இன்னொரு மனைவி இருப்பதாக ஜோசியர் கூறியதால் கணவனை வெட்டி கொன்ற மனைவி

First topic message reminder :

பெரியபாளையம் கண்ணிகைபேரை சேர்ந்தவர் கதிர்வேல் (70). அரிசி மொத்த வியாபாரி. இவரது மனைவி விஜயலட்சுமி (60). இவர்களுக்கு கண்ணப்பன் (38) என்ற மகன் உள்ளார். மாற்றுத்திறனாளி. இவரது மனைவி சித்ரா தேவி. இவர்களுக்கு ஸ்ரீமதி (8) என்ற மகள் உள்ளாள்.

இவள் அங்குள்ள பள்ளியில் 3–ம் வகுப்பு படித்து வந்தாள். எல்லோரும் கூட்டு குடும்பமாக வாழ்ந்து வந்தனர். கதிர்வேல் தனது பேத்தி ஸ்ரீமதியிடமும், மருமகள் சித்ரா தேவியிடமும் அதிக பாசத்துடன் பேசி வந்தார்.

இது விஜயலட்சுமிக்கு பிடிக்கவில்லை. இதனால் விஜயலட்சுமிக்கும், கதிர்வேலுக்கும் இடையே அடிக்கடி தகராறு ஏற்பட்டு வந்தது.

இந்த நிலையில் கடந்த 3 நாட்களுக்கு முன்பு விஜயலட்சுமி ஜோசியம் பார்க்க சென்றார். அப்போது ஜோசியர் ‘‘உன் கணவர் உன்னை விட்டு சென்று விடுவார். அவருக்கு இன்னொரு மனைவி பாக்கியம் உள்ளது. அதனால் உன்னை கொலை செய்து விடுவார்’’ என்று கூறினார்.

இதனால் மன உளைச்சல் அடைந்த விஜயலட்சுமி வீட்டில் யாரிடமும் சரியாக பேசாமல் இருந்து வந்தார். இன்று காலை 5 மணிக்கு எழுந்த விஜயலட்சுமி வீட்டில் இருந்த அரிவாளை எடுத்து தூங்கி கொண்டு இருந்த தனது கணவரை சராமரியாக வெட்டினார். இதில் ரத்த வெள்ளத்தில் கதிர்வேல் சம்பவ இடத்திலேயே பலியானார்.

இது குறித்து தகவல் அறிந்ததும் பெரியபாளையம் போலீசார் விரைந்து சென்று கதிர்வேல் உடலை மீட்டு பிரேத பரிசோதனைக்காக திருவள்ளூர் அரசு மருத்துவ மனைக்கு அனுப்பி வைத்தனர்.

இது குறித்து வழக்குபதிவு செய்து கணவனை கொலை செய்த விஜயலட்சுமியை கைது செய்தனர். தொடர்ந்து அவரிடம் விசாரணை நடந்து வருகிறது.

ஜோசியத்தில் கொலை நடந்த சம்பவம் பெரியபாளையத்தில் பரபரப்பை ஏற்படுத்தி உள்ளது.
-maalaimalar

இப்டியுமா

ஆனாலும் ஒரு ஜோசியத்தை நம்புவதற்கு தான் அளவே இல்லாமல் போய்விட்டதே