மலேசிய விமானம் MH17 விபத்து: 295 பேர் பலி

295 பயணிகளுடன் கோலாம்பூர் நோக்கி பயணித்த மலேசிய விமானம், ரஷ்ய எல்லை அருகே விபத்துக்குள்ளானது.நெதர்லாந்து தலைநகர் ஆம்ஸ்டர்டாமிலிருந்து, மலேசிய தலைநகர் கோலாம்பூருக்கு போயிங் ரக மலேசிய விமானம் ஒன்று சென்று கொண்டிருந்தது. இந்த விமானம் உக்ரைன் நிலப்பரப்பில், ரஷ்ய எல்லைக்கு 50 கி.மீ.,க்கு முன்னால் விபத்துக்குள்ளானதாக, இன்டர்பேக்ஸ் செய்தி நிறுவனம் தெரிவித்துள்ளது. விமானம் உக்ரைன் நிலப்பரப்பில் பறந்து கொண்டிருந்த போது, ரஷ்ய எல்லைக்கு முன்னால் திடீரென தாழ்வாக பறந்ததாகவும், பின்னர் விமானத்தில் தீப்பிடித்து விமானம் விழுந்து நொறுங்கியதாகவும் முதற்கட்ட தகவல்கள் தெரிவிக்கின்றன.

சுட்டுவீழ்த்தப்பட்டதா?

உக்ரைனில் ரஷ்ய ஆதரவு படைகளுக்கு எதிராக அந்நாட்டு அரசுப்படைகள் நடத்திய தாக்குதலில் மலேசிய விமானம் சிக்கியிருக்கலாம் என சந்தேகங்கள் எழுந்துள்ளன. எனினும் இந்த தகவலை யாரும் உறுதிப்படுத்தவில்லை.

-- தினமலர்

மலேசிய ஏர்லைன்ஸ் விமானம் ரஷ்ய எல்லை அருகே விபத்துக்குள்ளான சம்பவம் குறித்து அறிந்த மலேசிய பிரதமர் நஜீப் ரசாக் கோலாம்பூர் விமான நிலையத்திற்கு விரைந்து சென்றார். அங்கு அதிகாரிகளுடன் ஆலோசனை நடத்திய அவர், கோலாலம்பூர் விமான நிலையத்தில் கன்ட்ரோல் ரூம் திறக்கவும் உத்தரவிட்டார்.

பயணம் செய்த 295 பேரும் இறந்துவிட்டனர்!   

'ஏவுகணைத் தாக்குதல்': உக்ரைனில் 295 பேருடன் விழுந்து நொறுங்கியது மலேசிய விமானம்

நெதர்லாந்தின் ஆம்ஸ்டர்டாமில் இருந்து கோலாலம்பூருக்கு 295 பேருடன் புறப்பட்ட மலேசிய விமானம், ரஷ்ய எல்லையில் உள்ள கிழக்கு உக்ரைன் பகுதியில் விழுந்து நொறுங்கியது.

இது, ஏவுகணைத் தாக்குதல் என்று உக்ரைனின் உள்துறை அமைச்சகத்தின் ஆலோசகர் ஆன்டன் கேராஷென்கோ தெரிவித்துள்ளார்.

விமானம் விழுந்து நொறுங்கியதை உறுதி செய்யும் விதமாக, எம்.எச்.17 விமானத்துடனான தொடர்பை இழந்துவிட்டதாக மலேசிய ஏர்லைன்ஸ் தெரிவித்துள்ளது. இது தொடர்பான விசாரணைக்கு மலேசிய பிரதமர் உத்தரவிட்டுள்ளார்.

கோலாலம்பூருக்குப் புறப்பட்ட போயிங் 777 ரக விமானத்தில் 280 பயணிகளும், விமானப் பணிக்குழுவைச் சேர்ந்த 15 பேரும் இருந்ததாக அதிகாரிகள் தெரிவித்தனர்.

கிழக்கு உக்ரைன் பகுதியில் மலேசிய விமானம் விழுந்ததாக மாஸ்கோவில் உள்ள ரஷ்ய விமானத் துறை வட்டாரங்கள், ராய்ட்டர்ஸ் செய்தி நிறுவனத்திடம் தெரிவித்தாக தகவல்கள் வெளியாகியுள்ளன.

