பேஸ்புக் மெசஞ்சர் ஆபத்தானதா?

இரு வாரங்களுக்கு முன்னால், பேஸ்புக் தன் இன்ஸ்டண்ட் மெசஞ்சர் வசதியை, மொபைல் சாதனங்களில் தனித்து பிரித்து பயன்படுத்துவதனை அறிமுகப்படுத்தியது குறித்து எழுதி இருந்தோம். அது வசதியாக இருப்பதாகப் பல வாசகர்கள் கருத்து தெரிவித்தனர். மிக எளிதாக மெசேஜ்களை அனுப்ப முடிகிறது என்றும், இணையத்தில் இணைத்தவுடன், மெசஞ்சர் அப்ளிகேஷனில் அனைத்து மெசேஜ்களும் அப்டேட் செய்யப்படுவதாகவும் தெரிவித்தனர். இது வசதியாக இருப்பதற்குக் காரணம், அதில் உள்ள தகவல்களை நினைத்த நேரத்தில் படித்து தெரிந்து கொள்ள இயல்வதுதான். எடுத்துக் காட்டாக, ஒருவர் தன்னைத் தொடர்பு கொள்ள பயன்படுத்த வேண்டிய எண், ஒருவருக்குத் தேவையான மருந்தின் பெயர் ஆகியவற்றைத் தந்திருந்தால், எந்த இடத்திலும், பேஸ்புக் மெசஞ்சரில் லாக் இன் செய்து அவற்றைத் தெரிந்து கொள்ள முடிகிறது. டெஸ்க்டாப் கம்ப்யூட்டரில், பழைய செய்திகளை அறிய, அதனைக் கொடுத்தவரும் இணையத்தில், பேஸ்புக் தளத்தில் லாக் இன் செய்தால் மட்டுமே தெரிந்து கொள்ள இயலும். ஆனால், வாசகர் ஒருவர் இதில் உள்ள ஆபத்தினை நீங்கள் சரியாகத் தெரிந்து கொள்ளவில்லை என்று கூறி, மிக நீண்ட கடிதம் ஒன்றை அனுப்பியுள்ளார். அவர் எழுதிய கடிதத்தின் சுருக்கத்தினையும், குற்றச்சாட்டுக்களின் தன்மையையும், அதற்கான விளக்கத்தினையும் இங்கு தந்துள்ளேன்.

அவர் எழுதிய கடிதத்தின் அடிப்படைக் குற்றச் சாட்டு இது. நீங்கள் பேஸ்புக் வழியாக அதில் இணைத்துத் தரப்பட்டுள்ள மெசஞ்சர் மூலம் செய்திகளைப் பரிமாறிக் கொள்ள விரும்பினால், நீங்கள் மொபைல் போனில் கட்டாயம் புதிதாகப் பிரித்துத் தரப்பட்டுள்ள மெசஞ்சர் அப்ளிகேஷனை இன்ஸ்டால் செய்தாக வேண்டும். இது என்ன பெரிய நிபந்தனை? நல்லதுதானே என நீங்கள் எண்ணலாம். ஆனால், இதனை இன்ஸ்டால் செய்கையில் நாம் எதற்கெல்லாம் ஒத்துக் கொள்கிறோம் எனப் பார்க்க வேண்டும். இவை நம் சுதந்திரத்தினைப் பறிப்பதுடன், நமக்குத் தீங்கு விளைவிக்கின்றன என்று கூறியுள்ளார். அவை இங்கு தொகுத்துத் தரப்பட்டுள்ளன.

1. நம் நெட்வொர்க் இணைப்பினை மாற்றுவதற்கு நாம் பேஸ்புக் இயக்கத்திற்கு அனுமதி அளிக்கிறோம். இந்த அனுமதியை வைத்துக் கொண்டு, பேஸ்புக் இன்டர்நெட் அல்லது மொபைல் போன் நிறுவன சேவையின் தன்மையினை மாற்றலாம். உங்களுக்கு அறிவிக்கப்படாமலேயே, உங்கள் போனில் உள்ள வசதிகளை, அப்ளிகேஷன் புரோகிராம்களை இயக்க நீங்கள் அனுமதிக்கிறீர்கள்.

2. போன் அழைப்பு எண்களும், எஸ்.எம்.எஸ். செய்தியும்: பேஸ்புக் நினைத்தால், அது உங்கள் நண்பர்களின் போன்களுக்கு, நீங்கள் அறியாமலேயே உங்கள் பெயரில், எஸ்.எம்.எஸ். செய்திகளை அனுப்பலாம். இதில் உள்ள பிரச்னை உங்களுக்குத் தெரிகிறதா? உங்களுடைய போனில் இருந்து கொண்டு, உங்கள் நண்பர்களுக்கு உங்கள் சார்பாக, எஸ்.எம்.எஸ். அனுப்ப பேஸ்புக் யார்? நீங்கள் அறியாத ஒருவருக்கு, உங்கள் போனில், நீங்கள் விரும்பாத செயல்களை மேற்கொள்ள அனுமதி கொடுப்பது போலாகும் இது.

3. ஆடியோவைப் பதிவு செய்வதும், படங்கள் மற்றும் விடியோ காட்சிகளை எந்த நேரத்திலும் எடுப்பது: இது மிக மோசமானது. பேஸ்புக் நிறுவனத்தினர், எந்த நேரத்திலும் உங்கள் போனில் நுழைந்து, நீங்கள் பேசுவதைக் கேட்கலாம். உங்கள் போனில் உள்ள லென்ஸ் வழியாக உங்களைக் கண்காணிக்கலாம்.

