விலங்குகளை தனது கட்டுப்பாடுக்குள் கொண்டுவரும் ஹிட்லரின் திட்டம்

நாசி படைகளை கொண்டு யூதர்களை கொன்று குவித்தவர் சர்வாதிகாரி ஹிட்லர். இவர் மிருக இனத்தை தனது கட்டுப்பாட்டிற்குள் கொண்டு வர எடுத்துள்ள முயற்சி வெளி உலகிற்கு தெரியாமல் இருந்துள்ளது. இதனை நேஷனல் ஜியாகிரபிக் சேனல் ஆவண படமாக எடுத்துள்ளது. அதில், ஜுராசிக் பார்க் படத்தில் வருவது போன்று மிருகங்களை தங்களுக்கு சாதகமாக பயன்படுத்தி கொள்வது குறித்த தகவல் தெரிவிக்கப்பட்டு உள்ளது. ஆனால், படத்தில் வருவது டைனோசர்கள்.

இதில், பழங்கால மிருகங்களை உயிர்ப்பிக்க நாசிக்கள் முடிவெடுத்து உள்ளனர். அதனை அவர்கள் வேட்டையாட பயன்படுத்தி கொள்வதற்காக இந்த முடிவை எடுத்துள்ளனர். இந்த திட்டத்தை செயல்படுத்த பின்னணியாக இருந்தவர்கள் விலங்கியலாளர்கள் லட்ஸ் மற்றும் ஹெயின்ஸ் ஹெக். இவர்கள் நாசிக்கள் ஆட்சிக்கு வருவதற்கு முன்பு தனியார் திட்டமாக இதனை தொடங்கி உள்ளனர். அதன் பின் குறுகிய காலத்திற்குள் ஹிட்லரின் இரண்டாவது படை தளபதியாக விளங்கிய ஹெர்மான் கோரிங் என்பவரை லட்ஸ் நண்பராக்கி கொண்டார்.

20 ஆயிரம் மக்கள் வெளியேற்றம்

இந்த திட்டத்திற்கு இரு நோக்கங்கள். ஒன்று விலங்குகள். மற்றொன்று நிலம். விலங்குகளில் அவர்கள் இரண்டை தேர்வு செய்துள்ளனர். அவற்றில் ஒன்று ஆரோக். இது மிக பெரிய அளவிலான, காட்டு பகுதியில் வளரும் கால்நடையாகும். மற்றொன்று தர்பான். தற்பொழுது உள்ள குதிரை இனத்தின் மூதாதையரான இது ஆக்ரோஷமான மற்றும் காட்டு பகுதி விலங்காகும். அதன் பின் நிலம். இந்த திட்டத்திற்கு நாசிக்கள் தேர்வு செய்த பகுதி போலந்து நாட்டில் உள்ள பையலோவீசா வன பகுதி ஆகும். இங்கு ஏராளமான ஓநாய்கள் தங்களது வாழ்விடத்தை அமைத்து இருந்து உள்ளன.

அதிக அளவிலான காட்டு பூனைகள், ஐரோப்பிய மானினத்தை சேர்ந்த காட்டு மான்கள் மற்றும் ஐரோப்பிய காட்டு எருதுகள் ஆகியவையும் அங்கு இருந்து உள்ளன. இந்த திட்டத்தை முடிக்க அவர்களுக்கு நீண்ட காலம் தேவைப்படவில்லை. அவர்கள் போலந்து நாட்டை படை எடுத்து கைப்பற்றியதுடன் நிலத்தை கையகப்படுத்துவது எளிதானது. அதன்பின் தங்களுக்கே உரிய முறையில் இடத்தை தூய்மைப்படுத்தினர். அதாவது 3 வருடங்களில் அங்கு வசித்த 20 ஆயிரம் மக்களை அப்புறப்படுத்தினர்.

இயற்கை வன பகுதி

அதில் பெரும்பாலான யூத இன மக்களும் இருந்தனர். அங்கு வசித்தவர்கள் அங்கேயே தலை துண்டிக்கப்பட்டனர். அல்லது முகாம்களுக்கு அனுப்பப்பட்டனர். நிலம் கிடைத்து விட்டது. விலங்குகளுக்கு என்ன செய்வது? அதற்கு 14 வருடங்கள் ஆகியுள்ளது. இதற்காக லட்ஸ் ஹெக் ஆரோக் இன விலங்கின் எண்ணிக்கையை அதிகரிக்க முடிவு செய்தார். அதனை காட்டு பகுதியில் உடனடியாக அனுப்பி வைத்தார்.

உடலளவில், இது பழங்கால விலங்கினத்தை ஒத்ததாக இருந்தாலும், வேறு எந்த கால்நடையோடும் மரபு வழியே நெருங்கியிருக்கவில்லை என ஆராய்ச்சியாளர்கள் கூறுகின்றனர். போலந்து மற்றும் பெலாரஸ் நாடுகளுக்கு இடையே மிக பெரிய இயற்கை வன பகுதியாக இன்று இந்த பகுதி உள்ளது. அரிதாக உள்ள காட்டு எருது இனம் உட்பட பல அரிதான விலங்குகளின் மிக பெரும் புகலிடமாகவும் இது விளங்கி வருகிறது.

அப்படியெனில், நாசிக்களின் திட்டப்படி ஆரோக் விலங்குகளின் நிலை என்ன? அது இன்னும் தெரியாத புதிராகவே உள்ளது. எனினும், சோவியத் அதிகாரிகள் அல்லது சிப்பாய்களால் அவை கொல்லப்பட்டு இருக்க கூடும் என கருதப்படுகிறது. ஹிட்லரின் ஜுராசிக் மான்ஸ்டர்ஸ் நிகழ்ச்சி ஆனது நேஷனல் ஜியாகிரபிக் சேனலில் நாளை (வெள்ளிக்கிழமை) மதியம் ஒரு மணியளவில் ஒளிபரப்பாகிறது.