ராக்கெட் விண்ணில் செலுத்துவதை பார்வையிட பிரதமர் நாளை சென்னை வருகை

ஸ்ரீஹரிகோட்டாவில் இருந்து 30-ந் தேதி பி.எஸ்.எல்.வி சி-23 ராக்கெட் காலை 9.52 மணிக்கு ஏவப்படுகிறது. இதனை பார்வையிடுவதற்காக பிரதமர் நரேந்திர மோடி நாளை சென்னை வருகிறார். விமான நிலையத்தில் 7 அடுக்கு பாதுகாப்பு போடப்பட்டுள்ளது.

ஆந்திர மாநிலம் ஸ்ரீஹரிகோட்டாவில் உள்ள சதீஷ்தவான் ஏவுதளத்தில் இருந்து பி.எஸ்.எல்.வி. சி-23 ராக்கெட் மூலம் 30-ந் தேதி வெளிநாட்டை சேர்ந்த 5 செயற்கைகோள்கள் அனுப்பப்பட உள்ளன. இந்த ராக்கெட் அன்று காலை 9.49 மணிக்கு விண்ணில் செலுத்தப்படுவதாக இருந்தது. அதற்கு பதிலாக 3 நிமிடம் தாமதமாக காலை 9.52 மணிக்கு ஏவப்படும் என்று இஸ்ரோ தலைவர் விஞ்ஞானி கே.ராதாகிருஷ்ணன் அறிவித்துள்ளார்.

முன்னதாக நேற்று காலை ராக்கெட் தயார்நிலை குறித்த ஆய்வுக்கூட்டம் நடைபெற்றது. அப்போது சில உறுப்பினர்கள், ‘விண்வெளியில் புவி வட்டப்பாதையில் மிதக்கும் பழைய ராக்கெட்டுகள், செயற்கைகோள்கள் போன்றவற்றின் எஞ்சிய கழிவுகள், விண்வெளி கழிவுகள் ஆகியவை ஒன்று சேர்ந்து சுற்றிவருகிறபோது, அவை ராக்கெட் பாதையில் குறுக்கிடக்கூடும் என்பதால் ராக்கெட்டை சற்று தாமதமாக செலுத்தவேண்டும் என்று சிபாரிசு செய்தனர்.

இதையடுத்து ராக்கெட் விண்ணில் ஏவப்படும் நேரம் 3 நிமிடம் தள்ளிவைக்கப்பட்டதாக இஸ்ரோ தலைவர் கே.ராதாகிருஷ்ணன் தெரிவித்தார்.

பி.எஸ்.எல்.வி. சி-23 ராக்கெட் விண்ணில் செலுத்தப்படுவதை பார்வையிடுவதற்காக பிரதமர் நரேந்திர மோடி சிறப்பு விருந்தினராக வருகிறார். இதற்காக அவர் சென்னைக்கு தனி விமானத்தில் வந்து, பின்னர் ஸ்ரீஹரிகோட்டாவுக்கு ஹெலிகாப்டரில் செல்கிறார். நரேந்திர மோடி பிரதமராக பதவி ஏற்றபின்னர் தமிழ்நாட்டுக்கு வருவது இதுவே முதல் முறை என்பது குறிப்பிடத்தக்கது.

இதற்காக பிரதமர் நரேந்திர மோடி நாளை(ஞாயிற்றுக்கிழமை) பகல் 1 மணிக்கு டெல்லியில் இருந்து தனி விமானத்தில் சென்னைக்கு புறப்படுகிறார். மாலை 3.30 மணிக்கு மீனம்பாக்கம் பழைய விமான நிலையம் வந்து சேருகிறார். அங்கு முக்கிய பிரமுகர்கள் வரவேற்பு அளிக்கின்றனர்.

மாலை 3.45 மணிக்கு தனி ஹெலிகாப்டரில் ஸ்ரீஹரிகோட்டாவுக்கு புறப்பட்டு செல்கிறார். இரவு ஸ்ரீஹரிகோட்டாவில் தங்குகிறார். நாளை மறுநாள்(30-ந் தேதி) ஸ்ரீஹரிகோட்டாவில் பி.எஸ்.எல்.வி. சி-23 ராக்கெட் விண்ணில் ஏவப்படும் நிகழ்ச்சியில் பங்கேற்கிறார். பின்னர் காலை 11 மணிக்கு தனி ஹெலிகாப்டரில் சென்னை மீனம்பாக்கம் பழைய விமான நிலையம் வந்து சேருகிறார்.

அங்கு அவருக்கு வரவேற்பு அளிக்கப்பட்டு டெல்லிக்கு வழியனுப்பி வைக்கப்படுகிறார். காலை 11.15 மணிக்கு தனி விமானத்தில் பிரதமர் நரேந்திர மோடி டெல்லிக்கு புறப்பட்டு செல்கிறார்.

பிரதமர் நரேந்திர மோடி சென்னை வருவதையொட்டி டெல்லியில் இருந்து சிறப்பு பாதுகாப்பு படையினர் சென்னை வந்து பாதுகாப்பு பணிகளை கண்காணித்து வருகின்றனர். விமான நிலையத்தில் 7 அடுக்கு பாதுகாப்பு போடப்பட்டு உள்ளது. தீவிர ரோந்து பணியில் துப்பாக்கி ஏந்திய பாதுகாப்பு படையினர் ஈடுபட்டு உள்ளனர்.

பிரதமர் பயணத்துக்காக குண்டு துளைக்காத 4 விமானப்படை ஹெலிகாப்டர்களும் சென்னை பழைய விமான நிலையத்தில் தயாராக உள்ளன.