முல்லை பெரியாறு -142 அடி உயர்த்த தடை இல்லை -உச்ச நீதிமன்றம்

**T.N.Balasubramanian** · **T.N.Balasubramanian** Wed Dec 03, 2014 2:11 pm

முல்லை பெரியாறு -142 அடி உயர்த்த தடை இல்லை -உச்ச நீதிமன்றம்

புதுடில்லி : முல்லை பெரியாறு அணை விவகாரத்தில் கேரள அரசு சார்பில் தாக்கல் செய்திருந்த மறுசீராய்வு மனுவை சுப்ரீம் கோர்ட் தள்ளுபடி செய்து உத்தரவிட்டுள்ளது. மேலும், அணை நீர் மட்டத்தை 142 அடியாக உயர்த்த தடையில்லை என்றும் நீதிபதிகள் கூறி உள்ளனர். இதனால் முல்லை பெரியாறு அணை விவகாரத்தில் கேரள அரசுக்கு மீண்டும் பின்னடைவு ஏற்பட்டுள்ளது.
தமிழக விவசாயிகளின் நலன் கருதி முல்லை பெரியாறு அணையில் 142 அடி வரை நீர்தேக்க அனுமதி அளிக்குமாறு தமிழக அரசு சார்பில் சுப்ரீம் கோர்ட்டில் மனுதாக்கல் செய்யப்பட்டது. இதனை எதிர்த்து கேரள அரசும் மனு தாக்கல் செய்தது. 2006ம் ஆண்டு முதல் நடைபெற்று வந்த இந்த வழக்கில், 142 அடி வரை தண்ணீர் தேக்கிக் கொள்ளலாம் என தமிழக அரசுக்கு ஆதரவாக மே மாதம் தீர்ப்பளிக்கப்பட்டது. முல்லைபெரியாறு அணையின் நீர்மட்டத்தை 142 அடியாக உயர்த்தக்கோரியும், கேரள அரசின் அணை பாதுகாப்பு சட்டத்தை ரத்து செய்ய உத்தரவிட வலியுறுத்தியும் சுப்ரீம் கோர்ட்டில் தமிழக அரசு தொடர்ந்த வழக்கின் இறுதி தீர்ப்பை 5 பேர் அடங்கிய சுப்ரீம் கோர்ட் பெஞ்ச் மே 07ம் தேதி வழங்கியது. இதில் அணையின் நீர்மட்டத்தை 142 அடியாக உயர்த்தலாம் எனவும், கேரள அரசின் முல்லை பெரியாறு பாதுகாப்பு சட்டம் செல்லாது எனவும், தமிழக அரசிற்கு ஆதரவாக சுப்ரீம் கோர்ட் தீர்ப்பளித்தது.
இந்நிலையில் சமீபத்தில் வடகிழக்கு பருவமழை தீவிரமடைந்ததால் முல்லை பெரியாறு அணையின் நீர்பிடிப்பு பகுதிகள் பெய்த கனமழை காரணமாக அணையின் நீர்மட்டம், 142 அடியை எட்டியது. இதனை தமிழக விவசாயிகள் பொங்கல் வைத்தும், பட்டாசுகள் வெடித்தும் கொண்டாடினர். இந்நிலையில், அணையின் நீர்மட்டம் மொத்த 142 அடியை எட்டி உள்ளதால், கேரள மக்கள் அச்சமடைந்துள்ளதாகவும், கேரள மக்களின் பாதுகாப்பு கருதி அணையின் நீர்மட்டத்தை 142 அடியாக உயர்த்தும் உத்தரவை மறுபரிசீலனை செய்ய வேண்டும் என கேரள அரசு மறுசீராய்வு மனுதாக்கல் செய்தது. இந்த மனு இன்று (டிசம்பர் 03ம் தேதி ) விசாரணைக்கு வந்தது.
மனுவை விசாரித்த சுப்ரீம் கோர்ட் நீதிபதிகள், முல்லை பெரியாறு அணையின் நீர்மட்டத்தை குறைக்கக் கோரி கேரள அரசு தாக்கல் செய்துள்ள மனு விசாரணைக்கு ஏற்றுக் கொள்ள முடியாது. அணையின் நீர்மட்டத்தை குறைப்பதற்கு ஏற்ற முகாந்திரம் ஏதும் மனுவில் இல்லை. அதனால் அணையின் நீர்மட்டத்தை உயர்த்துவதற்காக பிறப்பிக்கப்பட்ட உத்தரவை திரும்பப் பெற முடியாது என தெரிவித்து, கேரள அரசு தாக்கல் செய்த மனுவை தள்ளுபடி செய்தது. மேலும், தமிழக அரசு அணையில் 142 அடிக்கு நீர் தேக்குவதற்கு எந்த தடையும் இல்லை என நீதிபதிகள் தீ்ர்ப்பளித்தனர்.
நன்றி தினமலர்

ரமணியன்