உயிருக்கு உயிராக - திரைவிமர்சனம்

நடிகர்: சஞ்சீவ், சரண்குமார் , பிரபு, ஸ்ரீரஞ்சனி,
நடிகை: நந்தனா,பிங்கி
இயக்குனர்: மனோஜ்குமார்
இசை:ஷாந்தகுமார்ஊட்டியில், மெழுகுவர்த்தி கடை நடத்தி வரும் பிரபு&ஸ்ரீரஞ்சனி தம்பதிக்கு சஞ்சீவ், சரண்குமார் என்று இரண்டு மகன்கள். சஞ்சீவ், சாப்ட்வேர் என்ஜினீயர். மூளை நினைப்பதை படம் பிடித்து காட்டும் 'சாப்ட்வேர்'ஐ கண்டுபிடிக்கிறார். அவரை காதலிக்கும் நந்தனா, அவருடன் இணைந்து 'பிராஜக்ட்' செய்ய விரும்புகிறார். அவரை, சஞ்சீவ் தவிர்க்கிறார்.

அதை பிரியா விரோதமாக எடுத்துக்கொண்டு, தன்னை தவிர்த்த சஞ்சீவையே காதலிக்க வைக்கிறார். பணக்கார மாப்பிள்ளை கிடைத்ததும், சஞ்சீவ் காதலை துண்டிக்கிறார். சஞ்சீவின் பாஸ்போர்ட்டை கிழித்துப்போட்டு அவர் வாழ்க்கையையே அழித்து விடுகிறார். நியாயம் கேட்கப்போன பிரபு, ஸ்ரீரஞ்சனி இருவரையும் கம்பி எண்ண வைக்கிறார்.

அதைப்பார்த்து சஞ்சீவ் தற்கொலை செய்து கொள்கிறார். அண்ணனின் மரணம் சரண்குமாருக்குள் பாதிப்பை ஏற்படுத்துகிறது. காதல் என்றாலே வெறுக்கிறார். அவருடைய வாழ்க்கையில், கவர்னரின் பேத்தி பிங்கி குறுக்கிடுகிறார். பிங்கியின் காதலை சரண்குமார் ஏற்க மறுப்பதுடன், நன்றாக படித்து கல்லூரியிலேயே முதல் மாணவராக வருகிறார். மற்ற நாடுகளின் விண்கலத்தை கட்டுப்படுத்தக்கூடிய 'ஸ்பேஸ் ஆர்மி'யை கண்டுபிடிக்கிறார்.

அவருக்கு கோடிக்கணக்கான சம்பளத்துடன் வேலை கொடுக்க வெளிநாடுகள் போட்டி போடுகின்றன. அந்த வாய்ப்புகளை சரண்குமார் ஏற்றுக்கொண்டாரா, இல்லையா? என்பது படத்தின் உச்சக்கட்ட காட்சி.

பிரபுவும், ஸ்ரீரஞ்சனியும் அன்பான அப்பா-அம்மாவாக கண்ணுக்குள் நிற்கிறார்கள். சஞ்சீவுக்காக நந்தனாவை பெண் கேட்டுப்போகும்போதும், நந்தனாவை அழைத்து வந்து சஞ்சீவுடன் சேர்க்கும்போதும் பொறுப்புள்ள அப்பா-அம்மாவாக மனதில் இடம் பிடிக்கிறார்கள்.

சஞ்சீவ், அப்பா-அம்மா மீது பாசம் கொண்ட மகனாக, கண்ணியமான காதலராக நெஞ்சில் நிறைகிறார். மலேசியாவில், காதலியால் தான் ஏமாற்றப்பட்டதை எண்ணி கலங்கும்போதும், அப்பா-அம்மா இருவரையும் போலீஸ் நிலையத்தில் கைதிகளாக பார்க்கும்போதும், கலங்க வைக்கிறார்.சஞ்சீவின் தம்பியாக வரும் சரண்குமாரிடம் பொறி தெரிகிறது. அண்ணனின் நினைவாக அவர் வைத்திருக்கும் கிதாரை நண்பன் உடைத்ததும் அவன் மீது சீறிப்பாயும்போது, ஆக்ரோஷம்.

நந்தனா, முகவசீகரம் கொண்ட கதாநாயகி. உடம்பில், முப்பதை தாண்டிய முதிர்ச்சி. நல்ல பெண் போல் நடித்து, பழிவாங்கும் வில்லியாக மாறுகிற கதாபாத்திரம். பொருத்தமான தேர்வுதான். இவருக்கு போட்டியாக பிங்கியும் கொழுக் மொழுக் என்று மப்பும் மந்தாரமுமாக தெரிகிறார். ஷாந்தகுமாரின் இசையில், ''எனக்கு தெரியாமல் எங்கிருந்தாய்'' பாடல் மீண்டும் மீண்டும் கேட்க தூண்டுகிற மெலடி. பின்னணி இசை, காட்சிகளுக்கு வலு சேர்த்து இருக்கிறது. பாடல் காட்சிகளுக்காக தேர்ந்தெடுக்கப்பட்ட இடங்களும், படப்பிடிப்பும் கண்களுக்கு விருந்து. பிரபு தன் மகனுக்கு காதலி தேடுவது போல் ஜாலியாக கதையை ஆரம்பிக்கிறார், டைரக்டர் மனோஜ்குமார்.

இடைவேளை வரை காதலும், கலகலப்புமாக போகிறது படம். இடைவேளைக்குப்பின், எதிர்பாராத திருப்பங்களுடன் படம் வேகம் பிடிக்கிறது.

மகனுக்கு தந்தையே காதலி தேடுவதும், சரண்குமார் கவர்னர் தங்கியிருக்கும் விடுதிக்குள் போய் அவருடைய ஊழியர்களை பிரித்து மேய்வதும், மிகையான கற்பனை.

படத்தின் உச்சக்கட்ட காட்சி, அறிவுப்பூர்வமான சிந்தனை.

தினத்தந்தி