எபோலா நோய்க்கான சோதனை மருந்தைப் பெற்ற லைபீரிய மருத்துவர் மரணம்

கடந்த பிப்ரவரி மாதம் கினியாவில் தொடங்கிய எபோலா விஷத் தொற்றுநோய் அண்டைநாடுகளான லைபீரியா, சியரா லியோனிலும் பரவியதில் இதுவரை 1427 பேரைப் பலி வாங்கியுள்ளது. லைபீரியாவில் இதன் பாதிப்பு அதிகம் உள்ளதால் அரசு அங்கு அவசர நிலை பிரகடனம் செய்து இந்த நோயைக் கட்டுப்படுத்த போராடி வருகின்றது. இந்த நிலையில் கடந்த 13ஆம் தேதியன்று இந்த நோய்க்கான அரிய சிகிச்சை மருந்தான ZMAPPன் மூன்று அளவுகள் லைபீரியாவிற்கு வந்தது.

இந்த மருந்து எபோலா நோய்த்தாக்கத்தினால் தனிமைப்படுத்தப்பட்டிருந்த அயர்லாந்து மருத்துவர் சுகுனிஸ், லைபீரியா மருத்துவர் ஆப்ரஹாம் போர்போர், நைஜீரியா மருத்துவர் அரோ காஸ்மோஸ் இஸ்சுகுவு ஆகிய மூவருக்கும் கொடுக்கப்பட்டது. ஆரம்பத்தில் இவர்களிடம் நல்ல முன்னேற்றம் காணப்பட்டு வந்தது மற்றவர்களுக்கு நம்பிக்கை அளிக்கும்விதமாகவும் இருந்தது. ஆனால் இவர்களில் ஆப்ரஹாம் போர்போர் நேற்று இறந்துவிட்டதாக அந்நாட்டின் தகவல்துறை அமைச்சர் லூயிஸ் பிரவுன் இன்று தெரிவித்தார்.

எபோலா நோய் தாக்கிய இரண்டு அமெரிக்க தொண்டு ஊழியர்கள் லைபீரியாவிலிருந்து அமெரிக்காவிற்கு வரவழைக்கப்பட்டு அட்லாண்டா மருத்துவமனையில் இதே மருந்து சிகிச்சையைப் பெற்றனர். நோயிலிருந்து பூரண குணமடைந்தபின்னர் சென்றவாரம் மருத்துவமனையிலிருந்து அவர்கள் டிஸ்சார்ஜ் செய்யப்பட்டுள்ளனர். ஆனால் இதே மருந்து பலனளிக்காமல் ஸ்பெயின் நாட்டு மதபோதகர் மரணமடைந்தார்.

இந்த மருந்தினைத் தயாரித்த அமெரிக்க மருந்து நிறுவனம் தங்களிடம் இருந்த கையிருப்பு அனைத்தும் விநியோகப்பட்டுவிட்டதால் மீண்டும் உற்பத்தியை துவக்க நேரம் பிடிக்கும் என்று குறிப்பிட்டுள்ளது. இதுதவிர மற்ற புதிய மருந்துத் தயாரிப்புகள் அனைத்தும் மருத்துவ பரிசோதனைகளின் ஆரம்பக் கட்டத்தைக்கூட தாண்டவில்லை என்று இந்நிறுவனம் தெரிவித்துள்ளது. .

கடவுளே கருணை புரிய வேண்டும்