அரியலூர் அருகே பயங்கர பஸ் விபத்து 10 பேர் பலி

அரியலூர்: அரியலூர் அருகே அரசு டவுன் பஸ் மீது அசுர வேகத்தில் வந்த சிமென்ட் டேங்கர் லாரி மோதியதில் 10 பேர் உடல் சிதறி பலியாயினர். டிரைவர், கண்டக்டர் உள்பட 35 பேர் படுகாயமடைந்தனர். அரியலூரில் இருந்து செந்துறை நோக்கி நேற்று மாலை அரசு டவுன் பஸ் ஒன்று சென்று கொண்டிருந்தது. இதில், 45 பயணிகள் இருந்தனர். செந்துறை அருகே ஒட்டக்கோவில் என்ற இடத்தில் உள்ள ஒரு சிறிய திருப்பத்தில் பஸ் சென்று கொண்டிருந்தது. அப்போது எதிரே செந்துறையில் இருந்து அரியலூருக்கு சிமென்ட் பவுடர் ஏற்றிய டேங்கர் லாரி கட்டுப்பாட்டை இழந்து அரசு பஸ் மீது பயங்கரமாக மோதியது.

இதில் பஸ்சின் இடதுபுறம் முற்றிலும் நொறுங்கி சேதமடைந்தது. மோதிய வேகத்தில் பஸ்சில் இருந்த பயணிகள் தூக்கி வெளியே வீசப்பட்டனர். இதில் 9 பேர் சம்பவ இடத்திலேயே உடல் சிதறி உயிரிழந்தனர். விபத்து ஏற்படுத்திய லாரி டிரைவர், கிளீனர் தப்பி ஓடி விட்டனர். பஸ் இடிபாடுகளில் சிக்கி ஏராளமான பயணிகள் ரத்த வெள்ளத்தில் உயிருக்கு போராடினர். சத்தம் கேட்டு அருகில் உள்ள கிராம மக்கள் விபத்து ஏற்பட்ட இடத்துக்கு ஓடிவந்து மீட்பு பணியில் ஈடுபட்டனர். கம்பிகளை வளைத்து உயிருக்கு போரா டியவர்களை மீட்டனர். தீயணைப்பு துறைக்கும், 108 ஆம்புலன்சுக்கும் தகவல் தெரிவித்தனர்.

அவர்களும் விரைந்து வந்து காயமடைந்தவர்களை மீட்டனர். விபத்தில் இறந்தவர்களின் விவரம் வருமாறு: அரியலூர் காமராஜ் நகர் சம்பத் மகள் பிரபாதர்ஷினி (6), பொய்யாத நல்லூர் பச்சியப்பன் மனைவி அலமேலு (45), உடையார்பாளையம் லயன் மேட்டுத்தெரு ராஜாக்கண்ணு மனைவி ஆனந்தி (30), நாகல்குழி பிச்சைபிள்ளை மகன் சுரேஷ் (25), சரவணன் மனைவி ஜெயந்தி (27), ஆர்.எஸ்.மாத்தூர் தங்கவேல் மனைவி ஜெயலெட்சுமி (25), செதிலவாடி தனவேல் (65), ஆதிகுடிகாடு செல்லமுத்து (55), வீராக்கண் கிராமம் செங்குட்டுவன் மகள் கவிதா (24) ஆகிய 9 பேர் பலியாயினர்.

தஞ்சை மருத்துவமனைக்கு கொண்டு செல்லும் வழியில் சாந்தி பரிதாபமாக உயிரிழந்தார். படுகாயமடைந்த 35 பேர் அரியலூர், தஞ்சை அரசு மருத்துவமனையில் அனுமதிக்கப்பட்டு தீவிர சிகிச்சை அளிக்கப்பட்டு வருகிறது. இவர்களில் இதில் 17 பேர் மிகவும் ஆபத்தான நிலையில் சிகிச்சை பெற்று வருகின்றனர். தகவல் அறிந்த அரியலூர் கலெக்டர் சரவணவேல்ராஜ், எஸ்பி ஜியாவுல் ஹக், தாசில்தார் முருகன் மற்றும் போலீசார் சம்பவ இடத்திற்கு சென்று பார்வையிட்டனர். உயிர் தப்பிய பயணிகள் கூறுகையில், பஸ் நிதானமாகத் தான் சென்று கொண்டிருந்தது. ஆனால் எதிரே சிமெண்ட் ஏற்றி வந்த லாரிதான் பஸ் மீது பயங்கர வேகத்தில் மோதியது. இதில் நாங்கள் தப்பித்தது பெரிய விஷயம் என்றார்.

ஒரே நாளில் 3 விபத்துகளில் 18 பேர் பலி

* அரியலூர் அருகே சாலை விபத்தில் 10 பேர் உடல் சிதறி பலி.
* விழுப்புரம் அருகே பட்டாசு தொழிற்சாலையில் ஏற்பட்ட வெடி விபத்தில் சிறுவன் உட்பட 4 பேர் பலி.
* கோவையில் கார் சுவரில் மோதியதில் கார் ரேஸ் பயிற்சிக்கு சென்ற 4 பேர் உடல் நசுங்கி சாவு.

டாக்டர் பற்றாக்குறை

அரியலூர் மருத்துவமனையில் போதிய டாக்டர்கள், தீவிர சிகிச்சை பிரிவுக்கு தேவையான மருத்துவ உபகரணங்கள் கிடையாது. எனவே விபத்தில் சிக்கி காயமடைந்தவர்களில் 5 பேர் மட்டுமே அரியலூர் மருத்துவமனையில் அனுமதிக்கப்பட்டனர். மீதமுள்ளவர்கள் தஞ்சை மருத்துவமனையில் அனுமதிக்கப்பட்டனர். எனவே போதிய மருத்துவர்களை நியமித்து, மருத்துவ உபகரணங்களை வழங்க நடவடிக்கை எடுக்க வேண்டும் என்று மக்கள் தெரிவித்தனர்.

 

விபத்தில்உயிர் இழந்த அனைவரின் ஆன்மா சாந்தி அடைய எல்லாம் வல்ல இறைவனை வேண்டுகின்றேன்