இறுதித் தீர்ப்புக்குப் பிறகே மின் கட்டண உயர்வு: உயர் நீதிமன்றம் உத்தரவு

**ayyasamy ram** · **ayyasamy ram** Tue Nov 11, 2014 8:36 am

-

தமிழகத்தில் மின் கட்டணத்தை உயர்த்துவது தொடர்பான தமிழ்நாடு மின்சார ஒழுங்குமுறை ஆணையத்தின் முடிவு உயர் நீதிமன்றத்தின் இறுதித் தீர்ப்புக்கு கட்டுப்பட்டதாகும் என சென்னை உயர் நீதிமன்றம் தெரிவித்துள்ளது.

இது தொடர்பாக மூத்த வழக்குரைஞர் ஆர்.காந்தி உயர் நீதிமன்றத்தில் தாக்கல் செய்த பொது நல மனு விவரம்:

தமிழகத்தில் தற்போது உள்ள மின் கட்டணத்தைத் திருத்தியமைப்பது தொடர்பாக கடந்த செப்டம்பர் மாதம் 23-ஆம் தேதி தமிழ்நாடு மின்சார ஒழுங்கு முறை ஆணையத்தின் இணையதளத்தில் பொது அறிவிப்பு வெளியானது.

அது தொடர்பாக பொதுமக்கள் தங்களுடைய கருத்துகளைத் தெரிவிப்பதற்கு அக்டோபர் 31-ஆம் தேதி வரை அவகாசம் அளிக்கப்பட்டது. மின் கட்டணத்தை நிர்ணயம் செய்வது தொடர்பாக மின்சாரச் சட்டம் 2003 இயற்றப்பட்டது. அதன்படி, மின் கட்டணத்தை மாநில அரசு மாற்றியமைக்கும்.

இந்த ஆண்டு, மின் கட்டணத்தை 15 முதல் 30 சதவீதம் வரை உயர்த்துவதற்கு மின்சார ஒழுங்குமுறை ஆணையம் முடிவு செய்துள்ளது. ஓய்வு பெற்ற நீதிபதிகள் அல்லாத நபர் மின்சார ஒழுங்கு முறை ஆணையத்தின் தலைவராக இருக்கக் கூடாது என்பது தொடர்பான வழக்குகள் உச்ச நீதிமன்றத்திலும், உயர் நீதிமன்றத்திலும் நிலுவையில் உள்ளன.

அவ்வாறு இருக்கும்போது, மின்சார ஆணையம் தானாக முன்வந்து மின் கட்டணத்தை உயர்த்த முடிவு செய்துள்ளது. கடந்த 7 ஆண்டுகளாகத் தமிழகத்தில் 40 சதவீத மின் வெட்டு தொடர்ந்து நிலவுகிறது.

2013-14 ஆம் ஆண்டில் யூனிட்டுக்கு ரூ.3.10 என்ற விலையில் 4,453 மில்லியன் யூனிட் மின்சாரத்தை வாங்காமல், தனியார் நிறுவனத்திடமிருந்து யூனிட் ஒன்றுக்கு ரூ.11 முதல் ரூ.15-க்கு தமிழக அரசு வாங்கி வருகிறது.

இதன்மூலம், தமிழக அரசுக்கு ரூ.3,022 கோடி இழப்பு ஏற்பட்டுள்ளது. இந்த ஆண்டும் அதே நடவடிக்கையைத் தமிழக அரசு மேற்கொண்டுள்ளது. இந்த இழப்பீட்டை மின் கட்டணத்தை உயர்த்தி அதன் மூலம் சரி செய்ய அரசு முயற்சி செய்கிறது.

மேலும், மின் திருட்டை மின் வாரியமே அனுமதிக்கிறது. அதிகாரத்தைத் தவறாகப் பயன்படுத்துவதால் அதிக இழப்பு ஏற்படுகிறது. இதைச் சரி செய்தால் கட்டண உயர்வு செய்ய வேண்டிய அவசியம் ஏற்பட்டிருக்காது.

மின்சார ஒழுங்குமுறை ஆணையம் நஷ்டம் ஏற்படுவதற்கான காரணத்தை அறியாமல் அமைதியாக இருக்கிறது. மின் கட்டண உயர்வு குறித்து திருநெல்வேலி, ஈரோடு மாவட்டங்களில் கருத்துக் கேட்புக் கூட்டம் நடத்தப்பட்டது. ஆனால், அதில் வெளிப்படைத் தன்மை இல்லை.

எனவே, மின் கட்டண உயர்வு தொடர்பான மின்சார ஒழுங்கு முறை ஆணையத்தின் நடவடிக்கைக்குத் தடை விதிக்க வேண்டும் என மனுவில் கோரப்பட்டது.

இந்த மனு தலைமை நீதிபதி எஸ்.கே.கெளல், நீதிபதி எம்.சத்தியநாராயணன் ஆகியோர் அடங்கிய முதன்மை அமர்வு முன் திங்கள்கிழமை விசாரணைக்கு வந்தது. மனுவை விசாரித்த நீதிபதிகள், மனுவுக்கு மூன்று வாரங்களுக்குள் பதில் அளிக்குமாறு தமிழ்நாடு மின்சார ஒழுங்குமுறை ஆணையம், தமிழ்நாடு மின்சார உற்பத்தி-மின் பகிர்மானக் கழகம் ஆகியவற்றுக்கு நோட்டீஸ் அனுப்ப உத்தரவிட்டனர். மேலும், மின்சார ஒழுங்குமுறை ஆணையம் எடுக்கும் எந்த முடிவும் நீதிமன்றத்தின் இறுதித் தீர்ப்புக்கு கட்டுப்பட்டது எனத் தெரிவித்தனர்.
--
--தினமணி

இறுதித் தீர்ப்புக்குப் பிறகே மின் கட்டண உயர்வு: உயர் நீதிமன்றம் உத்தரவு

இறுதித் தீர்ப்புக்குப் பிறகே மின் கட்டண உயர்வு: உயர் நீதிமன்றம் உத்தரவு

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக