சுத்தமான இந்தியா இயக்கம் அக்டோபர் 2–ந்தேதி தொடக்கம் பிரதமர் மோடி தொடங்கி வைக்கிறார்

‘சுத்தமான இந்தியா’ என்னும் இயக்கத்தை வருகிற 2–ந்தேதி பிரதமர் மோடி தொடங்கி வைக்கிறார். இது பற்றி பொதுமக்கள் கருத்துகளை இணையதளம் மூலம் தெரிவிக்கலாம் என்றும் அவர் கேட்டுக் கொண்டு உள்ளார்.

மகாத்மாவின் கனவு

நரேந்திர மோடி பிரதமராக பதவி ஏற்றது முதல் முக்கிய பொதுநலத் திட்டங்களை அறிமுகம் செய்வதற்கு முன்னோட்டமாக பொதுமக்களின் கருத்துகளை இணைய தளம் மூலம் கேட்டறிந்து வருகிறார். கடந்த மாதம் சுதந்திர தினத்தன்று உரையாற்றியபோது தற்போதுள்ள திட்டக் கமிஷனை அகற்றிவிட்டு வேறு புதிய அமைப்பை ஏற்படுத்துவதற்கான யோசனைகளை அவர் பொதுமக்களிடமிருந்து கேட்டு இருந்தார்.

இதேபோல் சுத்தமான இந்தியாவை உருவாக்குவதும் அவருடைய லட்சிய கனவாக இருந்து வருகிறது. இந்தியா சுத்தமான நாடாக இருந்தால் உலக அளவில் சுற்றுலாப் பயணிகளை ஈர்க்கும் நாடுகளின் வரிசையில் முதல் 50 இடங்களைப் பிடித்துவிட முடியும் என்றும் இதனால் இந்தியாவை எடுத்துக்காட்டாக கூறும் நாடாகவும் மாற்ற இயலும் எனவும் கருதுகிறார்.

2–ந்தேதி தொடக்கம்

குறிப்பாக சுத்தம், சுகாதாரம் போன்றவற்றுக்கு முன்னுரிமை அளிப்பதன் மூலம் சுற்றுலாவை மேம்படுத்துவதுடன் பொருளாதாரத்தையும் வளர்ச்சி பெறச் செய்ய முடியும் என்பதும் அவருடைய சிந்தனையாக உள்ளது.

இதற்காக ‘சுத்தமான இந்தியா’ என்னும் இயக்கத்தை தொடங்க அவர் முடிவு செய்துள்ளார்.

இந்த மாபெரும் இயக்கத்தை வருகிற அக்டோபர் மாதம் 2–ந்தேதி, அதாவது மகாத்மா காந்தி பிறந்த நாளில் பிரதமர் மோடி நாடு முழுவதிலும் தொடங்கி வைக்கிறார்.

மோடி ஆலோசனை

இது குறித்து, நேற்று முன்தினம் உயர் மட்ட அளவில் நடத்தப்பட்ட கூட்டத்தில் கலந்து கொண்ட மோடி இந்த கூட்டம் பயனுள்ள வகையில் இருந்ததாக தெரிவித்தார்.

அப்போது திடக்கழிவு மேலாண்மை மற்றும் கழிவு நீர் மேலாண்மை ஆகிய பணிகளை இந்தியா முழுவதிலும் உள்ள 500 பெரு மற்றும் சிறு நகரங்களில் பொதுமக்களின் பங்களிப்புடன் நிறைவேற்றலாம் என்றும் அவர் குறிப்பிட்டார்.

இந்த நிலையில் நேற்று பிரதமர் அலுவலகம் சுத்தமான இந்தியா குறித்து வெளியிட்ட செய்திக் குறிப்பில் கூறப்பட்டு உள்ளதாவது:–

கருத்துகளை தெரிவிக்கலாம்

மக்களின் பங்களிப்பின் வழியாக சுத்தமான இந்தியாவை உருவாக்குவதன் மூலம் மகாத்மா காந்தியின் கனவை நம்மால் நனவாக்க இயலும். நாம் எல்லோரும் ஒன்றாக இணைந்து இதில் பெரிய மாற்றத்தை ஏற்படுத்தலாம்.

இதனை வெற்றிகரமான முறையில் உருவாக்குவதற்கான கருத்துகளை நீங்கள்(பொதுமக்கள்) பகிர்ந்து கொள்ளுங்கள். இந்த யோசனைகள் சுத்தமான இந்தியாவை உருவாக்குவதற்கான அடித்தளமாக அமையும். உங்களது கருத்துகளை “mygov.nic.in/group_info/swachhbharatcleanindia" என்னும் இணையதளத்தின் மூலம் தெரிவிக்கலாம்.

இவ்வாறு அதில் கூறப்பட்டு உள்ளது.

கங்கையை சுத்தமாக்குவோம் என்ற வலைதளத்தை தொடங்கி வைத்தார் அமைச்சர் உமாபாரதி

மத்திய நீர்வளத்துறை அமைச்சர் உமாபாரதி கங்கையை சுத்தமாக்குவோம் என்ற வலைதளத்தை இன்று தொடங்கி வைத்தார். பொதுமக்கள் இந்த இணையதளத்தை பயன்படுத்தி கருத்துக்களை தெரிவிக்கலாம் என்று அமைச்சர் தெரிவித்தார். மக்கள் தங்கள் ஆலோசனைகளை இதன் மூலம் கொடுக்க முன் வரவேண்டும் என்று தெரிவித்தார்.

மத்திய அரசின் ஆலோசனைப்படி குறுகிய காலத்தில் சுத்தமான கங்கையை உருவாக்குவதில் பிரதமர் நரேந்திர மோடி மிகவும் தீவிரமாக இருக்கிறார் என்று மத்திய நீர்வளத்துறை அமைச்சர் உமாபாரதி தெரிவித்தார்.

இந்த இணையதளத்தை (www.nmcg.nic.in) பொதுமக்கள் பயன்படுத்தி தங்கள் கருத்துக்களை தெரிவித்து கொள்ளலாம் என்று மத்திய அமைச்சர் உமாபாரதி தெரிவித்தார்.

பாரதீய ஜனதா ஆட்சியை பிடித்து இருப்பதால், கங்கையை சுத்தப்படுத்துவது தொடர்பான நடவடிக்கைகளை மத்திய அரசு துரிதப்படுத்தி இருப்பது குறிப்பிடதக்கது.

கங்கையை சுத்தப்படுத்தும் முடிவு மகிழ்ச்சி அளிக்கிறது..அரசின் இந்த்ததிட்டம் முழுமையாக நடந்தால் மட்டுமே நிறைவான மகிழ்ச்சி கிட்டும்..அம்மா திட்டங்கள் போல ஆகி விடக்கூடது..அறிவிப்புகளாக மட்டும்..