நேதாஜியின் உதவியாளரும், நேருவின் நண்பருமான ஏ.சி.என். நம்பியார் ஒரு சோவியத் உளவாளி!

நேதாஜியின் உதவியாளரும், நேருவின் நண்பருமான ஏ.சி.என். நம்பியார் ஒரு சோவியத் உளவாளி: இங்கிலாந்து ஆவணத்தில் பரபரப்பு தகவல்கள் !



லண்டன்,

சுதந்திர போராட்ட வீரர் நேதாஜி சுபாஷ் சந்திரபோஸின் உதவியாளரும், பண்டிட் ஜவஹர்லால் நேருவின் பழைய நண்பருமான முன்னாள் இந்திய தூதர் ஏ.சி.என். நம்பியார் ஒரு சோவியத் உளவாளி என பரபரப்பு தகவல்
வெளியாகியுள்ளது.

லண்டனிலுள்ள தேசிய ஆவணப் பாதுகாப்பகத்தில் உள்ள ஒரு ஆவணத்தில் கீழ்க்கண்டவாறு விளக்கப்பட்டுள்ளது:-

கடந்த 1924-ஆம் ஆண்டு ஒரு பத்திரிகையாளராக நம்பியார் பெர்லின் நகரத்திற்கு சென்றார். அங்கு இந்திய கம்யூனிஸ்டுகளுடன் இணைந்து பணியாற்றினார். அதன்பிறகு, 1929 ஆம் ஆண்டு சோவியத் சிறப்பு விருந்தினராக மாஸ்கோவிற்கு சென்றார். இரண்டாம் உலகப்போர் நடந்த சமயத்தில் நம்பியார் ஜெர்மனியிலிருந்து வெளியேற்றப்பட்டார். ஆனால், அதற்கு பிறகு சுபாஷ் சந்திர போஸின் உதவியாளராக பெர்லினுக்குள் அனுமதிக்கப்பட்டார். இதற்கு பிறகு, அவர் ஜெர்மனியின் நிதியுதவியை பெற்ற தலைவராக மாறிவிட்டார். அதன்பிறகு, 1945-ல் ஆஸ்திரியாவில் கைது செய்யப்பட்டார்.

போருக்கு பிறகு, பெர்னேவிலுள்ள இந்திய குழுவிற்கு ஆலோசகராகவும், ஸ்காண்ட்நேவியாவின் இந்திய தூதராகவும், அதற்கு பிறகு, மேற்கு ஜெர்மனியின் இந்திய தூதராகவும் பணியாற்றியிருக்கிறார். கடைசியாக, இந்துஸ்தான் டைம்ஸ் பத்திரிகையின் ஐரோப்பிய நிருபராகவும் பணியாற்றியுள்ளார். 1959-ஆம் ஆண்டு இவர் ஒரு சோவியத் உளவாளி என தகவல்கள் வெளியானது. இவர் 1920 முதலே சோவியத் ஜி.ஆர்.யு-வின் ஏஜெண்டாக இருந்து வந்ததாக தகவல் அதிலுள்ளது. இரண்டாம் உலகப்போரில் சரண்டரான யூ-போட் 234 ஜெர்மனி நீர்மூழ்கி கப்பலிலிருந்து மீட்கப்பட்ட கைப்படுத்தப்படாத கோப்புகளில் நம்பியார் சுபாஷ் சந்திர போசுக்கு அனுப்பிய கடிதங்களும் இணைக்கப்பட்டுள்ளன.

இவ்வாறு அந்த ஆவணத்தில் குறிப்பிடப்பட்டுள்ளது.

தினத்தந்தி