உள்ளாட்சி இடைத்தேர்தலில் ஏன் ஒதுங்கினார் கருணாநிதி?

'உள்ளாட்சி இடைத் தேர்தலில் தி.மு.க., தரப்பு போட்டியிடாமல் ஒதுங்கிக் கொண்டது, தோல்வி பயத்தில் தான்' என, கட்சியினரே, தலைமையை கடுமையாக விமர்சித்து வரும் சூழ்நிலையில், 'இது கருணாநிதியின் ராஜதந்திரமான முடிவு' என, கட்சி வட்டாரங்களில் இருந்து தகவல் தெரிவிக்கின்றனர்.

கடும் எதிர்ப்பு:

இம்மாதம் 18ம் தேதி, தூத்துக்குடி, திருநெல்வேலி, கோவை மாநகராட்சிகளின் மேயர் தேர்தல் உட்பட, உள்ளாட்சிப் பொறுப்புகளில் காலியாக இருக்கும், 1,000க்கும் மேற்பட்ட இடங்களுக்கு தேர்தல் நடக்கிறது. அதற்கான அறிவிப்பை தமிழக தேர்தல் ஆணையம், கடந்த வாரம் அறிவித்து, உடனடியாக, வேட்பு மனுதாக்கல் செய்யலாம் எனவும் தெரிவித்தது.

இதற்கு கடும் எதிர்ப்பு தெரிவித்து, தேர்தலில் தி.மு.க., போட்டியிடாது என அறிவித்து, தி.மு.க., தலைவர் கருணாநிதி கூறியதாவது:

பின்னணியில் தோல்வி பயம்:

முதலில் தேர்தலுக்கு அறிவிப்பு வெளியிட்டு, பின் ரத்து செய்தது தேர்தல் ஆணையம், அடுத்த சில நாட்களில், தேர்தல் நடக்கும் மாநகராட்சிகளின் மேம்பாட்டுக்காக, பல ஆயிரம் கோடி மதிப்பில் அவசர அவசரமாக முதல்வர் திட்டங்களை அறிவித்தார்.பின், தேர்தல் அறிவிப்பு வெளியாகி இருக்கிறது. குறைந்த கால அவகாசத்தில் வேட்பு மனுதாக்கல் செய்ய சொல்லியிருக்கின்றனர். இப்படி நியாயமில்லாமல், நடத்தப்படும் தேர்தலை தி.மு.க., புறக்கணிக்கிறது. இவ்வாறு, அவர் கூறினார்.அவரின் இந்த

அறிவிப்பின் பின்னணியில் தோல்வி பயம் இருப்பதாக, பலரும் தலைமையை விமர்சிக்கின்றனர்.

ஒதுங்கியதன் பின்னணியில், கருணாநிதியின் ராஜதந்திரம் இருக்கிறது என, கட்சி வட்டாரங்கள் தெரிவிக்கின்றன.

இதுகுறித்து, அந்த வட்டாரங்கள் கூறியதாவது:

எதிர்ப்பு ஓட்டுகள்:

கோவையில், அ.தி.மு.க.,வுக்கு இணையாக பா.ஜ.,வும் மக்களிடம் செல்வாக்கு பெற்றிருக்கிறது. அப்படி இருக்கும்போது, தி.மு.க., தரப்பில்,அங்கு நடக்கும் மேயர் தேர்தலில் போட்டியிட்டால், அ.தி.மு.க.,வின் எதிர்ப்பு ஓட்டுகள் பிரிந்து விடும். அது அ.தி.மு.க.,வுக்கு தான் லாபம்.தி.மு.க., ஒதுங்கி, பா.ஜ., - அ.தி.மு.க.,வை எதிர்த்து போட்டியிடும் பட்சத்தில், அ.தி.மு.க.,வின் எதிர்ப்பு ஓட்டுகள் அனைத்தும் பா.ஜ.,வுக்கு செல்லும்.அதே நிலைதான், தூத்துக்குடியிலும் இருக்கிறது. அங்கே ம.தி.மு.க.,வுக்கும் பா.ஜ.,வுக்கும் செல்வாக்கு உண்டு. இதைவைத்து, அங்கும் பா.ஜ., போட்டியிட்டால், அ.தி.மு.க.,வுக்கு கடும் போட்டி இருக்கும்.தூத்துக்குடி தி.மு.க.,வில் பெரியசாமி, அனிதா ராதாகிருஷ்ணனுக்கு இடையில், கோஷ்டி மோதல் இருக்கும் சூழ்நிலையில், தி.மு.க., போட்டியிட்டால், சொந்த கட்சியினரே, தோற்கடிப்பர்.

