ஏழு அமைச்சர்களின் கட்டுப்பாட்டில் 17 துறைகள்: சிறந்த நிர்வாகத்திற்காக மோடி புதிய அணுகுமுறை

புதுடில்லி: மன்மோகன் சிங் தலைமையிலான, ஐக்கிய முற்போக்கு கூட்டணி ஆட்சியில், 17 அமைச்சர்களின் கீழ் செயல்பட்ட அமைச்சகங்கள், தற்போது, ஏழு அமைச்சர்களின் கட்டுப்பாட்டில் கொண்டு வரப்பட்டு உள்ளன. சிறப்பான நிர்வாகம் மற்றும் மக்களுக்கு நல்ல பலன் கிடைப்பதை உறுதி செய்ய, பிரதமர் மோடி, இந்த நடவடிக்கை எடுத்துள்ளார்.

வெளிநாட்டு இந்தியர் விவகாரம்:

மன்மோகன் சிங் தலைமையில், ஐக்கிய முற்போக்கு கூட்டணி அரசு, 2009ல் இரண்டாவது முறையாக பதவியேற்ற போது, வெளிநாட்டு இந்தியர் விவகாரம் என்ற துறை உருவாக்கப்பட்டது. அதற்கென, தனி அமைச்சரும் நியமிக்கப்பட்டார். ஆனால், இம்முறை அத்துறையானது, அமைச்சர் சுஷ்மா சுவராஜுக்கு ஒதுக்கப்பட்டு உள்ள, வெளியுறவு விவகாரத் துறையுடன் இணைக்கப்பட்டு உள்ளது. அதேபோல், முந்தைய ஆட்சி யில், சாலை போக்கு வரத்து மற்றும் நெடுஞ்சாலைகள் துறைக்கு, தனி அமைச்சரும், கப்பல் துறைக்கு தனி அமைச்சரும் பொறுப்பு வகித்தனர். இம்முறை, அந்த இரு துறைகளும் ஒன்றிணைக்கப்பட்டு, மகாராஷ்டிராவைச் சேர்ந்த கேபினட் அமைச்சரான, நிதின் கட்காரியின் கட்டுப்பாட்டில் கொண்டு வரப்பட்டு உள்ளது.

சாலை போக்குவரத்து:

மகாராஷ்டிராவில், பா.ஜ., - சிவசேனா தலைமையிலான அரசு பதவி வகித்த போது, அந்த அரசில் அமைச்சராக இருந்த நிதின் கட்காரி, சாலை போக்குவரத்தை விரிவுபடுத்துவது மற்றும் பாலங்கள் கட்டுவதில் சிறப்பாக பணியாற்றினார். மன்மோகன் அரசில், மின் துறை, நிலக்கரி மற்றும் புதுப்பிக்கத்தக்க எரிசக்தி போன்ற துறைகளுக்கு, தனித்தனி அமைச்சர்கள் இருந்தனர். மோடி ஆட்சியில், இந்த மூன்று துறைகளும், தனிப்பொறுப்புடன் கூடிய இணை அமைச்சரான, பியூஷ் கோயல் வசம் ஒப்படைக்கப்பட்டு உள்ளன. நகர்ப்புற மேம்பாடு, வீட்டு வசதி மற்றும் வறுமை ஒழிப்புத் துறைகள், அமைச்சர் வெங்கையா நாயுடு வசம் ஒப்படைக்கப்பட்டு உள்ளன. ஊரக மேம்பாடு, பஞ்சாயத்து ராஜ், குடிதண்ணீர் துறைகள் ஒன்றிணைக்கப்பட்டு, மகாராஷ்டிராவைச் சேர்ந்த, கோபிநாத் முண்டேக்கு வழங்கப்பட்டு உள்ளன. முன், கலாசாரம் மற்றும் சுற்றுலா துறைகள் தனித்தனி அமைச்சர்களின் கீழ் செயல்பட்டன. இப்போது, இந்த இரு துறைகளும், கோவாவைச் சேர்ந்த, ஸ்ரீபத் நாயக்கிடம் ஒப்படைக்கப்பட்டு உள்ளன. திறமையான நிர்வாகத்திற்காக, இப்படி அமைச்சகங்களை ஒன்றிணைப்பது, மறைந்த முன்னாள் பிரதமர், ராஜீவ் பதவிக் காலத்திலும் நடந்து உள்ளது. ராஜீவ் பிரதமராக பதவி வகித்த போது, ரயில்வே, கப்பல் துறை, சிவில் விமானப் போக்குவரத்து போன்ற உள்கட்டமைப்பு துறைகளை ஒன்றிணைத்து, போக்குவரத்து துறை என்ற பெயரில், மறைந்த மத்திய அமைச்சரான, பன்சிலால் தலைமையில் செயல்பட வைத்தார். பன்சிலாலுக்கு உதவ, அப்போது மூன்று இணை அமைச்சர்கள் நியமிக்கப்பட்டிருந்தனர்.

மத்திய மனிதவள மேம்பாடு:

அத்துடன், கல்வி, கலாசாரம், பெண்கள் மற்றும் குழந்தைகள் மேம்பாடு போன்ற துறைகளை, மறைந்த முன்னாள் பிரதமரும், ராஜீவ் காலத்தில் அமைச்சராக பதவி வகித்தவருமான, நரசிம்மராவ் கட்டுப்பாட்டில், மத்திய மனிதவள மேம்பாட்டு அமைச்சகத்தின் கீழ் செயல்பட வைத்தார். அப்போது தான், முதன்முறையாக, மத்திய மனிதவள மேம்பாட்டு அமைச்சகம் உருவாக்கப்பட்டது. இதேபோல், வாஜ்பாய் பிரதமராக பதவி வகித்த காலத்தில், தகவல் தொழில்நுட்பத் துறையும், தகவல் தொடர்புத் துறையும், ஒரே அமைச்சரின் கட்டுப்பாட்டில் செயல்பட்டன.

[thanks] தினமலர் [/thanks]

இந்தியா நல்லா வரட்டும்...

நல்லதே நடக்கட்டும். நாடு சிறக்கட்டும்

.


அடுத்த துறைகளை பற்றி எனக்கு அவ்வளவாகத் தெரியாது

ஆனால் பாதுகாப்புத் துறையையும் நிதித் துறையையும் ஒரே நபரின் கீழ் கொண்டு வந்து மிக நேர்த்தியான முடிவு

.

T.N.Balasubramanian wrote:

SajeevJino wrote:.


அடுத்த துறைகளை பற்றி எனக்கு அவ்வளவாகத் தெரியாது

ஆனால் பாதுகாப்புத் துறையையும் நிதித் துறையையும் ஒரே நபரின் கீழ் கொண்டு வந்து மிக நேர்த்தியான முடிவு

.

பாதுகாப்பு துறைக்கு தேவைக்கேற்ப நிதி ஒதுக்க முடியும் என்பதாலா, சஜீவ் ?

ரமணியன்

.

Yes ...முன்பெல்லாம் ..பாதுகாப்புத் துறை வேண்டிய பணத்தை கேட்க நிதித் துறைக்கு அனுப்பும் ..பின்பு அது பரிசீலிக்கப்பட்டு அதில் பாதி அளவு அடுத்த பட்ஜெட்டில் கிடைக்கும் ...ஆனால் இப்போது அது உடனே நேரடியாகவே கிடைக்கும் ..இதனால் பெண்டிங் என்பதற்கு சாதியக்கூறுகள் மிகவும் குறைவு

.