போராட்டக் கும்பலிடம் சிக்கிக் கொண்ட அசாம் முதல்-மந்திரியை மத்திய ரிசர்வ் போலீஸ் படையினர் மீட்டனர்

அசாமில் நிவாரண முகாமிற்கு சென்ற முதல் மந்திரி தருண் கோகாய் போராட்டக் கும்பலிடம் சிக்கிக் கொண்டார். பின்னர் பாதுகாப்பு படையினர் வானத்தை நோக்கி துப்பாக்கியால் சுட்டு கூட்டத்தை கலைந்து அவரை மீட்டனர்.

வடகிழக்கு மாநிலங்களான அசாம்–நாகாலாந்து எல்லை, சர்ச்சைக்குரிய பகுதியாக 6 செக்டர்களாக பிரிக்கப்பட்டுள்ளது. அங்கு இரு மாநில போலீசாரும் நிறுத்தப்படுவது இல்லை. பாதுகாப்பு பணியை, துணை ராணுவமான மத்திய ரிசர்வ் போலீசார் ஏற்றுள்ளனர். இந்நிலையில், கடந்த 12–ந் தேதி, அசாம் மாநிலத்தைச் சேர்ந்த 2 சிறுவர்களை நாகாலாந்து தீவிரவாதிகள் கடத்திச் சென்றனர். இதைக் கண்டித்து, அசாம் எல்லையில் சேதியாகான் கிராமத்தில் உள்ள ரிசர்வ் போலீஸ் பட்டாலியன் அலுவலகம் முன்பு கிராம மக்கள் போராட்டம் நடத்தினர். நிலைமையை சமாளிக்க, அவர்கள் மீது போலீசார் தடியடி நடத்தினர். அதே சமயத்தில், எல்லைக்கு அப்பால் இருந்து, நாகாலாந்து தீவிரவாதிகள் துப்பாக்கியால் சுட்டனர்.

அதிலும், அதைத் தொடர்ந்து நடந்த வன்முறையிலும் 7 பேர் பலியானது தெரிய வந்தது. இந்நிலையில், அசாம் மாநிலம் கோலாகாட் மாவட்டம் செயின்புர் கிராமத்தில் மேலும் இரண்டு பேரின் உடல்கள் நேற்று கைப்பற்றப்பட்டன. இதையடுத்து, சாவு எண்ணிக்கை 9 ஆக உயர்ந்தது. 200 வீடுகள் தீவைத்து எரிக்கப்பட்டுள்ளன. 10 ஆயிரம் பேர் வீடுகளை விட்டு வெளியேறி, 13 நிவாரண முகாம்களில் தங்கி உள்ளனர். நிவாரண முகாமில் தங்கியுள்ளவர்களை சந்திக்க இன்று அம்மாநில முதல்-மந்திரி தருண் கோகாய் அங்கு சென்றார். அப்போது முகாமில் இருந்தவர்கள் தருண் கோகாய்க்கு எதிர்ப்பு தெரிவித்து அவரை சுற்றிக்கொண்டனர். முதல் மந்திரி தருண் கோகாய் போராட்டக் கும்பலிடம் சிக்கிக் கொண்டார். பின்னர் சுதாரித்துக் கொண்ட மத்திய ரிசர்வ் போலீஸ் படை வீரர்கள் அவரை மீடக முயற்சி செய்தனர். பின்னர் வானத்தை நோக்கி துப்பாக்கியால் சுட்டு கூட்டத்தை கலைத்து தருண் கோகாயை மத்திய ரிசர்வ் போலீஸ் படை வீரர்கள் மீட்டனர். இந்த சம்பவம் அங்கு பெரும் பரபரப்பை ஏற்படுத்தியது.