இணக்கம் இருக்காது:

திருநெல்வேலியிலும், கிட்டத்தட்ட இதே நிலைமை தான் இருக்கிறது.இப்படி, பா.ஜ.,வும் அ.தி.மு.க.,வும் நேரடியாக மோதுவதன் மூலம், அந்த கட்சிகளுக்கு இடையே இணக்கமான சூழ்நிலை இருக்காது. அது தி.மு.க.,வுக்கு நல்லது.தேர்தலில், பா.ஜ.,வுக்கு ஆதரவாக தி.மு.க., தொண்டர்கள் பாடுபடுவர். இதனால், இரண்டு கட்சி தொண்டர்கள் மத்தியில் இணக்கம்ஏற்படும். அது, சட்டசபை தேர்தல் நேரத்தில் கை கொடுக்கும்.

ராஜதந்திரம்:

இப்படித்தான், 2001ல் ஆட்சிக்கு வந்த ஜெயலலிதா, சாத்தான்குளம் இடைத் தேர்தலில், சர்வ பலத்துடன் அ.தி.மு.க.,வை போட்டியிட வைத்தார். அந்த தேர்தலிலும் தி.மு.க., ஒதுங்கி, காங்கிரசை போட்டியிட வைத்து, மறைமுக ஆதரவு கொடுத்தது.அன்றைக்கு, அ.தி.மு.க., காங்கிரஸ் கட்சிகளுக்குள் ஏற்பட்ட கசப்பு, இன்று வரை சரியாகவில்லை. அப்படியொரு சூழ்நிலை, பா.ஜ.,வுக்கும் அ.தி.மு.க.,வுக்கும் இடையில் ஏற்படும் என்பதுதான், கருணாநிதியின் கணக்கு.இப்படி ராஜதந்திரமாக யோசித்துதான், இடைத்தேர்தலை கருணாநிதி, புறக்கணித்திருக்கிறார். இவ்வாறு, அந்த வட்டாரங்களில் தெரிவித்தனர்.

தினமலர்

இது ராசதந்திரம்னா...எம்.பி தேர்தலில் எங்கே போச்சு..தந்திரம்...இப்போதைக்கு கருநாநிதிக்கு உட்கட்சி பிரச்சினையே பெரும்பாடாக உள்ளது..ஏற்கனவே வாங்கிய மின்அதிர்ச்சியே இன்னும் சரியாகலை..அதுக்குள்ள இன்னொரு தேர்தலா...ன்னு...ஒதுங்கியிருக்கிறார்னு தோணுது..

தமிழ்நேசன்1981 wrote:இது ராசதந்திரம்னா...எம்.பி தேர்தலில் எங்கே போச்சு..தந்திரம்...இப்போதைக்கு கருநாநிதிக்கு உட்கட்சி பிரச்சினையே பெரும்பாடாக உள்ளது..ஏற்கனவே வாங்கிய மின்அதிர்ச்சியே இன்னும் சரியாகலை..அதுக்குள்ள இன்னொரு தேர்தலா...ன்னு...ஒதுங்கியிருக்கிறார்னு தோணுது..

தங்களின் கருத்து மிகவும் ஏற்புடையது! சரியாகக் கணித்துள்ளீர்கள்!