நாடு தழுவிய மொபைல் சேவை மாற்ற வசதி: மே மாதத்துக்குள் நடைமுறைப்படுத்த மத்திய அரசு கெடு

-
தொடர்பு எண்ணை மாற்றாமலேயே நாட்டின் எந்தவொரு பகுதியில் இருக்கும் வட்டத்துக்கும் விரும்பிய தொலைத்தொடர்பு நிறுவன சேவைக்கு சந்தாதாரர் மாறிக் கொள்ளும் வசதியை அடுத்த ஆண்டு மே மாதத்துக்குள் நடைமுறைப்படுத்த வேண்டும் என்று அனைத்து தனியார் தொலைத்தொடர்பு நிறுவனங்களுக்கு மத்திய அரசு இறுதிக் கெடு விதித்துள்ளது.

மத்தியில் காங்கிரஸ் தலைமையிலான ஐக்கிய முற்போக்குக் கூட்டணி அரசு ஆட்சியில் இருந்தபோது "நம்பர் போர்ட்டபிளிட்டி' எனப்படும் விரும்பிய தொலைத் தொடர்பு நிறுவன சேவைக்கு சந்தாதாரர் மாறிக் கொள்ளும் வசதி அறிமுகப்படுத்தப்பட்டது.

இதன்படி, ஒரு மாநிலம் அல்லது நகரில் செயல்படும் தொலைத் தொடர்பு நிறுவனத்தின் சேவையைப் பெறும் சந்தாதாரர் தனது செல்போன் தொடர்பு எண்ணை மாற்றாமல், வேறு நிறுவனத்தின் சேவையைப் பெற விண்ணப்பித்தால் அதற்கான நடவடிக்கையை அதுவரை சேவை அளித்து வந்த செல்போன் நிறுவனம் மேற்கொள்ள வேண்டும்.

ஆனால் இந்த வசதி, குறிப்பிட்ட தொலைத் தொடர்பு வட்டத்திற்குள் மட்டுமே நிறைவேற்ற முடியும் என்ற வரம்பை தொலைத் தொடர்பு நிறுவனங்கள் வகுத்துக் கொண்டன. உதாரணமாக, தில்லி தொலைத் தொடர்பு வட்டத்தில் பயன்படுத்தப்பட்ட செல்போன் எண்ணை தமிழகத்தில் உள்ள தொலைத் தொடர்பு வட்டத்துக்கு மாற்றிக்கொள்ள முடியாத நிலையே இருந்தது. ஆனால், தொலைத் தொடர்பு ஒழுங்குமுறை ஆணையத்தின் வழிகாட்டுதலின்படி நாடு முழுவதும் உள்ள தொலைத் தொடர்பு வட்டங்களில் சேவையைப் பெற செல்போன் எண் கட்டுப்பாடு ஏதும் இல்லை.

இதை முழுமையாகக் கடைப்பிடிக்க தொலைத் தொடர்பு நிறுவனங்களுக்கு மத்திய தொலைத் தொடர்புத் துறை பல முறை அறிவுரை வழங்கியும் அவை போதிய ஆர்வம் காட்டவில்லை.

இதையடுத்து, அனைத்து தனியார் செல்போன் தொலைத் தொடர்பு சேவை வழங்கும் நிறுவனங்களுக்கு அண்மையில் மத்திய தொலைத் தொடர்புத் துறை கடிதம் அனுப்பியுள்ளது. அதில், "நம்பர் போர்ட்டபிளிட்டி வசதியை நாட்டில் உள்ள 22 தொலைத் தொடர்பு வட்டங்களுக்கும் மாற்றிக் கொள்ளும் வசதியை சந்தாதாரரின் விருப்பத்துக்கு ஏற்ப அளிக்க வேண்டும்.

இது தொடர்பான உத்தரவு 2009-இல் பிறப்பிக்கப்பட்டாலும் அதை சில நிறுவனங்கள் சரியாக அமல்படுத்தவில்லை. எனவே, இதை கடைசி அறிவுறுத்தலாகக் கருதி முழுமையாக நம்பர் போர்ட்டபிளிட்டி சேவை திட்டத்தை அமல்படுத்த வேண்டும். இந்த வசதியை முழுமையாக செய்யும் நடவடிக்கையை மேற்கொள்ள வரும் மே மாதம் வரை கடைசி வாய்ப்பாக அவகாசம் அளிக்கப்படுகிறது' என குறிப்பிடப்பட்டுள்ளது.
----
-
தினமணி