சத்தீஸ்கர் அரசு மருத்துவமனையில் உள்ள ஐ.வி. திரவத்தில் பூஞ்சை

சத்திஸ்கர் மாநிலத்தின் தலைநகரான ராய்ப்பூரின் அரசு மருத்துவமனையில் சமீபத்தில் நோயாளிகளுக்கு நரம்பு வழியாக செலுத்தப்படும் ஐ.வி. திரவத்தை சோதித்துப் பார்த்த சில மருத்துவர்கள் அதில் பூஞ்சை படிந்திருந்ததைக் கண்டு அதிர்ச்சியடைந்து உடனடியாக நிர்வாகத்திடம் தெரிவித்துள்ளனர். சத்திஸ்கர் மருத்துவ சேவைக்கழகம் மூலம் மாநிலம் முழுவதிலும் உள்ள அரசு மருத்துவமனைகளுக்கு இந்த பாட்டில்கள் சப்ளை செய்யப்பட்டிருந்தது தெரியவந்தது.

மொத்தம் ஒரு கோடி ரூபாய் மதிப்பு கொண்ட 2.5 லட்சம் பாட்டில்கள் இதுபோல் அனுப்பி வைக்கப்பட்டிருந்தன என்றும், மத்தியப் பிரதேசத்தில் உள்ள டி.ஜே. ஆய்வகம் இந்த உற்பத்தியை மேற்கொண்டிருந்தது என்பதுவும் விசாரணையில் தெரியவந்தது.

சப்ளை செய்யப்பட்ட மொத்தம் 98 பிரிவுகளும் திரும்பப் பெறப்பட்டு அகமதாபாத், பெங்களூர் மற்றும் டெல்லியில் உள்ள தரப் பரிசோதனை நிலையங்களுக்கு அனுப்பப்பட்டுள்ளன. இது மாநில அளவில் நடந்துள்ள மிகப் பெரிய தவறு என்று குறிப்பிடும் அதிகாரிகள், சப்ளை செய்யப்பட்ட பிரிவுகளில் குறைந்தது மூன்று தொகுப்புகளாவது வீணாகியிருக்கவேண்டும் என்று கருதுகின்றனர்.

ஐ.வி. திரவங்கள் திரும்பப் பெறப்பட்டதை உறுதி செய்துள்ள மருத்துவ சேவைக்கழகத்தின் நிர்வாக இயக்குனர் பிரதாப் சிங் தரப் பரிசோதனைகள் முடிந்த பின்னரே இவை அரசு மருத்துவமனைகளுக்கு அனுப்பப்பட்டதாகத் தெரிவித்தார். சோதனையின்போது தவறான முடிவு எதுவும் கிடைக்கவில்லை என்று கூறிய சிங் தற்போது அனுப்பப்பட்டுள்ள சோதனைகளின் முடிவுகள் இன்னும் இரண்டு வாரங்களில் எதிர்பார்க்கப்படுகின்றது என்றார்.

இதனிடையில் இந்த திரவத்தின் தயாரிப்புப் பணியில் ஈடுபட்டிருக்கும் டி.ஜே. ஆய்வகம் தரப் பரிசோதனை ஆய்வுகளை மேற்கொள்ள தங்கள் ஊழியர்களையும் அனுப்பியுள்ளதாகத் தெரிவித்துள்ளது. சில நேரங்களில் போக்குவரத்தின்போதோ அல்லது பாதுகாக்கப்படும்போதோ பெட்டிகள் உடைய நேர்ந்தால் இவ்வாறான விளைவுகள் ஏற்படக்கூடும் என்று அவர் குறிப்பிட்டார்.

அய்யோ என்ன இது அதிர்ச்சியா இருக்கு.