ஆண்ட்ரியாஸ் வெசாலியஸ் - Andreas Vesalius

**சிவா** · **சிவா** Sun Sep 14, 2014 12:30 am

31 டிசம்பர் 1514 – 15 அக்டோபர் 1564

இன்றைக்கு மருத்துவமும், விஞ்ஞானமும் எவ்வளவோ முன்னேறி உள்ளன. தொழில்நுட்ப வளர்ச்சியற்ற அக்காலத்தில் மருத்துவம் செய்த மருத்துவர்களின் பணி மகத்தானதாகும். அன்றைய மருத்துவர்கள் செய்த ஆராய்ச்சிகளும் அதன் முடிவுகளும் இன்று பயிற்சி செய்யும் மருத்துவர்களுக்குப் பேருதவியாக விளங்குகின்றன.

நாம் அதிகம் அறிந்திராத ஒரு சிறந்த மருத்துவ விஞ்ஞானியே "ஆண்ட்ரியாஸ் வெசாலியஸ்' ஆவார். ஆண்ட்ரியாஸ் 1514-ஆம் ஆண்டு பெல்ஜியம் நாட்டின் ப்ரசெல்ஸ் நகரில் ஒரு மருந்தாளுநரின் மகனாகப் பிறந்தார். தந்தையின் வற்புறுத்தலால் மருத்துவம் பயின்றார். 1537-ஆம் ஆண்டு "பதுவா' பல்கலைக்கழகத்தில் மருத்துவப் பேராசிரியராகப் பணிபுரிந்தார்.

பல நூற்றாண்டுகளுக்கு முன் வாழ்ந்த கிரேக்க நாட்டு விஞ்ஞானி "கேலன்' என்பவர் பன்றிகள் மற்றும் மனிதக் குரங்குகளை அறுத்து, உடற்கூறு இயல் பற்றி விளக்கி இருந்தார். ஏனெனில் விஞ்ஞானிகள் விலங்குகளின் உடல் உறுப்புகள் போலவே மனிதனின் உடல் உறுப்புகளும் இருக்கும் என நம்பினர். மேலும் மனித உடலை அறுத்துப் பார்க்கத் துணியவில்லை. அந்த மாதிரி செய்கை அப்போது நினைத்துக்கூட பார்க்கமுடியாத நிலையில் இருந்தது..

கேலனின் ஆராய்ச்சிகளால் திருப்தி அடையாத ஆண்ட்ரியாஸ் ரகசியமாக இரவு நேரங்களில் பிணங்களை அறுத்து மனித உடலின் ரத்தக்குழாய்கள், தசைகள், ஜீரண உறுப்புகள் ஆகியவை பற்றித் தெரிந்து கொண்டார்.

இவருக்கு ஜெர்மனி நாட்டின் ஓவியர் ஜான் ஸ்டீபன் என்பவர் தத்ரூபமாக மனித உடற்கூறு இயல் பற்றிய படங்களை வரைந்து கொடுத்தார்.

இதனால் 1543-ஆம் ஆண்டு ஆண்ட்ரியாஸ், "டி ஹியுமானி கார்போரிஸ் ஃபேப்ரிகா' என்ற புத்தகத்தை வெளியிட்டார். இதுவே மனித உடற்கூறு இயல் பற்றித் தெளிவாக விளக்கிய முதல் ஆவணமாகும்.
ஆனால் இவர் அந்நாளைய மருத்துவர்களின் கண்டனத்திற்கு ஆளானார். ஏனெனில் அந்நாள்களில் பிணங்களை அறுப்பது மத நம்பிக்கைக்கு விரோதமாகக் கருதப்பட்டது. எனவே அவர் தமது வேலையை ராஜிநாமா செய்துவிட்டு ஸ்பெயின் நாட்டு மன்னர் ஐந்தாம் சார்லஸýக்கும், பின்னர் அவரது மகன் இரண்டாம் பிலிப்புக்கும் குடும்ப மருத்துவராகப் பணியாற்றினார்.

ஆண்ட்ரியாஸின் ஆராய்ச்சி மூலம்தான் ரத்தம், இதயத்தால் "பம்ப்' செய்யப்பட்டு உடலின் பல பாகங்களுக்கும் தமனி, சிரை என்ற இரு ரத்தக் குழாய்களால் எடுத்துச் செல்லப்படுகிறது என்ற கருத்து தெளிவாகியது. இதையே பின்னர் 17-ஆம் நூற்றாண்டில் ஆய்வு செய்த மருத்துவர் "வில்லியம் ஹார்வி' உறுதி செய்தார்.

இவர் 1563-ஆம் ஆண்டு டிசம்பர் மாதம் ஜெருசலேமிற்குப் புனிதப் பயணம் மேற்கொண்டார். 1564-ஆம் ஆண்டு அங்கிருந்து திரும்பி வரும் வழியில் உடல் நலக் குறைவால் மரணமடைந்தார்.

இன்றளவும் பிணங்களை அறுக்கும் "போஸ்ட் மார்ட்டம்' துறையில் பயன்படுத்தப்படும் பெரும்பாலான கருவிகள் இவரால் வடிவமைக்கப்பட்டவை என்பது குறிப்பிடத்தக்கது.