கருணாநிதி ஆட்சியில் தான் முல்லைப் பெரியாறு பிரச்சினைக்கு முற்றுப்புள்ளி வைக்கப்பட்டது

**சிவா** · **சிவா** Sat Aug 23, 2014 7:56 pm

கருணாநிதி ஆட்சியில் தான் முல்லைப் பெரியாறு பிரச்சினைக்கு முற்றுப்புள்ளி வைக்கப்பட்டது என்று தி.மு.க. துணைப் பொதுச் செயலாளர் துரைமுருகன் கூறியுள்ளார்.

இதுகுறித்து, தி.மு.க. துணைப் பொதுச் செயலாளரும், முன்னாள் அமைச்சருமான துரைமுருகன் வெளியிட்டுள்ள அறிக்கையில் கூறியிருப்பதாவது:-

குற்றச்சாட்டு

22-8-2014 அன்று மதுரையில் முதல்வர் ஜெயலலிதாவுக்கு நடந்த பாராட்டுக் கூட்டத்தில் தலைவர் கருணாநிதி மீது அபாண்டமான-சற்றும் உண்மையில்லாத குற்றச்சாட்டுக்களை கூறியிருக்கிறார்.

'முல்லைப் பெரியாறு பிரச்சினையில் கருணாநிதிக்கு அக்கறையில்லை' - இது மதுரைக் கூட்டத்தில் ஜெயலலிதா தலைவர் கருணாநிதி மீது சுமத்திய குற்றச்சாட்டுகளில் ஒன்று. முல்லைப் பெரியாறு பிரச்சினை குறித்து சுமூக தீர்வு காண கேரள முதல்வருக்கு தமிழக முதல்வராக இருந்த கருணாநிதி எழுதிய கடிதங்கள் 10; மத்திய அமைச்சருக்கு 1. கேரள முதல்வரை சந்தித்துப் பேச்சுவார்த்தை நடத்தியது 5 முறை. ஆனால் முதல்வர் ஜெயலலிதா எழுதிய கடிதங்கள் வெறும் 3 தான். ஜெயலலிதா எத்தனை முறை கேரள முதல்வரைச் சந்தித்துப் பேச்சுவார்த்தை நடத்தினார் என்பது அவருக்கே வெளிச்சம். இது ஒன்று போதுமே, யாருக்கு முல்லைப் பெரியாறு பிரச்சினையில் அக்கறை என்று தெரிந்துகொள்ள.

'136 அடியில் இருந்து 142 அடியாக பெரியாறு அணையில் நீர் மட்டத்தை உயர்த்திக் கொள்ளலாம் என்று உச்சநீதிமன்றம் சொன்ன தீர்ப்பை செல்லாததாக ஆக்க, கேரள அரசு ஒரு சட்டத் திருத்தத்தைக் கொண்டு வந்தது. அதை எதிர்த்து 2006-ம் ஆண்டு எனது தலைமையிலான அரசு உச்சநீதிமன்றத்தில் வழக்கு தொடுத்தது' என்றும் முதல்வர் பேசியிருக்கிறார்.

உச்சநீதிமன்றத்திற்கு மாற்றம்

'முல்லைப் பெரியாறு அணை குறித்து சென்னை-கேரள உயர்நீதிமன்றங்களில் நிலுவையில் இருந்த வழக்குகள் 2002-ம் ஆண்டு உச்சநீதிமன்றத்துக்கு மாற்றப்பட்டன. இந்த வழக்குகள் உச்சநீதிமன்றத்தில் நடைபெற்றபோது தமிழக முதல்வராக இருந்த நான், ஒவ்வொரு விசாரணைக்கும் முன்பு பொதுப்பணித் துறை அதிகாரிகளையும், பொறியியல் வல்லுனர்களையும், சட்ட வல்லுநர்களையும் அழைத்துப் பேசி தமிழகத்தின் சார்பில் எடுத்து வைக்க வேண்டிய வாதங்கள் குறித்து விரிவாக விவாதிப்பதை வாடிக்கையாகக் கொண்டிருந்தேன்' என்று முதல்வர் ஜெயலலிதா மதுரை கூட்டத்தில் சொன்ன பொய்களிலேயே பெரிய பொய் இது தான். உண்மை என்ன?.

136 அடியில் இருந்து 152 அடி வரை பெரியாறு அணையில் நீரை உயர்த்த வேண்டும் என்று தமிழக விவசாயிகள் சிலர் தமிழக உயர்நீதிமன்றத்தில் தனி நபர்கள் ரிட் மனுக்களை தாக்கல் செய்திருந்தனர். இதைப்போலவே பெரியாறு அணையின் நீர்மட்டத்தை 136 அடிக்கு மேல் உயர்த்தக் கூடாது என்று கேரளத்தைச் சேர்ந்த விவசாயிகள் சிலர் கேரள உயர்நீதிமன்றத்தில் ரிட் பெட்டிஷன்களை தாக்கல் செய்திருந்தனர்.

ரிட் மனு தாக்கல்

முல்லைப் பெரியாறு சுற்றுச் சூழல் பாதுகாப்புக் குழு என்ற அமைப்பு பெரியாறு அணையில் 136 அடிக்கு மேல் நீரைத் தேக்கி வைக்க அனுமதிக்கக் கூடாது என்றோர் ரிட் மனுவை உச்சநீதிமன்றத்தில் தாக்கல் செய்திருந்தது. சுப்பிரமணியசாமியும் தமிழகத்திற்குச் சாதகமாக ஒரு ரிட் மனுவை உச்சநீதிமன்றத்தில் தாக்கல் செய்திருந்தார்.

