2014-ல் ஃபேஸ்புக்கில் அதிகம் விவாதிக்கப்பட்டவை பட்டியல்!

இந்தியர்கள் இந்த ஆண்டு எதைப்பற்றி எல்லாம் அதிகம் விவாதித்திருக்கின்றனர் தெரியுமா? சமூக வலைப்பின்னல் சேவையான ஃபேஸ்புக் அளவுகோள்படி இந்த கேள்விக்கு பதில் என்னவென்றால் இந்திய பொதுத்தேர்தலும், ஐபிஎல் கிரிக்கெட்டுக்கு, மூன்றாவது இடம் உலக கோப்பை கால்பந்துக்கு சென்றுள்ளது. செவ்வாய்க்கான மங்கள்யான் விண்கலம் மற்றும் காஷ்மீரை உலுக்கிய வரலாறு காணாத வெள்ளம் 4 வது மற்றும் 5 வது இடத்தில் உள்ளன. ஸ்மார்ட்போன் சந்தையில் சூறாவளியாக நுழைந்த சீன நிறுவனம் சியோமி 6 வது இடத்தை பிடித்துள்ளது.

பாலிவுட் நடிகை அலியா பட், பிரியங்கா சோப்ரா நடித்த மேரிகோம் வாழ்க்கை வரலாறு திரைப்படமான மேரிகோம் , நடுவானில் காணாமல் போன மலேசிய விமானம் மற்றும் காஸா பிரச்னை ஆகியவையும் இந்த பட்டியலில் உள்ளன.

இது இந்திய பட்டியல் என்றால், சர்வதேச அளவில் கால்பந்து உலககோப்பை, உலகை அச்சுறுத்தும் எபோலா வைரஸ், பிரேசில் தேர்தல் ஆகியவை அதிகம் விவாதிக்கப்பட்ட விஷயங்களில் முதல் மூன்று இடங்களை பெற்றுள்ளன.

எதிர்பார்க்க கூடியது போல இணைய உலகில் வைரலாக பரவி பரபரப்பை ஏற்படுத்திய ஐஸ் பக்கெட் சாலெஞ்ச் நிகழ்வு 5 வது இடத்தில் உள்ளது. காஸா பிரச்னை, மலேசிய விமானம், ஹாலிவுட் நடிகர் ராபின் வில்லியம்ஸ் மறைவு ஆகிய நிகழ்வுகளும் இந்த பட்டியலில் இடம்பெற்றுள்ளன.

அமெரிக்காவைப் பொறுத்தவரை எபோலா வைரஸ், ஐஸ் பக்கெட் சாலெஞ்ச் மற்றும் ராபின் வில்லியம்ஸ் மறைவு முதல் மூன்று இடங்களை பிடித்துள்ளன. கால்பந்து உலக கோப்பைக்கு ஆறாவது இடம். புதிய அல் கொய்தா என்று சொல்லப்படும் ஐஎஸ்ஐஎஸ் பத்தாவது இடத்தில் உள்ளது.

ஒவ்வொரு நிகழ்வு ஏற்படுத்திய தாக்கம் பற்றியும் சுருக்கமான அறிமுகத்தையும் ஃபேஸ்புக் இந்த பட்டியலுடன் வழங்கியுள்ளது. ஏற்கனவே வலைவாசலான யாஹு மற்றும் தேடியந்திரமான பிங் ஆகியவையும் இது போன்ற பட்டியலை வெளியிட்டுள்ளன.

வீடியோ பகிர்வு சேவையான யூடியூப்பும் அதிகம் பார்க்கப்பட்ட வீடியோக்கள் பட்டியலை வெளியிட்டுள்ளது. இந்திய அளவில் அதிகம் பார்க்கப்பட்ட வீடியோக்கள் பட்டியலில் பாலிவுட் நடிகை சன்னி லியோனின் இசை வீடியோ பாபி டால் முதலிடம் பெற்றுள்ளது. பாப் பாடகர் ஹனிசிங்கின் வீடியோ 2 வது இடத்தில் உள்ளது.

டிவிட்டர் பட்டியல்

இதே போல குறும்பதிவு சேவையான டிவிட்டரும் அதிகம் பகிரப்பட்ட ஹாஷ்டேக் பட்டியலை வெளியிட்டுள்ளது.உலககோப்பை தொடர்பான #WorldCup2014 முதலிடத்தில் உள்ளது. மலேசிய விமான விபத்து தொடர்பான #MH370 2 வது இடத்திலும், அரவிந்த் கெஜ்ரிவால் கட்சி பிரச்சாரத்தை குறிக்கும் #MufflerMan 3 வது இடத்திலும் உள்ளன. காஷ்மீர் வெள்ளத்திற்காக உருவாக்கப்பட்ட #KashmirFloods 5 வது இடம் பிடித்துள்ளது.

சமூக ஊடக பயன்பாட்டில் தீவிரம் காட்டிவரும் பிரதமர் நரேந்திர மோடி, தேர்தலில் வெற்றி பெற்றதும் வெளியிட்ட குறும்பதிவு செய்தி அதிக முறை ரிடிவீட் செய்த குறும்பதிவாக திகழ்கிறது. இதன் மூலம் இந்த ஆண்டின் கோல்டன் டிவீட் அந்தஸ்தை பெற்றுள்ளது. சர்வதேச அளவில் ஆஸ்கர் விருது விழாவின் போது பகிரப்பட்ட எல்லன் டிஜெனிரசின் செல்ஃபி படம் தாங்கிய குறும்பதிவு இந்த அந்தஸ்தை பெற்றுள்ளது.

கால்பந்து உலககோப்பையின் போது 672 மில்லியன் குறும்பதிவுகள் பகிரப்பட்டதாக தெரிவிக்கப்பட்டுள்ளது. ஸ்காட்லாந்தில் நடைபெற்ற சுதந்தித்துக்கான வாக்கெடுப்பு, நைஜீரியாவில் கடத்தப்பட்ட பெண்களை விடுவிப்பதற்காக அமைக்கப்பட்ட #BringBackOurGirls மற்றும் ஹாங்காங் மாணவர் போராட்டம் தொடர்பான #occupycentral ஆகிய ஹாஷ்டேகும் முன்னிலை பெற்றுள்ளன.

ஃபேஸ்புக்கின் ஆண்டு இறுதி பட்டியல்; http://yearinreview.fb.com/

டிவிட்டர் பட்டியல்: https://blog.twitter.com/2014/the-2014-yearontwitter

நன்றி:விகடன்

சரி தான்

நல்ல பதிவு