அமைதியினை முகிழவைப்போம்

karaumalaithamizhazhan · karaumalaithamizhazhan Thu 18 Sep 2014 - 14:03

  அமைதியினை   முகிழவைப்போம்

                                 பாவலர் கருமலைத்தமிழாழன்

            வீதிகோர்   தெய்வமென்று   வைத்துக்   கொண்டு
                        வீரத்தைக்   காட்டியின்று   வேறு   பட்டார்
            சாதிகோர் தெய்வமென்று    வைத்துக்   கொண்டு
                        சச்சரவைப்   பெருக்கியின்று    பகைவ   ரானார்
            சாதிக்கும்   சாதனையாய்க்   கோயில் முன்பு
                        சண்டையிட்டு   மண்டைகளை   உடைத்துக்   கொண்டு
            நீதிமன்றப்   படிகளிலே   நாளு   மேறி
                        நீதிபதி   தீர்ப்புக்காய்க்   காத்து   நின்றார் !

            எல்லோர்க்கும்    பொதுவென்னும்   இறைவ னுக்கே
                        எல்லைகளை   வகுத்துவைத்துப் பிரிவு   செய்தார்
            பொல்லாத தீண்டாமைச்   சுவரெ   ழுப்பிப்
                        பொழுதிற்கும்   தடிகளுடன்   காவல்   காத்தார்
            கல்லாத   மூடர்போல்   அறிவு மின்றிக்
                        கற்றவரும்   வேற்றுமையை   வளர்க   லானார்
            இல்லாத சாதிஇந்து   தலித்க   ளென்றே
                        இயற்கையான   பிறப்புகளை   இழிவு   செய்தார் !

            மதங்களிலே   அரசியல்தான்   கலந்த   தாலே
                        மனிதநேயம்   வளர்த்துவந்த   மதங்க ளெல்லாம்
            மதவெறியை   வளர்க்கின்ற   மன்ற மாகி
                        மனிதத்தை   மாய்க்கிறது   நாளு மிங்கே
            விதவிதமாய்   வெடிகுண்டை வெடிக்க வைத்தே
                        விளைபயிராய்ப்   பயங்கரத்தை விளைக்கு திங்கே
            முதலில்நாம்   மதங்களற்ற   மனித ராவோம்
                        முகிழவைப்போம்   அமைதியினை ஒன்றாய் சேர்ந்தே !

                              **********************

**M.Saranya** · **M.Saranya** Thu 18 Sep 2014 - 18:07

நல்ல கருத்துள்ள கவிதை தந்தமைக்கு நன்றி

அமைதியினை முகிழவைப்போம்

அமைதியினை முகிழவைப்போம்

Re: அமைதியினை முகிழவைப்போம்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக