கருஞ்சிகப்பு வண்ணத்தில் சந்திரன் தோற்றம்: கடலோர பகுதிகளில் மாலை பார்க்கலாம்

சென்னை: இந்த ஆண்டின் இறுதி சந்திர கிரகணம் இன்று நடக்க உள்ளது. கிரஹணத்தின் போது, சந்திரன் கருஞ்சிவப்பு தோற்றத்தில் காட்சியளிக்கும். தமிழகத்தில், சென்னை உள்ளிட்ட கடலோர பகுதிகளில் இன்று மாலை கிரகணத்தை பார்க்க முடியும் என கூறப்படுகிறது.
சந்திரன், பூமி, சூரியன் நேர்கோட்டில் வரும்போது கிரகணங்கள் ஏற்படுகின்றன. இந்த ஆண்டிற்கான கடைசி சந்திர கிரகணம் இன்று நடக்கிறது. இந்த கிரகணத்தை அமெரிக்காவின் அனைத்து பகுதிகளில் இருந்தும் பார்க்கலாம். வட அமெரிக்கா, ஆஸ்திரேலியா, தென் அமெரிக்கா மற்றும் சில தெற்காசிய நாடுகளிலும் கிரஹணம் தெரியும்.
இந்தியாவில்...:

இன்றைய பூர்ண சந்திர கிரகணத்தை இந்தியாவிலும் பார்க்க முடியும். இந்தியாவை பொறுத்த வரையில், இன்று மாலை 2.45 மணிக்கு சந்திர கிரகணம் துவங்குகிறது. மாலை 6.05 மணிக்கு முடிவடைகிறது. சென்னை உள்ளிட்ட கடலோர பகுதிகளில் மாலை 5 மணிக்கு மேல் சந்திர கிரகணத்தை பார்க்க முடியும் என்று கூறப்படுகிறது.
கருஞ்சிவப்பு:

பொதுவாக, கிரகணத்தின் போது சந்திரன் இளம் கறுப்பாக காட்சியளிக்கும். ஆனால், இன்றைய கிரகணத்தின் போது, சந்திரன் கருஞ்சிவப்பாக காட்சி தரும் என்று விஞ்ஞானிகள் தெரிவித்துள்ளனர். பூமியின் நிழலை சந்திரன் கடக்கும் போது இந்த நிற மாறுபாடு ஏற்படும் என அவர்கள் விளக்கி உள்ளனர். இது குறித்து நாசா விஞ்ஞானி ஒருவர் கூறுகையில், 'சில நாடுகளில் சூரிய உதயத்தின் போதும், சில நாடுகளில் அஸ்தமனத்தின் போதும் சந்திர கிரகணத்தை காண முடியும். இம்முறை சந்திரன் முழுவதுமாக நிழலில் மறையும் என்பதால், இது ஆய்வுக்கு உகந்ததாகும். இந்த சந்திர கிரகணம், ஐரோப்பா, ஆப்ரிக்கா மற்றும் மத்திய கிழக்கு நாடுகளில் தெரியாது,' என்றார்.
நாசா ஆய்வு:

இன்றைய சந்திர கிரகணத்தை அமெரிக்க விண்வௌி ஆய்வு மையமான நாசா ஆய்வு செய்கிறது. இன்றைய கிரகணத்தின் போது ஏற்படும் இயற்கை மாற்றங்கள் குறித்து விஞ்ஞானிகள் ஆய்வுகள் மேற்கொள்ள உள்ளனர். இந்தியாவிலும் ஆய்வுகள் மேற்கொள்ளப்பட உள்ளன.

நன்றி : தினமலர்