முன்னாள் நீதிபதி கிருஷ்ணய்யர் காலமானார் !

**krishnaamma** · **krishnaamma** Thu Dec 04, 2014 6:42 pm

திருவனந்தபுரம்: சட்டத்துறையில் பெரும் முதிர்வும், புகழும் பெற்ற முன்னாள் நீதிபதி கிருஷ்ணய்யர் இன்று காலமானார். அவருக்கு வயது 100. கேரள மாநிலத்தை சேர்ந்தவரான கிருஷ்ணய்யர் பல்வேறு முக்கிய தீர்ப்பக்களை வழங்கியிருக்கிறார். கடந்த நவம்பர் 15 ம் தேதி தனது 100 வது பிறந்த நாளை கொண்டாடினார். இவருக்கு ஜனாதிபதி, பிரதமர் உள்ளிட்ட தலைவர்கள் வாழ்த்து தெரிவித்திருந்தனர். இந்நிலையில் இன்று அவரது உயிர் பிரிந்தது. அமைச்சர் மற்றும் பல்வேறு முக்கிய பொறுப்புகளும் வகித்தவர் ஆவார். அவரது மறைவுக்கு பலரும் இரங்கலும், அஞ்சலியும் செலுத்தி வருகின்றனர்.

பிரதமர் மோடி இரங்கல் ; கிருஷ்ணய்யர் மறைவு குறித்து மிக துயரம் அடைந்தேன். சிறந்த வக்கீலாகவும், போற்றத்தக்க வகையில் நீதிபதியாகவும் பணியாற்றியவர் கிருஷ்ணய்யர் . மனித நேயமிக்க இவரது காலத்தில் அரும் பெறும் சாதனைகள் படைத்துள்ளார். எப்போதும், நான் அவரை சந்தித்த காலத்தில், அவருடன் பேசிய காலத்தில் அவர் ஒரு வியக்கத்தக்க மனிதராக திகழ்வார். அவருடன் நான் பழகிய நாட்கள் மிக சிறப்பானது. அவருடன் கலந்துரையாடியது, அவர் எனக்கு எழுதிய கடிதங்கள் குறித்து நான் இப்போது நினைவுகூர்கிறேன். எப்போதும் இந்திய நலம் குறித்தே அவரது எண்ணம் இருக்கும். அவருக்கு சிறம் தாழ்த்தி தலை வணங்குகிறேன். அவரது ஆத்மா சாந்தி அடைய இறைவனை பிராத்திக்கிறேன். அவரது பிரிவால் வாடும் அவரது குடும்பத்தினரது துயரத்தில் நானும் பங்கு கொள்கிறேன்.

வி.ஆர்.கிருஷ்ண ஐயர் வாழ்க்கை வரலாறு; 1914 நவ., 15ம் தேதி, அப்போதைய மெட்ராஸ் மாகாணத்துக்கு உட்பட்ட பாலக்காடு, வைத்தியநாதபுரத்தில் பிறந்தார். தமிழ் பிராமண குடும்பத்தைச் சேர்ந்தவர். ஏழைக்குடும்பத்தில் பிறந்த இவர், தன் விடாமுயற்சியால் உயர்ந்த நிலைக்கு முன்னேறினார்.

1952ல் கேரள சட்டபைக்கு எம்.எல்.ஏ., வாக தேர்ந்தெடுக்கப்பட்டார். 1957ல் கம்யூனிஸ்ட் அரசில் சட்டம் மற்றும் சிறைத்துறை அமைச்சராக பதவியேற்றார். பதவிக்காலத்தில் இத்துறையில் பல்வேறு சீர்திருத்தங்களை மேற்கொண்டார். 1968ல் கேரள ஐகோர்ட் நீதிபதியாக பதவியேற்றார். 1973ல் சுப்ரீம் கோர்ட் நீதிபதியாக பதவியேற்றார். 1980ல் அப்பதவியில் இருந்து ஓய்வு பெற்றார். இவரது பதவிக்காலம் நீதித்துறையின் பொற்காலமாக விளங்கியது. பாதிக்கப்பட்டவர்கள் யாராக இருந்தாலும் கோர்ட் கதவுகளை தட்டலாம் என்ற நம்பிக்கை விதை, மக்கள் மனதில் இவரின் தீர்ப்புகளால் விதைக்கப்பட்டது. பொதுநல வழக்காடுதலை இந்திய நீதித்துறையில் பரவலாக அறிய செய்தவர் கிருஷ்ணய்யர்.

இந்தியாவில் அரசியல்வாதியாக இருந்து சுப்ரீம் கோர்ட் நீதிபதியாக பதவியேற்றவர் இவர் ஒருவரே. கேரளா, கொச்சின் மற்றும் அலிகார் முஸ்லிம் பல்கலைக்கழகங்களில் கவுரவ பேராசிரியராக பணியாற்றினார். கேரளாவில் சட்ட அகாடமியை நிறுவினார். 1999ல் மத்திய அரசு இவருக்கு பத்ம விபூஷன் விருது வழங்கி கவுரவித்தது. 105 புத்தகங்களை எழுதியுள்ளார்.