இலங்கையில் இருந்து தமிழக மீனவர்களின் படகுகள் மூலம் ஊடுருவ தீவிரவாதிகள் திட்டம்?

கன்னியாகுமரி,

இலங்கையில் இருந்து கடல்வழியாக தமிழக மீனவர்களின் படகுகள் மூலம் பாகிஸ்தான் தீவிரவாதிகள் தமிழகத்திற்குள் ஊடுருவ திட்டமிட்டுள்ளதாக உளவுத்துறை எச்சரிக்கை விடுத்துள்ளது.

பாகிஸ்தானில் பயிற்சி பெற்ற 6 தீவிரவாதிகள் இலங்கையில் இருந்து கடல் வழியாக தமிழகத்திற்குள் ஊடுருவி நாச வேலைக்கு திட்டமிட்டுள்ளதாக மத்திய உளவுத்துறை எச்சரிக்கை விடுத்துள்ளது. இதைத் தொடர்ந்து நேற்று இரவு முதல் தமிழகத்தின் கடலோர பகுதிகளில் போலீசார் தீவிர கண்காணிப்பு மற்றும் சோதனையில் ஈடுபட்டுள்ளனர்.

குமரி மாவட்டத்தில் ஆரோக்கியபுரம் முதல் நீரோடி வரையுள்ள கடற்கரை கிராமங்களில் நள்ளிரவு முதல் போலீசார் கண்காணிப்பில் ஈடுபட்டு வருகின்றனர். மாவட்டத்திற்குள் வரும் வாகனங்கள் அனைத்தும் தீவிர சோதனைக்கு பிறகே அனுமதிக்கப்பட்டு வருகின்றன.

கன்னியாகுமரி, சின்னமுட்டம், குளச்சல், தேங்காப்பட்டணம், கொல்லங்கோடு, முட்டம் உள்ளிட்ட பகுதிகளில் கூடுதலாக சிறப்பு சோதனை சாவடிகள் அமைக்கப்பட்டு, கடற்கரை கிராமங்களுக்குள் சென்று திரும்பும் அனைத்து வாகனங்களும் சோதனை செய்யப்பட்டு வருகிறது.

அதுபோல சுற்றுலா தலமான கன்னியாகுமரியில் கூடுதல் போலீஸ் பாதுகாப்பு போடப்பட்டுள்ளது. கடலின் நடுவே அமைந்துள்ள விவேகானந்தர் மண்டபம், திருவள்ளுவர் சிலை ஆகியவற்றிலும் துப்பாக்கி ஏந்திய போலீசார் பாதுகாப்பு பணியில் நிறுத்தப்பட்டு இருந்தனர். மேலும், சின்னமுட்டம், கோவளம், மணக்குடி, ஆரோக்கியபுரம், ராஜாக்கமங்கலம்துறை கடற்கரை பகுதிகளிலும் போலீசார் விடிய விடிய ரோந்து சுற்றி வந்தனர்.

இதற்கிடையே பாகிஸ்தான் தீவிரவாதிகள் இந்திய எல்லைக்குள் வந்து நாட்டு படகில் செல்லும் தமிழக மீனவர்களை தாக்கி அந்த படகு மூலம் நுழைய திட்டமிட்டு இருப்பாகவும் தெரியவந்துள்ளது. எனவே, மீனவர்கள் யாரும் தனியாக மீன்பிடிக்க செல்ல வேண்டாம் என்றும், யாராவது சந்தேகப்படும் படி இருந்தால் உடனடியாக தகவல் தெரிவிக்க வேண்டும் என்றும் போலீசார் கூறியுள்ளனர்.
தினத்தந்தி.......