அமெரிக்காவில் எபோலா நோய்க்கு மருந்து

‘எபோலா’ வைரஸ் நோய், பாதித்த நாடுகளில் லைபீரியாவும் ஒன்று. இங்கு ஏராளமானவர்கள் பாதிக்கப்பட்டு உயிரிழந்து வருகின்றனர். இந்த நிலையில் அமெரிக்காவின் மாப்பயோ பாமாசூடிகல்ஸ் நிறுவனம் இந்த நோயை குணப்படுத்துக் கூடிய மருந்து தயாரித்துள்ளது.

அதற்கு ‘ஷ்மாப்’ என பெயரிடப்பட்டுள்ளது. சமீபத்தில் அமெரிக்காவை சேர்ந்த 2 சமூகநல ஆர்வலர்கள் ‘எபோலா’ நோயால் பாதிக்கப்பட்டனர். தற்போது அவர்கள் அமெரிக்காவில் சிகிச்சை பெற்று வருகின்றனர். கத்தோலிக்க கிறிஸ்தவ பாதிரியார் ஒருவரும் பாதிக்கப்பட்டு மாட்ரிட் ஆஸ்பத்திரியில் சிகிச்சை பெற்று வருகிறார்.

இவர்களுக்கு ‘ஷ்மாப்’ மருந்து மூலம் சிகிச்சை அளிக்கப்பட்டு வருகிறது. அதனால் அவர்களுக்கு ‘எபோலா’ நோய் குணமாகி வருகிறது. எனவே, இந்த மருந்தை தங்களுக்கு வழங்கும்படி அமெரிக்காவிடம் லைபீரியா அரசு கேட்டுள்ளது. பரிசோதனைக்குரிய அந்த மருந்து அடுத்த வாரம் லைபீரியாவுக்கு அனுப்பப்பட உள்ளது.

இந்த தகவலை லைபீரியா அதிபர் எல்லன் ஜான்சன் சர்லீப் தெரிவித்துள்ளார். முன்னதாக ஜெனீவாவில் உலக சுகாதார நிறுவனம் நடத்திய கூட்டத்தில் இது குறித்து விவாதிக்கப்பட்டது.

நைஜீரியாவில் இருந்து திரும்ப இந்திய டாக்டர்கள் விருப்பம்

எபோலா நோயாளிகளுக்கு சிகிச்சை அளிக்க வலியுறுத்துவதால் நைஜீரியாவில் இருந்து திரும்ப இந்திய டாக்டர்கள் விருப்பம் தெரிவித்துள்ளனர்.

‘எபோலா’ என்ற கொடிய வைரஸ் நோய் மேற்கு ஆப்பிரிக்காவின் நைஜீரியா, லைபீரியா, சியாறா லோன் உள்ளிட்ட நாடுகளை தாக்கியுள்ளன. இந்த நோய்க்கு இது வரை 2 ஆயிரம் பேர் பலியாகி உள்ளனர்.

இது ஒரு உயிர்க்கொல்லி நோய் என உலக சுகாதார நிறுவனம் அறிவித்துள்ளது. இந்த நோயை குணப்படுத்த மருந்து எதுவும் கண்டு பிடிக்கப்படவில்லை.

நைஜீரியாவில் இந்த நோய் அதிக அளவில் தாக்கியுள்ளது. இதனால் அங்குள்ள ஆஸ்பத்திரிகளில் நோயாளிகள் குவிந்த வண்ணம் உள்ளனர்.

இது ஒரு தொற்று நோய் என்பதால் சிகிச்சை அளிக்க டாக்டர்களும், நர்சுகளும், சுகாதார ஊழியர்களும் அஞ்சுகின்றனர். இதற்கிடையே சிகிச்சை அளித்த 80–க்கும் மேற்பட்ட டாக்டர்கள் மற்றும் ஊழியர்கள் மரணம் அடைந்துள்ளனர்.

எனவே நைஜீரியாவைச் சேர்ந்த டாக்டர்கள் பணிக்கு வர மறுத்து போராட்டத்தில் ஈடுபட்டுள்ளனர். அதனால் நோயாளிகளுக்கு சிகிச்சை அளிக்க போதுமான டாக்டர்கள் இல்லை. வெளிநாடுகளில் இருந்து வந்து தங்கி பணிபுரிபவர்கள் மூலம் சிகிச்சை அளிக்கப்பட்டு வருகிறது.

நைஜீரியா ஆஸ்பத்திரிகளில் பெரும்பாலான இந்திய டாக்டர்கள் பணிபுரிகின்றனர். அவர்களில் யோகேஷ் சந்திரா, தினேஷ்குமார், ஹேமந்த் ஜிங்கர், கபில் சவுகான் ஆகிய 4 பேர் அங்கு பணிபுரிய விரும்பவில்லை. இவர்கள் தலைநகர் அபுஜாவில் உள்ள பிரைமவுஸ் ஆஸ்பத்திரியில் பணிபுரிகின்றனர்.

தங்களையும் ‘எபோலா’ நோய் தாக்கும் என்ற அச்சத்தில் அங்கிருந்து நாடு திரும்ப முடிவு செய்துள்ளனர். ஆனால் அவர்களை அனுப்ப ஆஸ்பத்திரி நிர்வாகம் மறுக்கிறது. அவர்களின் பாஸ் போர்ட்டுகளை தர மறுத்து வருகின்றனர்.

இந்த தகவலை அவர்களது உறவினர்களுக்கு போன் மற்றும் இ.மெயில் போன்றவற்றின் மூலம் அனுப்பியுள்ளனர்.

இதுகுறித்து பிரிமஸ் ஆஸ்பத்திரியின் தலைமை அதிகாரி டாக்டர் என்.டி. குரானா கூறியதாவது:–

4 டாக்டர்களின் கோரிக்கையை ஏற்க முடியாது. நாங்கள் அபுஜா ஆஸ்பத்திரி கிளையுடன் தொடர்பில் இருக்கிறோம். எபோலா நோய் தங்களையும் தாக்கும் என இவர்கள் அஞ்சுகின்றனர். இது மருத்துவ துறைக்கு எதிரானது என்று தெரிவித்துள்ளார்.