கொசுவை விரட்டும் நொச்சி!

'சீட் டிரஸ்ட்' என்ற அறக்கட்டளை மூலம், கொசுக்களை அழிக்க உதவும் நொச்சி கன்றுகளை உருவாக்கி, பொதுமக்களுக்கு வழங்கி வரும், அதன் நிர்வாக அறங்காவலர், ரட்சகன்: கிராம மக்களின் வாழ்வாதாரம் மேம்படவும், மக்கள் நோய்வாய்ப்படாமல் சுகாதாரமாக வாழவும், 'சீட் டிரஸ்ட்' என்ற அறக்கட்டளையை உருவாக்கி, பல்வேறு முயற்சிகளை, பல ஆண்டுகளாக மேற்கொண்டு வருகிறோம். மழைக்காலங்களில், கொசுக்களின் தொல்லை நாளுக்கு நாள் அதிகரித்து வருகிறது.நொச்சி செடியை வளர்ப்பதால், இயற்கையான முறையில் கொசு பெருக்கத்தை தடுக்க முடியும் என, சென்னை மாநகராட்சி, கடந்த ஆண்டு அறிவித்தது. அதனால், நொச்சி செடிகளை உருவாக்குவதற்கான மாநகராட்சி, 'டெண்டரில்' லாப நோக்கமின்றி நாங்களும் பங்கேற்று, நொச்சி செடிகளை வளர்த்து வருகிறோம்.இதற்காக, உளுந்துார்பேட்டை அருகே உள்ள, சேந்தமங்கலம் கிராமத்தில், 1 லட்சம் நொச்சி கன்றுகளை உருவாக்கியுள்ள நாங்கள், வருங்காலங்களில், இன்னும் பல லட்சம் கன்றுகளை உருவாக்க முயற்சித்து வருகிறோம். இவற்றை, வரும் மழைக்காலம் துவங்குவதற்குள், சென்னையில் உள்ள குடிசை பகுதிகள், பூங்காக்கள் மற்றும் கூவம் நதிக்கரை ஓரங்களில் நட்டு, கொசுக்களின் பெருக்கத்தை குறைக்க முடிவு செய்துள்ளோம்.



நொச்சி செடி வளர்ப்பில் ஈடுபட, நன்றாக வளர்ந்துள்ள நொச்சி செடியிலிருந்து,குச்சிகளை வெட்டியெடுக்க வேண்டும். பின், அக்குச்சிகளை முக்கால் அடி நீளத்திற்கு, மூன்று கணுக்கள் உள்ளபடி, சாய்வாக வெட்டி, அடிப்பகுதியை, 'திரைவ் மேட்' என்ற ரசாயன திரவத்தில் நனைக்க வேண்டும்.பின், அவற்றை குழித்தட்டில் வைத்து, தேங்காய் நார்களால் நிரப்பி, வெள்ளை நிற சாக்கால் மூடப்பட்ட குழிக்குள் வைத்து, தினந்தோறும் இருவேளை நீர் பாய்ச்ச வேண்டும். 21 நாட்களுக்கு பின், 8க்கு 6 அங்குலம் அளவுள்ள கருப்பு நிற, 'பாலிதீன் பை'யினுள் செம்மண், எரு மற்றும் மணலை சம அளவு நிரப்ப வேண்டும்.பின், குழித்தட்டில் உள்ள செடிகளை அதில் வைத்து, நிழல் வலை போடப்பட்ட குடிலுக்குள் வைத்து, 25 முதல் 30 நாட்கள் வரை பாதுகாக்க வேண்டும். பின், வெயில் பட வைத்து, தேவையானவர்களுக்கு விற்பனை செய்யலாம்.நொச்சி இலையை நெருப்பில் காட்டி, அதில் வரும் புகையின் மூலமும் கொசுக்களை அழிக்கலாம். மேலும், அதை சுவாசிப்பதன் மூலம், சுவாச நோய்களுக்கு தீர்வு கிடைக்கும். மக்கள் மத்தியில், கிருமி நாசினியாக செயல்படும் நொச்சி செடிக்கு, தற்போது நல்ல வரவேற்பு உள்ளதால், விவசாயிகள் நொச்சி கன்றுகளை லாப நோக்கிலும் பயிரிடலாம்.