சிறகின் சப்தமல்ல நீ கேட்டது...

**ayyasamy ram** · **ayyasamy ram** Fri Oct 10, 2014 9:12 am

சென்ற வாரத்தின்
ஓர் அதிகாலை நேரம்
'விர்ர்' என்று என் செவியைக்
கடந்து போன சப்தம்
நிச்சயமாய்
அந்தப் பறவையின் சிறகுடையதல்ல
-
கருப்பில் நீலம் கலந்திருந்த பெருவானில்
அப்பறவை சிறகடித்த நொடியில் தெரிந்தது
காற்றின் இருப்பு
-
லிபிகளில் அடக்க முடியாத அதன் வார்த்தைகள்
துண்டுகளாய் ஒலித்து
அடுத்த நொடியில் மறைகின்றன
ஞாலத்தின் வெற்றிடமெங்கும்
-
இருண்ட வானத்தின் ஓர் இலையுதிர்நாளில்
வேட்டைக்காரன் ஒருவனின் பூட்ஸ் கால்கள்
சருகுகளை மிதித்துக் கடக்கும் தருணம்
காற்றின் வார்த்தைகள் வேறு மொழி கொள்கின்றன
-
பகலெல்லாம் நகரத்தை நிரப்பி வழிக்கும் வாகனங்கள்
தங்கள் கழிவுகளைக் காற்றின் மடியேற்ற
அதன் புழுதி துடைத்து அழுக்காகும் இலைகளிடம்
இரவெல்லாம் தனது மன்னிப்பைக் கோருகிறது
-
பறவைகளுக்கும் இலைகளுக்கும் பதில்
சொல்கிற காற்றின் மொழியை எழுதிக்காட்ட
பேனாவை எடுத்த நான் ஒரு முட்டாள்...!
-
----------------------------
>கவிஞர் பா.மீனாட்சிசுந்தரம்
நன்றி: ஓம் சக்தி - மாத இதழ்

_________________