உலகின் சக்தி வாய்ந்த இந்தியப் பெண்கள்!

அமெரிக்காவிலிருந்து வெளியாகும் 'ஃபோர்ப்ஸ்' மாத இதழ் உலகின் சக்திவாய்ந்த 100 பெண்களை பட்டியலிட்டிருக்கிறது. அடிக்கடி இது போல ஏதாவது பட்டியல் வெளியிடுவது வெளிநாடுகளில் சகஜம்தான் என்றாலும் இந்த பட்டியல் நமக்குக் கொஞ்சம் சுவாரசியமானது. காரணம், இந்தியாவைச் சேர்ந்த மூன்று பெண்கள் இந்தப் பட்டியலில் உள்ளனர். ஆனால், மூவருமே அரசியல்வாதிகள் அல்ல என்பதுதான் கிரிஸ்ப்பான தகவல். இதற்கு முன்பாக சோனியா காந்தி அடிக்கடி இது போன்ற பட்டியல்களில் இடம் பிடிப்பார். இந்த முறை பட்டியலில் இடம்பெற்றவர்கள்,,,

1. அருந்ததி பட்டாச்சார்யா, 58 வயதில் ஸ்டேட் பாங்க் ஆப் இந்தியாவின் முதல் பெண் தலைவராகியுள்ளார். கொல்கத்தாவில் பிறந்தவர். உலகின் மிகப்பெரிய உள்நாட்டு வங்கிகளில் ஒன்றான ஸ்டேட் பாங்க்கினை நிர்வகிக்கிறார். 100 கோடிக்கு மேல் மக்கள் உள்ள நாட்டின் மிகப்பெரிய வங்கியைத் திறம்பட நடத்துவது மிகச் சவாலான காரியம் என்றும் குறிப்பிடுகிறார்கள். உலகத்தர வரிசையில் 36வது இடத்தில் இருக்கிறார்.

2. சந்தா கோச்சார், இந்தியாவின் மிகப்பெரிய தனியார் வங்கியான ஐசிஐசிஐ வங்கியின் தலைவராக உள்ளார். 2005-ம் ஆண்டு முதலே ஃபோர்ப்ஸின் பல்வேறு பட்டியல்களில் இடம்பெற்று வந்த சந்தா 2009ல் போடப்பட்ட இதே பட்டியலில் 14வது இடத்திலிருந்தார். பின்னர் ஏற்பட்ட பொருளாதார சீர்குழைவினால் 2011ல் 93வது இடத்துக்குத் தள்ளப்பட்டார். கடந்த இரண்டு வருடங்களாக பட்டியலுக்குள் வரவே இயலவில்லை. இந்த ஆண்டு அதிரடியாக 43வது இடத்தைப் பிடித்துள்ளார்.

3 கிரண் மஸூம்தார். பயோகான் நிறுவனத்தின் அதிபர். வெறும் 10,000 ரூபாயில் 1978ல் கடுமையான சட்ட திட்டங்கள் நிலவிய காலக்கட்டத்தில் பப்பாளியில் இருந்து பெப்சினை பிரித்தெடுக்கும் நிறுவனமாக சின்ன இடத்தில் தொழில் துவங்கினார். 2011ல் உலகின் குறிப்பிடத் தகுந்த 100 நபர்களில் ஒருவராக டைம் மேகஸின் இவரைக் குறிப்பிட்டிருந்தது. தற்போது வலிமையான பெண்கள் பட்டியலில் 92வது இடத்தில் இவரைக் குறிப்பிட்டிருக்கிறது ஃபோர்ப்ஸ் பத்திரிகை.

நன்றி:விகடன்

அருமை தாய்குலமே!