மேலே கண்ட குற்றச் சாட்டுக்களே அவரின் கடிதம் முழுவதும் இருந்தது. கடிதத்தில் உள்ளவற்றைச் சுருக்கி மேலே தரப்பட்டுள்ளது. இனி வாசகரின் அச்சத்தினையும் அதற்கான விளக்கத்தினையும் பார்ப்போம்.

1. முதலாவதாக மேலே சொல்லப்பட்டுள்ள அனுமதிகளைக் கவனிக்கலாம். இவை எல்லாம், மெசஞ்சர் அப்ளிகேஷனுக்கு மட்டும் தனியானவை அல்ல. பேஸ்புக் அப்ளிகேஷனை இன்ஸ்டால் செய்திடுகையிலேயே, இந்த அனுமதியை நாம் வழங்கி விடுகிறோம். மெசஞ்சரைத் தனியே அமைத்து இயக்குவது கட்டாயப்படுத்தப்படுகிறது என்பது உண்மையே. அது பேஸ்புக் தன் இயக்கத்திற்கான கட்டமைப்பு வசதி என எண்ணுகிறது. உங்களுக்குப் பிடிக்கவில்லை என்றால், விட்டுவிடலாம். இது போல பல இன்ஸ்டண்ட் மெசஞ்சர்கள், இலவசமாகவே இணையத்தில் கிடைக்கின்றன.

2. அடுத்ததாக, நெட்வொர்க் இணைப்பினை மாற்றுவது. நீங்கள் மெசேஜ் ஒன்றை அனுப்ப விரும்பினால், போன் முதலில் வை பி இணைப்பில் இருக்க வேண்டும். இதனை பேஸ்புக் நினைவு படுத்துவது நிச்சயம் நெட்வொர்க்கினை மாற்றுவதாகாது.

3. எண்களை அழைப்பதுவும், எஸ்.எம்.எஸ். அனுப்புவதும்: போன் எண்களை அழைப்பது என்பது மெசஞ்சர் அப்ளிகேஷனில், நீங்கள் விரும்பினால் மட்டுமே அமைக்கக் கூடிய வசதியாகும். அதாவது, நீங்கள் விரும்பினால், இந்த அப்ளிகேஷன் வழியாக எண்களை அழைக்கலாம். பேஸ்புக் மெசஞ்சர் தானாக எந்த அழைப்பினையும் மேற்கொள்ளாது.

4. ஆடியோ, விடியோ பதிவு: எந்த நேரத்திலும் பேஸ்புக் மெசஞ்சர் ஆடியோ மற்றும் விடியோ பதிவுகளை மேற்கொள்ளும் என்பது, நீங்கள் கொடுக்கும் விருப்பத்தின் பேரிலேயே நடைபெறும். இந்த அனுமதி கொடுப்பதன் மூலம் நீங்கள் மெசஞ்சர் அப்ளிகேஷனில் இயங்குகையில், கேமராவினை இயக்க முடிகிறது.

எனவே, யாரும் தேவையின்றி அச்சம் கொள்ளத் தேவை இல்லை. பேஸ்புக் உங்கள் விருப்பங்களை அறிந்து மற்றவர்களுக்குச் சொல்வது என்பது அதன் வர்த்தகத்தில் ஒரு பகுதியாகும். உங்களுடைய தொடர்புகள், நீங்கள் எந்த மாதிரி பதிவுகளைப் பார்க்கிறீர்கள், விளம்பரங்களை ஆய்வு செய்கிறீர்கள் என்பதனை அறிந்து, அவற்றின் அடிப்படையில் தனக்கு கட்டணம் செலுத்துபவர்களுக்கு, உங்களைப் பற்றிய தகவல்களைத் தருகிறது. எடுத்துக் காட்டாக, நீங்கள் ஒரு ஹோம் தியேட்டர் வாங்க இணையத்தில் சிறிய தேடுதலை நடத்துங்கள். அல்லது அமேஸான் தளம் சென்று பாருங்கள். அடுத்த சில வாரங்களுக்கு, அல்லது மாதங்களுக்கு, நீங்கள் பேஸ்புக் மட்டும் அல்ல, மற்ற ஜிமெயில் போன்ற அப்ளிகேஷன்களில் செல்கையில், அந்த விளம்பரம் உங்கள் தளப் பக்கத்தில் காட்டப்பட்டுக் கொண்டே இருக்கும். இது விளம்பர வர்த்தகத்தின் ஓர் உத்தி. அவ்வளவே.

பேஸ்புக், மொபைல் சாதனங்களில் தன் மெசஞ்சரைப் பிரித்து அமைத்தது, அதன் திட்டப்படியான செயல்பாடாகும். மெசஞ்சர் உலகில் தன் இடத்தை உயர்த்த அதன் உத்தி இது.

சமூக இணைய தளங்களில் இயங்காதவர்களும், தன் மெசஞ்சர் அப்ளிகேஷனைப் பயன்படுத்தட்டும் என பேஸ்புக் எதிர்பார்க்கிறது.

எனவே, எந்தவித அச்சமும் இன்றி, மற்ற மெசஞ்சர் அப்ளிகேஷன்களைப் பயன்படுத்துவது போல, பேஸ்புக் மெசஞ்சர் அப்ளிகேஷனையும் பயன்படுத்தலாம்.

கம்ப்யூட்டர் மலர்