தமிழில் ஐஎஸ்ஐஎஸ் பிரசார வீடியோ: மத்திய அரசு விசாரணைக்கு உத்தரவு!

புதுடெல்லி/சென்னை: ஐ.எஸ்.ஐ.எஸ் தீவிரவாத அமைப்பைச் சேர்ந்தவர்களால் வெளியிடப்பட்ட‌ பிரசார வீடியோ, தமிழில் மொழிமாற்றம் செய்யப்பட்டு வலைத்தளங்களில் வெளியானது குறித்து விசாரணை நடத்த மத்திய உள்துறை அமைச்சகம் உத்தரவிட்டுள்ளது.

ஈராக்கில் ஷியா பிரிவு அரசுக்கு எதிராக சன்னி பிரிவு ஐஎஸ்ஐஎஸ் தீவிரவாதிகள் போரிட்டு வருகின்றனர். அந்நாட்டின் பல்வேறு நகரங்களை ஐஎஸ்ஐஎஸ் தீவிரவாதிகள் கைப்பற்றி உள்ளனர். இந்நிலையில், ஐஎஸ்ஐஎஸ் தீவிரவாதிகள், கைப்பற்றிய இடங்களை இணைத்து தனிநாடு அறிவிப்பு வெளியிட்டனர். புதிதாக ராணுவ அமைப்பையும் ஏற்படுத்தி இருக்கின்றனர். ஷியா பிரிவினர் ஆளும் பகுதியை முழுமையாக பிடிக்கும் வகையில், ராணுவத்தை பலப்படுத்த பல்வேறு நாடுகளில் இருந்தும் ஆட்கள் சேர்க்கும் பணியை துவக்கி உள்ளனர்.

இந்நிலையில் இணையதள பிரசாரம் மூலம் தமிழகத்தை சேர்ந்த 5 பேர் உள்பட இந்தியாவில் இருந்து 80 இளைஞர்கள் ஐஎஸ்ஐஎஸ் அமைப்பில் சேர்ந்து உள்ளதாக தகவல்கள் வெளியானது. தமிழகத்தை சேர்ந்த மேலும் பல இளைஞர்களை ஐஎஸ்ஐஎஸ் அமைப்பில் சேர்க்க மறைமுக நடவடிக்கையில் சிலர் ஈடுபட்டு இருப்பதாகவும் செய்திகள் வெளியானது.

இதனிடையே இதற்கான இணையதள பிரசார வீடியோ, ஆங்கிலம், ஹிந்தி, உருது, தமிழ் ஆகிய மொழிகளில் மொழிபெயர்ப்பு செய்யப்பட்டு வெளியானது. ஐ.எஸ்.ஐ.எஸ் அமைப்பு குறித்து தமிழகத்தைச் சேர்ந்த இளைஞர்கள் மத்தியில் பிரசாரம் செய்யும் நோக்கில் இந்த வீடியோ தமிழில் மொழிபெயர்க்கப்பட்டுள்ளதாகக் கூறப்பட்டது.

கனடா நாட்டைச் சேர்ந்த ஒருவரை மையமாக வைத்து இந்த வீடியோ படம் தயாரிக்கப்பட்டுள்ளது. ஆயுதமேந்திப் போராடும் உணர்வைத் தூண்டும் வகையில் இருப்பதால், இந்த வீடியோவைத் தடை செய்யவேண்டும் என்று வலைத்தள அமைப்புகளுக்கு மத்திய உள்துறை அமைச்சகம் கடிதம் எழுதியுள்ளது.

மேலும், தமிழ் மொழிபெயர்ப்பு எங்கு, யாரால் செய்யப்பட்டது என்பது குறித்த விசாரணைக்கும் உத்தரவிடப்பட்டிருக்கிறது.