எம்.பி.ஏ மாணவர் போலி என்கவுன்டர் - 17 காவல் துறையினருக்கு ஆயுள் தண்டனை

2009 ஆம் ஆண்டு டெஹ்ராடூனில் ரன்பீர்சிங் என்ற எம்.பி.ஏ. மாணவர் காவல் துறையினரால் சுட்டுக்கொல்லப்பட்ட வழக்கில் குற்றம் சாற்றப்பட்ட 17 காவல் துறையினருக்கும் ஆயுள் தண்டனை விதித்து தீர்ப்பளிக்கப்பட்டது.
 
காசியாபாத்தை சேர்ந்த 22 வயது ரன்பீர் சிங் சமூக விரோத செயலில் ஈடுபட்டதாகவும், அவர் காவல் துறையினரிடம் தப்பிக்க முயன்றதால் அவரை சுட்டு கொன்றதாகவும் தெரிவிக்கப்பட்டது.
 
ஆனால் டெஹ்ராடூனில் வேலைக்கு சேர தயாராகிக்கொண்டிருந்த ரன்பீரை உத்தரகாண்ட் காவல்துறையினர் போலி என்கவுன்டர் செய்ததாக புகார் எழுந்தது. இதையடுத்து, இவ்வழக்கில் விசாரணை மேற்கொண்ட சிபிஐ 18 காவல் துறையினர் மீது வழக்கு பதிவு செய்தது.
 
விசாரணை முடிவில் ரன்பீர் சிங்கின் போனில் சந்தேகப்படும் விதமாக எந்த அழைப்பும் இல்லாமல் இருந்தது,  காவல் துறையினர் தெரிவித்ததற்கு மாறாக அவர மிக அருகாமையில் இருந்து சுடப்பட்டது, அவரது உடலில் பல இடங்களில் காயங்கள் இருந்தது போன்றவை தெரியவந்தது.
 
இந்நிலையில், இன்று இவ்வழக்கில் குற்றம் சாற்றப்பட்ட 17 காவல் துறையினருக்கும் ஆயுள் தண்டனை விதித்து தீர்ப்பளிக்கப்பட்டது.
 
இந்த நிலையில், ஆயுள் தண்டனை வழங்கப்பட்டது குறித்து கருத்து தெரிவித்த, ரன்பீரின் சிங்கின் தாய், எனது இளைய மகனை கொன்றவர்களை தூக்கிலிட வேண்டும். இந்த தீர்ப்பு அதிருப்தி அளிக்கிறது. தீர்ப்பை எதிர்த்து மேல்முறையீடு செய்ய உள்ளதாகவும் தெரிவித்தார்.