இந்தியர்களின் தற்கொலைக்கு 11 முக்கிய காரணங்கள்!

**சிவா** · **சிவா** Tue Aug 12, 2014 2:47 pm

புதுடெல்லி: இந்தியாவில் ஆண்டுக்கு ஒரு லட்சத்திற்கும் அதிகமானோர் தற்கொலை செய்துகொள்வதாக தெரிவித்துள்ள தேசிய குற்ற ஆவண காப்பகம், இந்தியர்களின் தற்கொலைக்கு 11 முக்கிய காரணங்களையும் பட்டியலிட்டுள்ளது.

இந்தியாவில் கடந்த 2011 ஆம் ஆண்டில் 1,35, 585 பேரும், 2012ல் 1,35.445 பேரும், 2013 ல் 1,34, 799 பேரும் தற்கொலை செய்துகொண்டுள்ளதாக தெரிவிக்கும் தேசிய குற்ற ஆவண காப்பகம் ( National Crime Records Bureau), வரதட்சணை, வறுமை, கடன் போன்றவை தற்கொலைக்கு முக்கிய காரணமாக அமைந்துள்ள போதிலும், மன அழுத்தம் மற்றும் விரக்தி போன்றவற்றினால் தற்கொலை செய்துகொள்வோரது எண்ணிக்கை கணிசமாக அதிகரித்து வருவதாக தெரிவித்துள்ளது.

நோய்

தீராத நோய் காரணமாக 2011 ல் 26,570 பேரும், 2012 ல் 25, 116 பேரும், 2013 ல் 26, 426 பேரும் தற்கொலை செய்துகொண்டுள்ளனர்.

வரதட்சணை

வரதட்சணை பிரச்னை காரணமாக 2011 ல் 3,239 பேரும், 2012 ல் 1,935 பேரும், 2013 ல் 2, 267 பேரும் தற்கொலை செய்துகொண்டுள்ளனர்.

போதை மருந்து

போதை மருந்து உட்கொண்ட பழக்கம் உடையவர்களில் 2011 ல் 3,658 பேரும், 2012 ல் 4, 008 பேரும், 2013 ல் 4,591 பேரும் தற்கொலை செய்துகொண்டுள்ளனர்.

தேர்வில் தோல்வி

தேர்வில் தோல்வியடைந்ததன் காரணமாக 2011 ல் 2,381 பேரும், 2012 ல்2, 246 பேரும், 2013 ல் 2, 471 பேரும் தற்கொலை செய்துகொண்டுள்ளனர்.

குடும்ப பிரச்னை

குடும்ப பிரச்னை காரணமாக 2011 ல் 32, 909 பேரும், 2012 ல் 30, 792 பேரும், 2013 ல் 32, 325 பேரும் தற்கொலை செய்துகொண்டுள்ளனர்.

காதல் பிரச்னை

காதல் பிரச்னை காரணமாக 2011 ல் 4, 586 பேரும், 2012 ல் 3, 849 பேரும், 2013 ல் 4,495 பேரும் தற்கொலை செய்துகொண்டுள்ளனர்.

வறுமை

வறுமை காரணமாக 2011 ல் 2, 282 பேரும், 2012 ல் 2, 291 பேரும், 2013 ல் 1, 866 பேரும் தற்கொலை செய்துகொண்டுள்ளனர்.

வேலை இல்லா பிரச்னை

வேலை இல்லா பிரச்னை காரணமாக 2011 ல் 2, 333 பேரும், 2012 ல் 1,731 பேரும், 2013 ல் 2, 090 பேரும் தற்கொலை செய்துகொண்டுள்ளனர்.

நெருங்கிய உறவினர்களின் மரணம்

நெருங்கிய உறவினர்களின் மரணத்தால் மனமுடைந்து 2011 ல் 896 பேரும், 2012 ல் 819 பேரும், 2013 ல் 996 பேரும் தற்கொலை செய்துகொண்டுள்ளனர்.

சமூக மதிப்பு குறைந்ததால்

சமூகத்தில் மதிப்பு குறைந்ததன் காரணமாக 2011 ல் 1, 160 பேரும், 2012 ல் 981 பேரும், 2013 ல்1, 466 பேரும் தற்கொலை செய்துகொண்டுள்ளனர்.

