'தமிழ் ஸ்டுடியோ’ அருணைச் சந்தித்துப் பேசினேன்.

''கடந்த டிசம்பர் 1ல் இருந்து டி.வி, பத்திரிகைனு எதைத் திறந்தாலும் ரஜினியைக் கொண்டாடிக்கிட்டு இருந்தாங்க. வியா பாரத்தின் உச்சத்தில் இருக்கிற சாதாரண நடிகர் அவர். இந்த அளவுக்குக் கொண்டாட வேண்டிய தகுதி அவரிடம் இருக்காங்கிற தலைப்புல முகநூலில் ஒரு பதிவு போட்டேன். அதுக்கு ரஜினி ரசிகர்களிடமிருந்து மோச மான கமென்ட்ஸும் மிரட்டல்களும் வந்தன. இது வழக்கமானதுதானேனு கண்டுக்காம விட்டுட்டேன். அப்புறம் முகநூல் நிர்வாகத்திடம் இருந்து 'இந்தப் பதிவுக்கு 1000த்துக்கும் அதிக மானோர் புகார் தெரிவிச்சிருக்காங்க. இதை நீக்கணும்’னு குறிப்பு வந்தது. நீக்க விருப்பம் இல்லாம விட்டுட்டேன். அடுத்த பதிவில், 'ஒரு கலைஞன் கொண்டாடப்படணும்னா, சமூகத் துக்கு ஏதாவது செஞ்சிருக்கணும். தவிர உங்க கொண்டாட்டத்தை நான் தப்பு சொல்லலை. அவரைக் கொண்டாடணும்னு எல்லோர் மீதும் திணிக்கப்படும் அராஜகத்தை எதிர்க்கிறேன். சமுதாயத்தை விடுங்க... தான் சார்ந்திருக்கிற சினிமாவுக்கு ரஜினி என்ன செய்தார், தன் மகளுக்கு ஸ்டுடியோ கட்டிக் கொடுத்தார். தன்னுடைய குடும்பத்தை அவர் நல்லபடியா பார்த்துக்கிட்டாரே தவிர, சமூக அக்கறையுள்ள ஒரு நல்ல படத்துலகூட அவர் நடிச்சதில்லை’னு ஒரு பதிவு போட்டேன். அது முதல் பதிவைவிட கடுமையான கண்டனத்துக்கு உள்ளாச்சு.

திரும்பவும் முகநூல் நிர்வாகத்திடமிருந்து எனக்கு குறிப்பு வர, அதுக்கு பதில் தரலாம்னு முயற்சி பண்ணிக்கிட்டு இருக்கும்போதே என் கணக்கை அழிச்சிட்டாங்க. பிறகு, 'இத்தனை பேர் உங்க மேல புகார் தெரிவிச்சிருக்கிறதனால இனி உங்கள் கணக்கை கணக்காகத் தொடங்க முடியாது. முகநூல் பக்கமாக மாற்றித் தருகிறோம். ஆனால், அதில் உங்களுடைய எந்தப் பதிவுகளும் இருக்காது’ங்கிற குறிப்பு வந்தது. 'பேசாமொழி’ங்கிற இணைய இதழ் பக்கத்தைதான் இப்போ என்னுடைய பெயரா மாத்திப் பயன்படுத்திக்கிட்டு இருக்கேன். என்னோட கணக்கை அழிச்சது தனி மனித சுதந்திரத்துக்கு எதிரான செயல்' என்று ஆவேசமாகவும் அழுத்தமாகவும் பேசுகிறார் அருண்!

டைம்பாஸ்...