குழந்தைகளுக்கு கனவு காணும் சுதந்திரம் வழங்கப்படவேண்டும்: கைலாஷ் சத்யார்த்தி

ஆஸ்லோ:
குழந்தைகளுக்கு கனவு காணும் சுதந்திரம் வழங்கப்பட
வேண்டும் என அமைதிக்கான நோபல் பரிசு பெற்ற
கைலாஷ் சத்யார்த்தி தெரிவித்துள்ளார்.

நோபல் பரிசு வழங்கும் விழாவில் பேசிய அவர்,
"இந்த விழாவில் உரையாற்றுமாறு விருது வழங்கும்
குழுவினர் என்னை கேட்டுக்கொண்டனர். ஆனால் அவ்வாறு
என்னால் செய்ய முடியாது. ஏனெனில் அமைதியின்
பிரதிநிதியாகவும், அப்பாவிகளின் அழுகையின்
பிரதிநிதியாகவும், கண்ணுக்கு புலப்படாதவர்களின்
பிரதிநிதியாகவும் நான் இங்கு வந்துள்ளேன்.

நமது குழந்தைகளின் கனவுகளையும், அவர்களது கருத்தையும்
பகிர்ந்து கொள்பவராக இங்கு வந்துள்ளேன்.
எனது பயணம் புத்தர், குரு நானக் மற்றும் மகாத்மா காந்தி
ஆகியோர் பிறந்த மண்ணில் இருந்து துவங்கியுள்ளது. எனக்கு
அளிக்கப்பட்ட இந்த விருதினை, எனது இயக்கத்தைச் சேர்ந்த
காலு குமார், தூம் தாஸ், கிஷோர் மற்றும் பாகிஸ்தானைச்
சேர்ந்த இக்பால் மாசிக் ஆகியோருக்கு அர்ப்பணிக்கிறேன்.
ஏனெனில், இவர்கள் குழந்தைகளின் விடுதலை மற்றும்
கவுரவத்திற்காக தங்களையே தியாகம் செய்தவர்கள்.

அத்தகைய தியாகிகளின் சார்பாக இந்த விருதினை பணிவுடன்
பெற்றுக் கொள்கிறேன். ஆயிரக்கணக்கான முறை குழந்தை
தொழிலாளர்களை நான் விடுவித்ததை நினைத்துப் பார்க்கிறேன்.
அவர்கள் விடுவிக்கப்பட்டவுடன் அவர்களது முகத்தில் தெரியும்
அந்த சந்தோஷத்தில், நான் ஒவ்வொரு முறையும் கடவுளைக்
காண்பேன்.

18 ஆண்டுகளுக்கு முன், 103 நாடுகளைச் சேர்ந்த லட்சக்கணக்கான
எனது சகோதரர்களும்,சகோதரிகளும் 80 ஆயிரம் கி.மீ., நடைபயணம்
மேற்கொண்டதன் விளைவாக, குழந்தை தொழிலாளர்களுக்கு
எதிரான சட்டம் பிறந்தது. நாங்கள் அதை செய்தோம். நீங்கள்
கேட்கலாம். தனி ஒரு மனிதரால் என்ன செய்ய முடியும் என்று?

மலாலா போன்ற இளைய தலைமுறையினர் உலகின் பல்வேறு
பகுதிகளில் உருவாகி, வன்முறைக்கு எதிராக அமைதியை உருவாக்கும்
பணியில் ஈடுபட்டு வருகின்றனர். கூட்டங்களில் பேசுவதாலேயோ,
அல்லது ஒரு சட்டத்தின் மூலமாகவோ குழந்தைகளுக்கு எதிரான
வன்முறைக்கு தீர்வு கிடைத்து விடாது.

கடந்த இருபது ஆண்டுகளில், பள்ளிக்கு செல்லாத குழந்தைகளின்
எண்ணிக்கை பாதியாக குறைந்து விட்டது, குழந்தை இறப்பு,
ஊட்டச்சத்து குறைபாடு குறைக்கப்பட்டுள்ளது. குழந்தை தொழிலாளர்கள்
மூன்றில் ஒரு பங்காக குறைக்கப்பட்டு விட்டது.

எனினும் இன்னும் குழந்தைகளுக்கு எதிரான சவால்கள் நிறையவே
உள்ளன. எனது வாழ்வின் ஒரே லட்சியம் என்னவென்றால்,
ஒவ்வொரு குழந்தைக்கும் வாழ்வதற்கான சுதந்திரம் வழங்கப்பட
வேண்டும். உண்பதற்கு, உறங்குவதற்கான சுதந்திரம் வழங்கப்படவேண்டும்.
அழவும், சிரிக்கவும் அனுமதிக்கப்படவேண்டும். கல்வி கற்கவும்,
பள்ளிக்குச் செல்லவும் அனைத்துக்கும் மேலாக கனவு காண உரிமை
வழங்கப்படவேண்டும்". இவ்வாறு சத்யார்த்தி பேசினார்.
-
---------------------------------------------