இப்படி கேரள-தமிழ்நாடு உயர்நீதிமன்றங்களில் இருந்த ரிட் மனுக்களை எல்லாம் உச்சநீதிமன்றத்திற்கே மாற்ற வேண்டும் என்று தமிழக அரசு சார்பாக ஒரு மனுவினை உச்சநீதிமன்றத்தில் 14-12-1998 அன்று தாக்கல் செய்தோம்.

கருணாநிதிக்கு அக்கறை இல்லையா?

14-12-1998-ல் எந்த ஆட்சி? ஜெயலலிதா ஆட்சியா? தலைவர் கருணாநிதி ஆட்சியா? கருணாநிதி ஆட்சி தானே. ஆனால் ஜெயலலிதா இந்த மனுக்களை 2002-ம் ஆண்டே மாற்றப்பட்டதாக எவ்வளவு பெரிய பதவியில் இருப்பவர் இப்படி ஓர் பொய்யை மக்கள் முன்பேசலாமா?.

தலைவர் கருணாநிதிக்கு முல்லைப் பெரியாறு அணை பிரச்சினையில் அக்கறையில்லை என்று பேசியிருக்கிறாரே, ஜெயலலிதா, அவருக்கு ஒன்றை ஞாபகப்படுத்துகிறேன். பெரியாறு அணையில் 142 அடி வரை தண்ணீரைத் தேக்கலாம் என்று உச்சநீதிமன்றம் 27-2-2006-ல் ஒரு தீர்ப்பு கொடுத்ததே, அதற்கு யார் காரணம்? தலைவர் கருணாநிதி அல்லவா?.

பிரச்சினைக்கு முற்றுப்புள்ளி

இரு மாநில உயர்நீதிமன்றங்களில் இருந்த வழக்குகளை உச்சநீதிமன்றத்துக்கு மாற்றியது தலைவர் கருணாநிதி என்று பார்த்தோம். அந்த வழக்கின் இறுதித் தீர்ப்பு தான் 142 அடி வரை நிரப்பலாம் என்று 27-2-2006 அன்று உச்சநீதிமன்றம் சொன்னது.

முல்லைப் பெரியாரில் இறுதித் தீர்ப்பு வாங்கிக் கொடுத்ததே அன்றைய முதல்வர் தலைவர் கருணாநிதி தான். அதேபோல் அரசியல் சாசன பெஞ்சில் வழக்கு நடந்தபோது நீதிபதி ஆனந்த் தலைமையில் ஐவர் குழு அமைக்கப்பட்டபோது, தமிழகத்தின் சார்பில் அந்தக்கமிட்டியில் நீதிபதி லெட்சுமணன் நியமிக்கப்பட்டதே தலைவர் கருணாநிதியின் ஆட்சிக் காலத்திலேதான். அவர்கள் தந்த அறிக்கையின் அடிப்படையில் தான் பெரியாறு பிரச்சினைக்கு முற்றுப் புள்ளி வைக்கப்பட்டது.

இவ்வாறு துரைமுருகன் கூறியுள்ளார்.

**சிவா** · **சிவா** Sat Aug 23, 2014 7:59 pm

22-8-2014 அன்று மதுரையில் முதல்வர் ஜெயலலிதாவுக்கு நடந்த பாராட்டுக் கூட்டத்தில் தலைவர் கருணாநிதி மீது அபாண்டமான-சற்றும் உண்மையில்லாத குற்றச்சாட்டுக்களை கூறியிருக்கிறார்.

அபாண்டப் பழி என்றால் இப்படி வெட்டித்தனமாக அறிக்கை விடுவதை விடுத்து, அவதூறு வழக்கு துவங்க வேண்டியதுதானே!

**T.N.Balasubramanian** · **T.N.Balasubramanian** Sat Aug 23, 2014 11:47 pm

கூவம் ஆற்றில் இப்போது அதிக நாற்றம் வருவதில்லையாமே .
கூவும் அறிக்கைகளில் தான் அதிகம் வருகிறதாம் .

ரமணியன்

Sponsored content · Sponsored content

கருணாநிதி ஆட்சியில் தான் முல்லைப் பெரியாறு பிரச்சினைக்கு முற்றுப்புள்ளி வைக்கப்பட்டது

கருணாநிதி ஆட்சியில் தான் முல்லைப் பெரியாறு பிரச்சினைக்கு முற்றுப்புள்ளி வைக்கப்பட்டது

Re: கருணாநிதி ஆட்சியில் தான் முல்லைப் பெரியாறு பிரச்சினைக்கு முற்றுப்புள்ளி வைக்கப்பட்டது

Re: கருணாநிதி ஆட்சியில் தான் முல்லைப் பெரியாறு பிரச்சினைக்கு முற்றுப்புள்ளி வைக்கப்பட்டது

Re: கருணாநிதி ஆட்சியில் தான் முல்லைப் பெரியாறு பிரச்சினைக்கு முற்றுப்புள்ளி வைக்கப்பட்டது

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக