பராமரிப்பில்லாத திருவாரூர் தியாகராசர் கோயில்!

பாரம்பரியம் மிக்க திருவாரூர் தியாகராஜர் கோயிலையும், கோயில் வளாகத்தையும் பராமரித்து பாதுகாக்க வேண்டும் என பல்வேறு தரப்பினரும் கோரிக்கை விடுத்து வருகின்றனர்.

பிரசித்தி பெற்ற திருவாரூர் கோயில் ஆழித்தேர், கமலாலயக் குளம் ஆகியவற்றை காண ஆண்டுதோறும் லட்சக்கணக்கான பக்தர்கள், சுற்றுலாப் பயணிகள் வந்து செல்கின்றனர். இங்கு பிரதான ராஜகோபுரங்களுடன் தேவாசிரியன் மண்டபம் உள்ளிட்ட 50-க்கும் மேற்பட்ட சிறுசிறு கோயில் மண்டபங்கள் உள்ளன.

கமலாலயக் குளத்தின் நடுவில் கீழ்திசை நோக்கு சுவாமியை பார்த்தவாறு கோயில் உள்ளது. இக்கோயில் நீதி தவறாமல் ஆட்சி செய்த மனுநீதிச் சோழன் நினைவு கல்தேர், பண்டைய தமிழர்களின் கலைப் பண்பாட்டை பிரதிபலிக்கும் அழகியச் சிற்பங்களை கொண்டுள்ளது.

கோயில் கோபுரங்கள், அடிக்கட்டுமானங்கள் கருங்கற்களால் உருவாக்கப்பட்டு அதில் அழகிய கற்சிற்பங்கள் மற்றும் சுதைச் சிற்பங்கள் செதுக்கப்பட்டுள்ளன.

தேவாசிரியன் மண்டபத்தின் மேற்கூரை மற்றும் கோயிலுக்குள் சுவரின் பக்கவாட்டில் வரலாற்று நிகழ்வுகளை உணர்த்தும் பல நூற்றாண்டுகளுக்கு முன்னர் தீட்டப்பட்ட அழகிய ஓவியங்கள், சோழர் காலத்தில் திருவாரூரின் சிறப்பு, ஊர்ச்சபை, சதுர்வேதி மங்கலங்கள் என வரலாற்று செய்திகள் அடங்கிய 80-க்கும் மேற்பட்ட கல்வெட்டு சாசனங்கள் கோயில் மதில்சுவரில் செதுக்கப்பட்டுள்ளன.

பல்வேறு வரலாற்று பெருமைகளை கொண்ட திருவாரூர் தியாகராஜர் கோயில் தற்போது போதிய பராமரிப்பின்றி காணப்படுகிறது. இங்குள்ள ஓவியங்களில் சுண்ணாம்பு தீட்டப்பட்டும், கல்வெட்டில் துளையிட்டு தீயணைப்புக் கருவிகள் பொருத்தப்பட்டும், கல்வெட்டை மறைத்து புதிய தற்கால பளிங்குகல் கல்வெட்டு வைத்தும், கற்சிற்பங்கள் சேதமடைந்த நிலையிலும் உள்ளன. பாதுகாக்கப்பட வேண்டிய மனுநீதி சோழன் கல்தேர் உரிய பராமரிப்பின்றி செடிகள் முளைத்து சுவர் சேதமடைந்துள்ளது.

கோயில் வளாகத்துக்குள் அமைக்கப்பட்டிருந்த பூங்கா பயன்பாடற்று, அப்பகுதியில் நடந்து செல்ல முடியாத நிலையில் முட்கள் முளைத்துள்ளன. கோயில் வளாகத்தில் உள்ள கழிவறைகள் பயன்பாடற்று உள்ளன.

2012-ஆம் ஆண்டு இடிந்து விழுந்த கமலாலயக் குளக்கரை இதுவரையில் சீரமைக்கப்படவில்லை.

பாரம்பரியம் மிக்க கோயிலையும், அங்கிருக்கும் கலைச் செல்வங்களையும் முறையாக பராமரித்து, பாதுகாத்து எதிர்கால தலைமுறையினருக்கு கொண்டு செல்ல இந்து அறநிலையத் துறையும், தமிழக அரசும் உரிய நடவடிக்கை மேற்கொள்ள வேண்டும் என்பதே பக்தர்களின் விருப்பம். (தினமணி)