தாயுடன் தூங்கி கொண்டிருந்த 5 வயது சிறுமி கற்பழித்துக் கொலை

மும்பை: போரிவிலியில், தாயுடன் தூங்கி கொண்டிருந்த 5 வயது சிறுமி கற்பழிக்கப்பட்டு கொலை செய்யப்பட்டாள்.

இதுகுறித்த விவரம் வருமாறு–

5 வயது சிறுமி

மும்பை, போரிவிலி கிழக்கில் உள்ள நேஷனல் பூங்கா மேம்பாலத்தின் அடியில் பெண் ஒருவர் குடிசை அமைத்து தனது 6 குழந்தைகளுடன் வசித்து வருகிறார். கடந்த சனிக்கிழமை இரவு தனது குழந்தைகளுடன் தூங்கினார். பின்னர் நேற்று காலை எழுந்த போது அருகில் தூங்கி கொண்டிருந்த தனது 5 வயது மகளை காணாமல் திடுக்கிட்டார்.

இதனால் பதறி போன அவர் மேம்பாலத்தை சுற்றிலும் தேடி அலைந்தார். அப்போது, சுமார் 50 அடி தூரத்தில் காணாமல் போன சிறுமி மயங்கிய நிலையில் கிடந்தாள். இதை பார்த்து அதிர்ச்சி அடைந்த அந்த பெண் மகளை தூக்கி கொண்டு அருகில் உள்ள பகவதி மருத்துவமனையில் கொண்டு போய் சேர்த்தார்.

கற்பழித்துக் கொலை

சிறுமியை பரிசோதனை செய்த டாக்டர் அவள் ஏற்கனவே இறந்து போய் விட்டதாக தெரிவித்தார். அவளது பிறப்புறுப்பில் பலத்த காயம் இருந்தது.

இதுகுறித்து தகவல் அறிந்து வந்த கஸ்துர்பா மார்க் போலீசார் சிறுமியின் உடலை கைப்பற்றி பிரேத பரிசோதனைக்கு உட்படுத்தினார்கள். பிரேத பரிசோதனையில் சிறுமி கொடூரமான முறையில் கற்பழித்து கழுத்தை நெரித்து கொலை செய்யப்பட்டிருந்தது தெரியவந்தது. நள்ளிரவு நேரத்தில் குடிசை வீட்டிற்குள் புகுந்த யாரோ மர்மஆசாமி அயர்ந்து தூங்கி கொண்டிருந்த சிறுமியை வெளியே தூக்கி கொண்டு சென்று கற்பழித்து கொலை செய்து வீசி சென்றுள்ளான்.

சம்பவம் குறித்து போலீசார் வழக்குப்பதிவு செய்து விசாரணை நடத்தி வருகின்றனர். கொலையாளியை அடையாளம் கண்டுபிடிக்க அந்த பகுதியில் உள்ள கண்காணிப்பு கேமராவை ஆய்வு செய்ய முடிவு செய்துள்ளனர். கடந்த சில தினங்களுக்கு முன் காந்திவிலி மேற்கில் நடைபாதையில் குடும்பத்தினருடன் தூங்கி கொண்டிருந்த 5 வயது சிறுமி கற்பழித்து கொலை செய்யப்பட்டது குறிப்பிடத்தக்கது.

மிக கொடூரமான செயல், தப்பு செய்தவனை மிக, மிக மோசமாக தண்டிக்க வேண்டும்.