அறிமுகம்

Ponmudi Manohar · Ponmudi Manohar Tue Nov 25, 2014 7:16 pm

மனக்கிளறல்கள் அப்போது
எனைத் தூண்டியது
வாழ்த்து மலர் பூத்திட
மகிழ்ச்சி கொண்டேன்
உணர்வோடு கலந்தால்
நிறைவோடு நிற்கலாம்
உள்ளத்தோடு ஒன்றினால்
உணர்வோடு எழலாம்
உறவை அதில் காணலாம் .
பார்வையை எனக்குள்ளே வைத்து
போலியாய் போர்த்திடாமல்
மணியாய் கோர்த்திட
பொழுதோ அர்த்தஜாமம் என்றாலும்
வார்த்தைகளை அர்த்தத்தோடு
வார்த்திட்டேன் அளவோடு
அகலா விழிகளில் விழிக்கின்றன
எழுத்தின் ஒளி முகங்கள்.
அன்பே, உனக்காக எழுதினேன்
என்னிலிருந்து எழுந்ததை.
தழுவலென நீ நினைப்பதை
உணர்கிறேன் உன் அசைவில்.
தழுவல் என்று நினைத்ததில்
உன் கவிதை நயம் புரிகிறது
மகிழ்கிறேன் இப்போது எனக்குள்ளே
என் வார்த்தைகளின் தரமறிந்து.
நேற்று தானே அறிமுகமானோம்
அந்தரங்கங்கள் வெளியரங்கமாகாத
மொட்டுப் பருவ இளமையல்லவா?
காலம் கனியும் போது
என்னை நீயே அறிவாய்
உனக்கு நானும் அறிமுகமாவேன்
அதுவரையிலும்,
என் பாடல்களை கேட்டுக்கொண்டிரு
பாடலின் தாளம் மாறும் போது
ஆன்மாவின் ராகமாய் நீயும் மாறும் போது
என்னை யார் என்று அறியக்கூடும்
மறுமுறையும் நமக்குள்
நாம் அறிமுகமாவோம்.