பச்சடி வகை சமையல் குறிப்புகள்

**சிவா** · **சிவா** Mon Aug 11, 2014 3:20 am

First topic message reminder :

தக்காளி - தேங்காய் பச்சடி

தேவையானவை: புளிக்காத தயிர் - 1 கப், தேங்காய் துருவல் - அரை கப், தக்காளி (நல்ல சிகப்பு நிறம்) - 2, பச்சை மிளகாய் - 2, இஞ்சி - ஒரு சிறு துண்டு, உப்பு - தேவைக்கு. தாளிக்க: கடுகு - கால் டீஸ்பூன், எண்ணெய் - ஒன்றரை டீஸ்பூன்.

செய்முறை: இஞ்சி, பச்சை மிளகாய், தக்காளியை பொடியாக நறுக்கிக்கொள்ளுங்கள். இவற்றுடன் தேங்காய் துருவல், உப்பு சேர்த்து தயிருடன் ஒன்றாகக் கலந்து, எண்ணெயைக் காயவைத்து கடுகு தாளித்து சேருங்கள். விருப்பமுள்ளவர்கள், மல்லித்தழையை பொடியாக நறுக்கி சேர்க்கலாம். கோடைக்கு ஏற்ற குளுகுளு தயிர்பச்சடி இது.

(தேங்காயை மிக்ஸியில் ஒரு சுற்று சுற்றி எடுத்தும் சேர்க்கலாம்).

**சிவா** · **சிவா** Mon Aug 11, 2014 3:38 am

வெண்டைக்காய் புளி பச்சடி

தேவையானவை: பிஞ்சு வெண்டைக்காய் - கால் கிலோ, சின்ன வெங்காயம் - ஐந்தாறு, புளி - ஒரு சுளை, மஞ்சள் தூள் - ஒரு சிட்டிகை, மிளகாய்தூள் - அரை டீஸ்பூன், கடுகு - அரை டீஸ்பூன், உளுத்தம்பருப்பு - 2 டீஸ்பூன், வெங்காய வடகம் - 2, கறிவேப்பிலை, மல்லித்தழை - தலா சிறிதளவு, உப்பு - திட்டமாக, எண்ணெய் - 2 டேபிள்ஸ்பூன், தேங்காய் துருவல் - கால் மூடி, சீரகம் - கால் டீஸ்பூன்.

செய்முறை: வெண்டைக்காயைக் கழுவி இரண்டாக வகிர்ந்து பொடியாக நறுக்கவும். சின்ன வெங்காயத்தைப் பொடியாக நறுக்கவும். ஒரு வாணலியில் கொஞ்சம் எண்ணெய் விட்டு சின்ன வெங்காயத்தை வதக்கி, பிறகு வெண்டைக்காயைச் சேர்த்து நன்கு வதக்கவும். (காய் நன்கு வதங்கினால்தான் பச்சடி ருசியாக இருக்கும். இல்லை என்றால் ‘கொழகொழ’வென்று இருக்கும்).

புளியைக் கரைத்து விட்டு, மஞ்சள்தூள் போடவும். காய் வெந்ததும் தேங்காய், சீரகம் அரைத்துப் போட்டு ஒரு கொதி வந்ததும் இறக்கி, மல்லித்தழை நறுக்கிச் சேர்க்கவும். கடுகு, உளுத்தம்பருப்பு, வடகம், கறிவேப்பிலை தாளித்துக் கொட்டவும்.

**சிவா** · **சிவா** Mon Aug 11, 2014 3:38 am

மிக்ஸ்டு வெஜிடபிள் பச்சடி

தேவையானவை: மாங்காய் - கால் துண்டு, கேரட் - (சிறியது) - 1, தக்காளி - 1, பீட்ரூட் (சிறியது) - 1, பிஞ்சாக வெள்ளரிக் காய் - 1, பச்சை மிளகாய் - 4, கடுகு - கால் டீஸ்பூன், உளுத்தம்பருப்பு - ஒரு டீஸ்பூன், தயிர் - 2 கப், எண்ணெய் - ஒரு டேபிள்ஸ்பூன், உப்பு - திட்டமாக, மல்லித்தழை - சிறிதளவு.

செய்முறை: காய்கறிகளைப் பொடியாக நறுக்கவும். எண்ணெயில் கடுகு, உளுத்தம்பருப்பு, பச்சை மிளகாய், கறிவேப்பிலை தாளித்து காய்க் கலவையில் கொட்டி, உப்பு சேர்த்துக் கலக்கவும்.

தயிர், பொடியாக நறுக்கிய மல்லித்தழை சேர்த்துச் சாப்பிடவும். உடலுக்கு ஆரோக்கியம் தரும் பச்சடி இது.

**சிவா** · **சிவா** Mon Aug 11, 2014 3:39 am

நெல்லிக்காய் பச்சடி

தேவையானவை: பெரிய நெல்லிக்காய் - நான்கைந்து, பெருங்காயத்தூள் - 2 சிட்டிகை, தயிர் - ஒரு கப், பச்சை மிளகாய் - 2, தேங்காய் துருவல் - ஒரு டேபிள்ஸ்பூன், மல்லித்தழை - சிறிதளவு, உப்பு - திட்டமாக, கறிவேப்பிலை - 2 ஆர்க்கு, எண்ணெய் - ஒரு டேபிள்ஸ்பூன்.

