தனியார் நிறுவனங்களின் ஆதிக்கத்தால் கறிக்கோழி தொழில் முடங்கும் அபாயம் பண்ணை உரிமையாளர்கள் பாதிப்பு

கடையம், : தனியார் நிறுவனங்களின் ஆதிக்கத்தால் முடங்கி வரும் கோழி வளர்ப்புத் தொழிலை அரசு தலையிட்டு முறைப்படுத்த வேண்டும் என கோழி பண்ணையாளர்கள் அரசுக்கு கோரிக்கை விடுத்துள்ளனர்.
தமிழகத்தில் கறிக்கோழி உற்பத்தியில் நாமக்கல், பல்லடத்திற்கு அடுத்த படியாக நெல்லை மாவட் டம் சங்கரன்கோவில், தென்காசி, வள்ளியூர் பகுதிகளில் கறிக்கோழி வளர்ப்புப் பண்ணைகள் அதிகம் உள்ளன. இங்குள்ள பண்ணையாளர்கள் 90 சதவிகிதத்திற்கு மேல் தனியார் நிறுவனங்களுடன் ஒப்பந்த அடிப்படையில் கோழி வளர்த்து வருகின்றனர்.
தனியார் நிறுவனங்கள், பண்ணையாளர்களுடன் ஒப்பந்தம் செய்து கொண்டு ஒரு நாள் வயதுடைய குஞ்சுகளை கொடுக்கின்றன. பின்னர் அதற்குரிய தீவனம் மற்றும் மருந்து பொருட்களும் கொடுத்து தினமும் அவர்களின் மேற்பார்வையில் கோழிகளை வளர்த்து வருகின்றனர். பின் 40 நாளிலிருந்து 50 நாட்களுக்குள் அந்தந்த நிறுவனங்களே கோழிகளை எடை அடிப்படையில் வாங்கிச் செல்வார்கள். பண்ணையாளர்களுக்கு கோழி களின் வளர்ச்சிக்கு ஏற்ப கூலியை நிறுவனங்கள் வழங்கும்.
தற்போது இந்த நிறுவனங்கள் கோழி விலையின் ஏற்ற, இறக்கத்தைத் தடுப்பதற்காக மாதத்திற்கு 10 நாட் கள் வரை கோழிக்குஞ்சு உற்பத்தியை நிறுத்தி வைத்து போலியாக தட்டுப்பாட்டை உண்டாக்குகின்றன. இதனால் 1வருடத்திற்கு 6 முறை கோழி வளர்க்கத் தகுதியுள்ள பண்ணையாளர்களுக்கு பற்றாக்குறையைக் காரணம் காட்டி 3 முதல் 4 முறை மட்டுமே கோழிக்குஞ்சுகளை வழங்கி வருகின்றனர்.
மேலும், 10 ஆயிரம் கோழி வளர்க்கத் தகுதியுள்ள பண்ணைகளுக்கு 5 முதல் 6 ஆயிரம் கோழிக்குஞ்சுகளை மட்டுமே கொடுக்கின்றனர். இதனால், பண்ணையாளர்கள் மற்றும் தொழிலாளர்கள் பெரிதும் பாதிப்படைந்துள்ளனர். எனவே, அரசு நடவடிக்கை எடுத்து கோழிப்பண்ணை தொழிலை பாதுகாக்க நடவடிக்கை எடுக்க வேண்டும் என பண்ணையாளர்கள் கோரிக்கை விடுத்துள் ளனர்.
முறைப்படுத்த அரசு நடவடிக்கை எடுக்குமா?
கடையம் பகுதியில் உள்ள கோழிப்பண்ணையில் நெல் உலர வைத்து மூட்டையாகக் கட்டி வைத்துள்ளனர்.
மானியத்தை இழக்கும் பரிதாபம்
தனியார் நிறுவனங்கள் கோழிக்குஞ்சுகளை தொடர்ச்சியாக வழங்காததால் கோழிப் பண்ணைகளை பல்லாரி குடோனாகவும், நெல் உலர வைக்கும் களமாகவும் பயன்படுத்தி வரும் அவலம் உருவாகியுள்ளது. இதற்கிடையில், கோழி வளர்ப்புத் தொழிலை ஊக்குவிக்க வங்கி மூலம் அரசு 50 சதவிகித மானியத்துடன் கடனுதவி வழங்கி வருகிறது. ஆனால், தொடர்ச்சியாக கோழி வளர்ப்புத் தொழில் இல்லாததால் கடன் தவணையைக் கட்ட முடியாமல் மானியத்தை இழக்கும் நிலைக்கு கோழிப் பண்ணை உரிமையாளர்கள் தள்ளப்பட்டுள்ளனர்.
நன்றி
தினகரன்