ஏரிக்கு அடியில் மர்ம சத்தம்

அமெரிக்காவின் நியூயார்க் நகரில் இருக்கும் செனகா ஏரி அங்குள்ள மக்களுக்கு ஒரு புதிராகவே இருந்து வருகிறது.

100 வருடங்களுக்கும் மேலாகவே இந்த ஏரியில் இருந்து வெடிச்சத்தம் கேட்கிறது. ஒரு மைல் தொலைவில் நாட்டுத்துப்பாக்கி, அல்லது பீரங்கி சுடப்படும் ஓசையை அந்த ஏரி எழுப்புகிறது. ஏரியின் ஒரு பக்கத்தில் இருப்பவர்களுக்கு அந்த சத்தம் மறுபக்கத்தில் இருந்து வருவதைப்போல தோன்றும்.

படகில் செல்பவர்களுக்கோ கரை ஓரத்தில் இருந்து வருவதாக தெரியும். அந்த சத்தம் ஏற்பட்டதும் மீன் பிடித்துக் கொண்டிருந்த சில மீனவர்களை விசாரித்தபோது ஏரித்தண்ணீரில் அந்த வெடிச்சத்தம் கேட்டதாக தெரிவித்தனர். ஏரியின் அடியில் உள்ள களிமண் படுகைகளில் சிக்கி இருக்கும் காற்று வெளிக் கிளம்பி மிகுந்த வேகத்தோடு நில மட்டத்தை அடைந்து வெளியேறும்போது இத்தகைய வெடிசத்தம் ஏற்பட வாய்ப்பு உள்ளது. இத்தகைய வெடிச்சத்தம் ஏற்படும்போது ஏரி நீரில் வாயுக்கள் கிளம்புவதோ, நுரை ஏற்படுவதோ, அல்லது ஏரி நீர் பீய்ச்சி அடிப்பதோ இல்லை.

இதற்கு காரணம் வேகமான அளவு காற்று ஏரியின் அடிமட்டத்தில் ஏறத்தாழ 450 அடி ஆழத்தில் களிமண் படுகைகளில் நிலம் காற்றுக்கு வழி ஏற்படுத்திக்கொடுக்கிறது. அப்படி வெடிப்பது நீர் மட்டத்தில் அல்ல, ஏரியின் அடிப்பகுதியில். இதனால்தான் ஏரி நீரில் எந்தவித சலனமும் ஏற்படுவது இல்லை. சத்தம் மட்டுமே கேட்கிறது. ஏரியில் கேட்கும் வெடிச்சத்தம் பகல் நேரத்தில் மட்டும்தான் கேட்கிறது. இரவு நேரங்களில் கேட்பதில்லை. இந்த இடத்தில்தான் கேட்டது என்று நம்மால் உறுதியாக கூற முடியாது. வானவில்லின் அடிப்பகுதி இங்கேதான் இருக்கிறது என்று நம்மால் உறுதியிட்டு காட்ட முடியாதோ அப்படியே வெடிச்சத்தம் கேட்ட திசையையோ, இடத்தையோ சுட்டிக்காட்ட முடியாமல் மக்கள் திண்டாடுவர்.

1934-ம் ஆண்டுக்குப்பிறகு இத்தகைய வெடிச்சத்தங்கள் கேட்பது குறைந்து விட்டது. இதற்கு காரணம் என்ன?. நியூயார்க் நகரைச்சுற்றி உள்ள பல பகுதிகளிலும் வாயுக்கிணறுகள் தோண்டப்பட்டு உள்ளன. இதனால் நில வாயுக்களின் அழுத்தம் வெகுவாக குறைந்து விட்டிருக்கும். ஆகவே அதிக வாயுக்கள் இப்போது ஏரியிலிருந்து வெளியேறுவதில்லை.

ஏரியில் தோன்றிய வெடிச்சத்தத்தைப்போல் பூமிக்குள் இருந்தும் வெடிச்சத்தம் கேட்பது உண்டு. பிலிப்பைன்ஸ் தீவுகளில் அடிக்கடி இத்தகைய சத்தம் கேட்பது உண்டு. மார்ச், ஏப்ரல் மாதங்களில் விடிவதற்கு சிறிது நேரம் முன்பாகவும், அதேபோல் இருட்டுவதற்கு சிறிது நேரத்திற்கு முன்னாலும் இடிஇடித்து, வானம் உருமுவதை போன்ற சத்தம் கேட்கும். மக்கள் இதை பொதுவாக இடிஇடிப்பதற் காகவே எண்ணிக்கொள்வர். ஆனால் பூமிக்குள் இருந்தே கேட்கின்றன. நில நடுக்கம் ஏற்படப் போவதை அறிவிக்கும் அபாய அறிவிப்பாகவோ, அல்லது தொலைவில் ஏற்பட்ட நில நடுக்கத்தின் எதிரொலியாகவோ இத்தகைய நில வெடிச் சத்தங்கள் கேட்கின்றன.

சுமத்ரா தீவில் பாலம்பங்க் நதியின் முகத்துவாரத்தில் ஒருநாள் முழுவதும் இனிமை யான இசை கேட்டுக்கொண்டிருந்தது. நில நடுக்கம் ஏற்படக்கூடிய பகுதிகளில் இத்தகைய சத்தம் கேட்பது உண்டு. ஆனால் அவை ஒரே இடத்திலிருந்து கேட்காமல் பல இடங்களிலிருந்தும் உண்டாகும். நதியின் முகத்துவாரத்தி லிருந்து உண்டான ஒலி வண்டல்மண் படிவதால் ஏற்பட்ட சத்தம் என்று பின்னர் தெரிய வந்தது.

நிலத்திலும், நல்ல நீரிலும் மட்டுமே ஏற்படும் இந்த வெடிச்சத்தங்கள் நூற்றுக்கு தொண்ணூறு சதவீதம் கடல் நீரிலும், உப்பங்கழிகளிலும் கேட்பது இல்லை. இதன் காரணம் என்ன என்பது விளங்கவில்லை. பல காலமாக பேய்களோடும், மாந்திரிகத் தோடும் சம்பந்தப்படுத்திப் பேசப்பட்டு வந்த இந்த விந்தை வெடிச்சத்தங்கள் இயற்கை விஞ்ஞானிகளின் ஆர்வமின்மை காரணமாக வெளிச்சத்திற்கு வந்து வெடிக்காமல் வியக்க வைக்கும் புஸ்வாணமாகிவிட்டன.