செய்முறை: பச்சை மிளகாயை வதக்கிக்கொள்ளவும். நெல்லிக்காயை வதக்கி, கொட்டையை எடுத்துவிட்டு, சதைப் பாகத்துடன் உப்பு, வதக்கிய பச்சை மிளகாய், பெருங்காயம் சேர்த்து அரைக்கவும். அரைத்த நெல்லிக்காயைத் தயிரில் கலக்கவும். கடுகு, கறிவேப்பிலை தாளித்துக் கொட்டி, பொடியாக நறுக்கிய மல்லித்தழை சேர்க்கவும். தேங்காய் துருவலை அப்படியே சேர்க்கலாம். அல்லது நெல்லிக்காயுடன் அரைத்தும் கலக்கலாம்.

**சிவா** · **சிவா** Mon Aug 11, 2014 3:39 am

விளாம்பழ பச்சடி

தேவையானவை: விளாம்பழம் - 3, வெல்லம் - முக்கால் கப், கடுகு - கால் டீஸ்பூன், எண்ணெய் - ஒரு டேபிள்ஸ்பூன்.

செய்முறை: விளாம்பழத்தை உடைத்து ஓடு, நரம்பை அகற்றிவிட்டு நன்கு பிசையவும். பிசைந்த பழத்துடன் ஒரு டம்ளர் தண்ணீர் மற்றும் வெல்லம் சேர்த்துக் கொதிக்க விடவும். எண்ணெயைக் காயவைத்து, கடுகு தாளித்துக் கொட்டவும். அவரவர் தேவையை, விருப்பத்தைப் பொறுத்து வெல்ல அளவை கூட்டிக் குறைத்துக் கொள்ளலாம்.

**சிவா** · **சிவா** Mon Aug 11, 2014 3:39 am

புடலங்காய் தயிர் பச்சடி

தேவையானவை: புடலங்காய் - பாதி, பச்சை மிளகாய் - 2, சின்ன வெங்காயம் - ஐந்தாறு, கடுகு - அரை டீஸ்பூன், உளுத்தம்பருப்பு - 2 டீஸ்பூன், தேங்காய் துருவல் - ஒரு டேபிள்ஸ்பூன், உப்பு - திட்டமாக, கறிவேப்பிலை, மல்லித்தழை - தலா சிறிதளவு, எண்ணெய் - ஒரு டேபிள்ஸ்பூன்.

செய்முறை: மிகவும் இளசான புடலங்காயாகப் பார்த்து வாங்கவும். அதைப் மிகப் பொடியாக நறுக்கவும். பச்சை மிளகாயை நீளமாகவும், சின்ன வெங்காயத்தைப் பொடியாகவும் நறுக்கவும். எண்ணெயில் தாளிதம் போட்டு வெங்காயம், பச்சை மிளகாயை வதக்கிக் கொள்ளவும். இத்துடன் புடலங்காயை லேசாக வதக்கி, உப்பு சேர்த்துக் கலக்கவும். (அல்லது காயில் உப்பு பிசறி வைத்திருந்து தண்ணீரைப் பிழிந்து விட்டுப் பச்சையாகச் சேர்க்கலாம்). தேங்காய் துருவலையும் சேர்க்கவும். பரிமாறும்பொழுது தயிர், பொடியாக நறுக்கிய மல்லித்தழை சேர்க்கவும்.

**சிவா** · **சிவா** Mon Aug 11, 2014 3:40 am

நார்த்தங்காய் பச்சடி

தேவையானவை: சுமாரான அளவில் நார்த்தங்காய் - 2, மிளகாய்தூள் - அரை டீஸ்பூன், உப்பு - திட்டமாக, கடுகு - கால் டீஸ்பூன், கறிவேப்பிலை - சிறிதளவு, வெல்லத் தூள் - கால் கப், எண்ணெய் - ஒரு டேபிள்ஸ்பூன்.

செய்முறை: நார்த்தங்காயைப் பொடியாக நறுக்கி, எண்ணெய் விட்டு வதக்கி, பிரஷர் குக்கரில் வேகவைக்கவும். வாணலியில் கடுகு, கறிவேப்பிலை தாளித்து வெந்த நார்த்தங்காயைப் போட்டு உப்பு, மிளகாய்தூள், கொஞ்சம் தண்ணீர் சேர்த்துக் கொதிக்க விடவும். கடைசியாக வெல்லத் தூளைப் போட்டு, கரைந்ததும் இறக்கவும். பொதுவாக இந்தப் பச்சடிக்கே இனிப்பு கொஞ்சம் கூடுதலாகத் தேவைப்படும். எனவே, காயின் கசப்பைப் பொறுத்து வெல்லம் போட வேண்டும்.

Sponsored content · Sponsored content

பச்சடி வகை சமையல் குறிப்புகள்

பச்சடி வகை சமையல் குறிப்புகள்

Re: பச்சடி வகை சமையல் குறிப்புகள்

Re: பச்சடி வகை சமையல் குறிப்புகள்

Re: பச்சடி வகை சமையல் குறிப்புகள்

Re: பச்சடி வகை சமையல் குறிப்புகள்

Re: பச்சடி வகை சமையல் குறிப்புகள்

Re: பச்சடி வகை சமையல் குறிப்புகள்

Re: பச்சடி வகை சமையல் குறிப்புகள்

மறுமொழி எழுத நீங்கள் உறுப்பினராக இருக்க வேண்டும்..

உறுப்பினராக பதிவு செய்க

உள்நுழைக