இந்தச் சம்பவம் தொடர்பாக தங்களுக்கு தகவல் வந்துள்ளதாகவும், மலேசிய விமானத்தின் நிலை குறித்து அறிய, துரித நடவடிக்கைகள் முடுக்கிவிடப்பட்டுள்ளதாகவும் இங்கிலாந்து வெளியுறவுத் துறை தெரிவித்துள்ளது.

கடைசியாக கிடைத்த தகவலின்படி, மலேசிய விமானம் விழுந்து நொறுங்கியதை உக்ரைன் அரசு உறுதி செய்தது.

ஏவுகணைத் தாக்குதல்: உக்ரைன் தகவல்

ஏவுகணைத் தாக்குதல் மூலமே மலேசிய விமானம் சுட்டு வீழ்த்தப்பட்டதாக, உக்ரைன் உள்துறை அமைச்சகத்தின் ஆலோசகர் ஆன்டன் கேராஷென்கோ தெரிவித்துள்ளார்.

மலேசிய விமானம் விழுந்து நொறுங்கிய கிழக்கு உக்ரைன் பகுதி, கிளர்ச்சியாளர்கள் வசிக்கும் ஷக்டார்ஸ்க் நகருக்கு அருகில் இருக்கிறது.

ரஷ்ய ஆதரவு பிரிவினைவாத கிளர்ச்சியாளர்கள்தான் இந்தத் தாக்குதலை நடத்தியதாக உக்ரைன் தரப்பு குற்றம்சாட்டுகிறது.

கடந்த சில வாரங்களாக, உக்ரைன் ராணுவ விமானங்களை, கிளர்ச்சியாளர்கள் தொடர்ந்து சுட்டு வீழ்த்தி வந்ததாகவும், அவர்களுக்கு ரஷ்ய ராணுவம் ஆயுதங்களை வழங்கி வந்ததாகவும் உக்ரைன் தரப்பில் இருந்து குற்றச்சாட்டுகள் உள்ளன. ஆனால், கிளர்ச்சியாளர்களுக்கு தாங்கள் உதவவில்லை என்று ரஷ்ய தரப்பு மறுப்பு வெளியிட்டு வருவது கவனிக்கத்தக்கது.

முன்னதாக, கடந்த மார்ச் 8-ம் தேதி 5 இந்தியர்கள் உட்பட 239 பேருடன் புறப்பட்ட எம்.எச்.370 மலேசிய விமானம் மாயமாகி, இன்று வரை அதன் நிலை தெரியாதது குறிப்பிடத்தக்கது.

அடப்பாவமே, அத்தனை உயிர்களும் போய் விட்டதா? என்ன கொடுமை கடவுளே.. ஆழ்ந்த இரங்கல்கள் உயிர் நீத்த அத்தனை ஆன்மாக்களது குடும்பத்திற்கு.

உக்ரைன் அதிபர் பெட்ரோ போரோஷெங்கோ, நாங்கள் எந்தன் விமானத்தையும் சுட்டு வீழ்த்தவில்லை, நிகழ்ந்த விபத்திற்கு ஆழ்ந்த வருத்தத்தைத் தெரிவித்துக் கொள்கிறேன் எனக் கூறியுள்ளார்!

விமானம் விழுந்து நொறுங்கிய இடத்தில் எரிந்த நிலையில் விமானத்தின் பாகங்களும், பயணிகளின் சடலங்களும் கிடப்பதாக தற்போது தகவல்கள் வெளிவந்துள்ளன.

ரஷ்ய அதிபர் விளாடிமர் புதின் விமானம் வீழ்த்தப்பட்டது தொடர்பாக பிரதமர் நஜிப்பிடம் தனது ஆழ்ந்த அனுதாபத்தை தெரிவித்துள்ளார்.

மேலும், விமானம் தொடர்பாக அமெரிக்க அதிபர் ஒபாமாவிடம் தொலைபேசியில் பேசியதாக வெள்ளை மாளிகை தகவல் வெளியிட்டுள்ளது.

மலேசியா ஏர்லைன்ஸ் எம்எச்17 விமானம் விழுந்து நொறுங்கிய செய்தி கேட்டு தான் மிகவும் அதிர்ச்சி அடைந்திருப்பதாக பிரதமர் நஜிப் தனது பேஸ்புக் பக்கத்தில் தெரிவித்துள்ளார்.

விரைவில் விசாரணை தொடங்கப்படும் என்றும் தெரிவித்துள்ளார்.