இன்று உலக முதலுதவி தினம் !

உலக அளவில் முதலுதவி குறித்து விழிப்புணர்வு ஏற்படுத்த ஆண்டுதோறும் செப்டம்பர் இரண்டாவது சனிக்கிழமையை உலக முதலுதவி தினமாக கடைபிடிக்கப்படுகிறது.

வெளிநாடுகளில் ஓட்டுனர் உரிமம் பெறுவதற்கு கட்டாயம் முதலுதவி பயிற்சி சான்று பெறவேண்டும். இதற்காகவே பயிற்சி தரும் நிறுவனங்கள் உள்ளன. இன்று முதலுதவியின் அவசியம் குறித்து அனைவரும் தெரிந்திருந்தாலும், யாரிடம் பயிற்சி பெறுவது என்ற விழிப்புணர்வு இல்லை. பள்ளிகளில் முதலுதவி குறித்து பாடத்திட்டங்கள் இருந்தாலும், அதை முறைப்படி கற்கும் வழிமுறைகள் இல்லை. இதனால் பள்ளி அளவில் முதலுதவி என்பது ஏட்டு கல்வியாகவே உள்ளது.

பிளாட்டினம் டென் : முன்பு விபத்து நடந்தவுடன் அடுத்த ஒருமணிநேரம் 'கோல்டன் ஹவர்' என அழைக்கப்படும். ஒரு மணி நேரத்திற்குள் பாதிக்கப்பட்டவரை மருத்துவமனைக்கு அழைத்துச் செல்வதையே இப்படி கூறினர். ஆனால், உலக சுகாதார அமைப்பு 'பிளாட்டினம் டென்' என அறிவித்தது. இதன்படி, விபத்து நடந்த 10 நிமிடத்திற்குள் பாதிக்கப்பட்டவரை மருத்துவமனைக்கு அழைத்துச் சென்று உயிரை காப்பாற்ற வேண்டும்.விபத்து நடந்த இடத்தில் குடியிருப்போர், நடந்து செல்வோர், கடை வைத்திருப்போர் ஆம்புலன்ஸ் வரும் வரை காத்திருக்காமல் பாதிக்கப்பட்டவருக்கு உடனடியாக முதலுதவி அளித்து உயிரை காப்பாற்ற வேண்டும் என்பதே 'பிளாட்டினம் டென்' னின் நோக்கம்.பொதுவாக, தலைக்காயம், விஷம், பாம்பு கடி, தீ போன்றவற்றால்தான் அதிக உயிரிழப்புகள் ஏற்படுகின்றன. அதிக ரத்தப்போக்கு, ரத்தத்தில் விஷத்தன்மை ஏறுதல் போன்ற காரணங்களே இறப்புக்கு காரணம்.

எப்படி முதலுதவி அளிப்பது?தலைக்காயம் அல்லது எந்த காயமும் ஏற்பட்டால், அந்த இடத்தை சுத்தமாக கழுவி, கட்டுபோட்டால் ரத்தபோக்கை தடுக்கலாம். தலைக்காயத்தால் மயக்கம் ஏற்பட்டால், அவரை குப்புற படுக்க வைத்தால் நாசி வழியாக ரத்தம் மூச்சுக்குழாய்க்குள் செல்வது தடுக்கப்படும். மயக்கமானவர்களுக்கு குடிநீர், சோடா கொடுக்கக்கூடாது.விஷம் குடித்தவர்கள் என்றால், நாமாக அந்த விஷத்தை வெளியேற்ற முயற்சிக்கக்கூடாது. அவர்கள் தானாக வாந்தி எடுத்தால் தலையை கீழ்நோக்கி அழுத்தி பிடிக்க வேண்டும். அப்போதுதான் விஷம் மூச்சுக்குழாய்க்குள் செல்வது தடுக்கப்படும். எவ்வகையான விஷத்தை குடித்தனர் என்பதை அறிந்து டாக்டரிடம் கூறினால் அதற்கேற்ப சிகிச்சை அளிக்க வசதியாக இருக்கும்.

சினிமா பாணி வேண்டாம்: பாம்பு கடித்தால் சினிமாவில் வருவது போல் கடிபட்ட இடத்தில் கீறியோ, கட்டுபோட்டோ ரத்தத்தை உறியக்கூடாது. அந்த விஷம் முதலுதவி செய்பவரின் வாயினுள் செல்லும் அபாயம் உண்டு. அதற்குபதில் கடிபட்ட இடத்தை கழுவி, அந்த இடத்தில் லேசாக கட்டுபோட்டு மருத்துவமனைக்கு அழைத்துச் செல்லலாம். எவ்வகை பாம்பு கடித்தது எனத்தெரிந்தால் சிகிச்சை அளிக்க உதவியாக இருக்கும்.தீக்காயம் ஏற்பட்டால், அதிக அழுத்தமின்றி தண்ணீர் விடவேண்டும். லேசான துணியால் காயம்பட்ட இடத்தை மூடி மருத்துவமனைக்கு அழைத்துச் செல்ல வேண்டும். தோலை பிய்க்கவோ, கொப்புளத்தை உடைக்கவோ முயற்சிக்கக்கூடாது. காயம்பட்ட இடத்தில் மை வைக்க கூடாது.இன்னும் முதலுதவிகள் நிறைய உள்ளன. அதற்காகதான் அரசின் '104' சேவை அறிமுகப்படுத்தப்பட்டது. பாதிப்பு குறித்து அந்த எண்ணில் போன் செய்தால், செய்ய வேண்டிய முதலுதவி குறித்து டாக்டர்கள் அறிவுரை வழங்குவர். அதை கேட்டு மருத்துவமனையில் சேர்க்கும் வரை வீட்டில் உள்ளவர்களே முதலுதவி செய்ய முடியும். 24 மணி நேரமும் இச்சேவை கிடைக்கிறது.ஒவ்வொருவரும் முதலுதவி பயிற்சி பெற '108' ஆம்புலன்ஸ்களை நிர்வகிக்கும் சென்னை எமர்ஜென்சி மேனேஜ்மென்ட் அண்ட் ரிசர்ச் இன்ஸ்டிடியூட் ஆண்டுதோறும் வாய்ப்பு வழங்குகிறது. பயிற்சி முடித்தபின் சான்றும் தருகிறது.எந்த உயிரையும் நமது உயிராக கருதி முதலுதவி அளித்தால் பாதிக்கப்பட்டவரின் குடும்பம் மட்டுமல்ல, இந்த சமூகமும் உங்களை பாராட்டும். நீங்கள் பாராட்டப்பட வேண்டாமா?
- ஜி. தணிகைவேல்முருகன்,

நல்ல பதிவு