இந்தியாவில் அல் கய்தா கிளை: மாநிலங்களுக்கு உளவுத் துறை உஷார்!

(04/09/2014)

புதுடெல்லி: அல் கய்தா பயங்கரவாத அமைப்பின் கிளை இந்தியாவில் தொடங்கப்பட்டுள்ளதாக வெளியான வீடியோ தகவலை தொடர்ந்து அனைத்து மாநிலங்களையும் உஷார்படுத்தி உள்ள மத்திய உளவுத் துறை அமைச்சகம், வீடியோவின் உண்மை தன்மை குறித்து ஆராயுமாறு புலனாய்வுத் துறையை கேட்டுக்கொண்டுள்ளது.

ஜிஹாதிஸ்டுகளுக்கான இணையதளத்தில் இது தொடர்பாக வெளியாகி உள்ள 55 நிமிடங்கள் ஓடும் வீடியோ ஒன்றில் பேசியுள்ள அல்கய்தா தலைவர் அய்மான் அல் ஜவஹிரி, அல் கய்தா அமைப்பின் கிளை இந்தியாவில் தொடங்கப்பட்டுள்ளதாகவும், இந்தியாவில் இஸ்லாமிய ஆட்சியும், ஜிகாத் கொடியும் ஏற்றிவைக்கப்படும் என்றும் கூறியுள்ளார்.

மேலும் இஸ்லாமியர்களை பிரித்து வைத்துள்ள எல்லைகளை அல் கய்தா அமைப்பு ஒன்றிணைக்கும் என்றும், இந்தியாவில் செயல்படும் தங்கள் இயக்கம் பர்மா, பங்களாதேஷ், அஸ்ஸாம், குஜராத், அகமதாபாத் மற்றும் காஷ்மீரில் இஸ்லாமியர்களுக்கு இழைக்கப்படும் அநீதியிலிருந்தும், ஒடுக்குமுறைக்கு எதிராகவும் கடும் நடவடிக்கை எடுக்கும் என்றும் ஜவஹிரி கூறியுள்ளார்.

மேலும், மியான்மர் மற்றும் வங்கதேசத்திலும் தாங்கள் போர் தொடுப்போம் என தெரிவித்துள்ள அவர், தலிபான் இயக்க தலைவரான ஒமர் அப்துல்லாவுக்கு தான் நன்றி தெரிவிப்பதாகவும் அவர் அதில் கூறியுள்ளார்.

இஸ்லாமிக் ஸ்டேட் ( ஐ.எஸ்.) அமைப்பு, ஈராக் மற்றும் சிரியாவில் சண்டையிட்டு வரும் நிலையில், அல் கய்தா அமைப்பு தனது ஆதிக்கத்தை நிலைநாட்ட இத்தகைய அறிவிப்புகளை வெளியிடுவதாக கூறப்படுகிறது.

இதனிடையே மேற்கூறிய வீடியோ தகவலை தொடர்ந்து, அனைத்து மாநிலங்களையும் மத்திய உள்துறை அமைச்சகம் உஷார்படுத்தி உள்ளது. அதே சமயம் இது குறித்து விசாரணை நடத்துமறும், இந்த வீடியோவின் உண்மை தன்மை குறித்தும் ஆராயுமாறும் புலனாய்வு துறையை கேட்டுக்கொண்டுள்ளது.

இது தொடர்பாக உளவுத் துறை வட்டாரங்கள் கூறுகையில், " இது எதிர்பாராத ஒன்று அல்ல; அல் கய்தா தனது தளங்களை ஐ.எஸ்.ஐ.எஸ். அமைப்பிடம் இழந்து வருவதால், இத்தகைய அறிவிப்பை வெளியிட்டுள்ளது.

இருப்பினும் ஜவஹரியின் அறிவிப்பில் அஸ்ஸாம், குஜராத், அகமதாபாத் மற்றும் பர்மா ஆகிய மத பதற்றங்கள் நிறைந்த இடங்கள் குறிப்பிடப்பட்டுள்ளதற்கு ஐ.எஸ்.ஐ.எஸ். அமைப்புடன் ஏற்பட்டுள்ள போட்டி மற்றும் அந்த அமைப்பு பக்கம் சாயும் இளைஞர்களை தங்கள் பக்கம் ஈர்ப்பதற்காகத்தான்" என தெரிவித்துள்ளன.

அல் கைதாவா இருந்தா என்ன யாரா இருந்தா என்ன - இந்திய ஒற்றுமைக்கும், பாதுகாப்புக்கும் ஊறு விளைவுக்கும் யாராக இருந்தாலும் அவர்களின் தலையை கொய்துவிட நம்ம ராணுவத்துக்கு அனுமதி வழங்கிட வேண்டும் அரசு.