கடன் மற்றும் பொருளாதார நிலையில் திடீர் வீழ்ச்சி

கடன் மற்றும் பொருளாதார நிலையில் திடீர் வீழ்ச்சி காரணமாக 2011 ல் 2, 983 பேரும், 2012 ல் 2, 357 பேரும், 2013 ல்2,678 பேரும் தற்கொலை செய்துகொண்டுள்ளனர் என தேசிய குற்ற ஆவண காப்பக புள்ளிவிவரங்கள் தெரிவிக்கின்றன.

**சிவா** · **சிவா** Tue Aug 12, 2014 2:49 pm

தற்கொலையில் தமிழகம் முதலிடம்

புதுடெல்லி: இந்தியாவிலேயே தற்கொலை செய்வோரின் பட்டியலில் தமிழகம் முதலிடம் பிடித்துள்ளதாக ஆய்வில் தெரியவந்துள்ளது.

இந்தியாவில் தற்கொலை செய்வோர் குறித்து தேசிய குற்ற ஆவணங்கள் மையம் ஆய்வு ஒன்றை நடத்தியது. இதில், கடந்த 2013 ஆம் ஆண்டு இந்தியாவில் மொத்தம் ஒரு லட்சத்து 34 ஆயிரத்து 799 பேர் தற்கொலை செய்துள்ளதாகவும், சராசரியாக நான்கு நிமிடத்திற்கு ஒருவர் தற்கொலை செய்து கொள்வதாகவும் கூறப்பட்டுள்ளது.

மேலும், இந்தியாவில் ஒரு நாளைக்கு 369 பேர் தற்கொலை செய்து கொள்வதாகவும், இதில் தமிழகம் முதலிடம் வகிப்பதாகவும் கூறப்பட்டது. இந்தியாவில் நடக்கும் மொத்த தற்கொலையில் 12.3 சதவீததத்தின் தமிழகத்தைச் சேர்ந்தவர்களாகவும், 53.5 சதவீதத்தினர் மகாராஷ்டிரா, ஆந்திரா, மேற்கு வங்கம், கர்நாடகா போன்ற மாநிலங்களைச் சேர்ந்தவர்களாகவும் உள்ளனர் என்றும் கூறப்பட்டது.

மேலும் குடும்ப பிரச்னை, காதல் தோல்வி, தீராத நோய் ஆகியவை தற்கொலைக்கான முக்கிய காரணங்களாக உள்ளதாகவும், பணக்கஷ்டம் காரணமாக தற்கொலை செய்து கொள்பவர்கள் 38 சதவீதத்தினராகவும், தூக்கு போட்டு தற்கொலை செய்பவர்கள் 39.8 சதவீதத்தினராகவும், விஷம் குடித்து தற்கொலை செய்பவர்கள் 27.9 சதவீதத்தினராகவும், தீக்குளித்து தற்கொலை செய்பவர்கள் 7.4 சதவீதத்தினராகவும் உள்ளனர் எனவும் கூறப்பட்டுள்ளது.

தற்கொலை செய்து கொள்பவர்களில் 54 சதவீதத்தினர் 60 வயதை கடந்தவர்களாகவும், 70.8 சதவீதத்தினர் திருமணமான ஆண்களாகவும், 66.6 சதவீதத்தினர் திருமணமான பெண்களாகவும், 6.2 சதவீதத்தினர் மாணவர்களாகவும் உள்ளதாகவும் தெரிவித்துள்ள அந்த ஆய்வில், பெருநகரங்களை பொறுத்தவரை சென்னை முதல் இடத்தில் உள்ளதாகவும், இங்கு கடந்த ஒரு ஆண்டில் மட்டும் 2450 பேர் தற்கொலை செய்திருப்பதாகவும், அடுத்த படியாக பெங்களூரில் 2033 பேரும், டெல்லியில் 1753 பேரும், மும்பையில் 1322 பேரும் தற்கொலை செய்திருப்பதாகவும் கூறப்பட்டுள்ளது.