டிச.11: சதுரங்க ராஜா. விஸ்வநாதன் ஆனந்த் பிறந்த தின சிறப்பு பகிர்வு...

விஸ்வநாதன் ஆனந்த் அப்பா ரயில்வேயில் வேலை பார்த்து வந்தார். அடிக்கடி அவர் வேலை விஷயமாகப் பல ஊர்களுக்குப் பயணம் போக நேரிட்டதொடு வீட்டில் தொலைகாட்சியில் பெரிதாக ஆர்வமில்லாமல் போகவே அம்மாவுடன் சேர்ந்து செஸ் ஆட ஆரம்பித்தது தான் திருப்பம். பின்னர்ப் பிலிப்பைன்ஸ் நாட்டில் அப்பாவின் வேலை விஷயமாக வசிக்கப் போன பொழுதும் செஸ் தான் ஒரே பொழுது போக்காக இருந்தது. டி.வி. நிகழ்ச்சி ஒன்றில் நிறையச் செஸ் சம்பந்தப்பட்ட புதிர்கள் வந்த பொழுது அவற்றுக்குத் தொடர்ந்து சரியாகப் பதில் அனுப்பிப் புத்தகங்களைப் பரிசாக விஷி அள்ளிக்கொண்டே இருக்கவே ,"இனிமேல் நீங்கள் போட்டியில் பங்குகொள்ள வேண்டாம். நீங்களே நிரந்தரச் சாம்பியன்!" என்று சொல்லி எத்தனை புத்தகங்கள் வேண்டுமானாலும் எடுத்துக்கொள்ளுங்கள் என்று அனுமதித்து விட்டார்கள். அவர் அப்படி வாங்கிய முதல் பரிசு செஸ் பற்றிய ஒரு புத்தகம்.

டால் என்கிற ரஷ்ய க்ளப்பில் செஸ் விளையாட சேர்க்கப்பட்ட பொழுது அங்கே ஜெயிப்பவர்கள் உட்கார்ந்து கொண்டும் தோற்பவர்கள் நின்று கொண்டும் ஆடவேண்டும். விஷி நின்றதே கிடையாது என்கிற அளவுக்குச் சிறப்பாக ஆடினார்.

2010-ல் உலகச் செஸ் சாம்பியன்ஷிப் போட்டி பல்கேரியாவின் தலைநகர் சோஃபியாவில் நடைபெற்றது. ஆனந்த், ஜெர்மனியின் பிராங்க்ஃபர்ட் நகரில் இருந்து விமானம் மூலம் சோஃபியாவுக்குச் செல்ல வேண்டும். ஆனால், எரிமலை வெடிப்புக் காரணமாக விமானச் சேவைகள் அனைத்தும் ரத்துசெய்யப்பட்டன 1,700 கி.மீ. தூரத்தை காரில் பயணித்துச் சோஃபியாவை அடைந்தார். அந்தப் பயணச்சோர்வு எதையும் காட்டிக்கொள்ளாமல் உலகச் சாம்பியன் ஆகி சாதித்தார் அவர்.

காந்தி அவரின் ரோல் மாடல். அன்பு தான் மிகப்பெரிய ஆயுதம் என்று நம்புவர். போட்டியாளரை விமர்சித்தோ, திட்டியோ எந்தப் பேட்டியும் தரமாட்டார். ஆட்டத்தில் மட்டுமே முழுக்கவனமும் அவருக்கு. இந்தியாவின் தனி நபருக்கு வழங்கப்படும் எல்லா விருதுகளும் பாரத ரத்னாவைத் தவிர அவரை வந்து சேர்ந்திருக்கின்றன.

சோவியத் ரஷ்யாவின் ஆதிக்கத்தைக் காலி பண்ணி, ஐந்து முறை மூன்று வெவ்வேறு வகையான நாக் அவுட், ரவுண்ட் ராபின், நேருக்கு நேர் போட்டி பாணிகளிலும் உலகச் சாம்பியன் ஆனவர் அவர். ஒரு முறை கூட வெற்றியை பெரிய அளவில் கொண்டாடி அவரைப்பார்க்கவே முடியாது. எதையும் ஒரே மாதிரி எடுத்துக்கொள்ளும் ஜென் நிலை அது. "எப்படிச் சாத்தியம் ஆனந்த்?" என்று கேட்ட பொழுது ,"எப்படி வென்றேன் என்று கவலைப்படவே மாட்டேன்; என்னென்ன தவறுகள் செய்தேன். எதிராளி என்னென்ன தவறுகள் செய்தார் என்று மட்டுமே மண்டையில் ஓடும். திருப்பி அதைச் செய்யக்கூடாதில்லையா ?" வெற்றித் தோற்காமல் இருப்பதில் இல்லை ; தவறுகளைத் திருப்பிச்செய்யாமல் இருப்பதில் இருக்கிறது என்பது அவரின் மந்திரம். கல்வித்திட்டத்தில் செஸ் சேர்க்கப்பட வேண்டும் அது அவர்களின் திறனை அதிகப்படுத்தும் என்று வாதிடுபவர் அவர்.

நன்றி:விகடன்